Lamentaciones 5 - Biblia Dc en Mixe de Quetzaltepec

Ja naax kajpn ja nyu'kxtakën mëti'ipë jëëpy yaxpën

¹ Wintsën yë'ë ja'amyäts wi'ixës të njat të nkëpätën; ijxtëkës, wi'ixës xyajjoot'anpëktën.

² Aak wiink naax wiink kajpn yajpaaty mëti'ipë ijty ëëts njä'ä'ajtëpën; ja njëën ntëjkëtyës wiink ja'ay ja tyam jyä'ä'ajnëtëp.

³ Ku'ooky u'unk ëëtsëtynyë, ka'apës pën yë nteetyëty; ku'ooky to'oxytyëjkën ja ntaakëtyës të wyë'ëmnë.

⁴ Njuuynyëtëpës mëti'ipës ëëts nnëë'ajtëpën; njuuynyëtëpës mëti'ipës ëëts nja'axy'ajtëpën.

⁵ Jëtu'unës näjyawëtë tëëjës yowë xytyukyo'ktsu'umënëtë yë kepy mëti'ipë tsajpkaa myëyuupyën; ja n'ënu'kxëtë ka'apës xyajpo'kxtë.

⁶ Koos nkääky n'uuky ntsojktë, jëyëjpës ojts yë Egiptë ja'ayëty ets Asiria ja'ayëty nmëtuntës.

⁷ Nteety ntaakëtyës pokytyuuntë ets tëëyëp ja y'o'knëtë, ja nyëë pyokyëty ëëts ja nkëpäjtëp.

⁸ Ëyoopëtëjkëty mëtuunpëtëjkëty tyam ëxëëk xytyuuntëpës ets ka'ap pën mëti'ipës xyajtso'oktëpën kyë'ëjootjotyëty.

⁹ Ëtsë'ëkëtuuyës yë njuukyajtën mpëjkta'aktë koos një'kxy mpëky n'ixta'atë ets tsiptuunpëtëjkëty mëti'ipë jam të'ëts'itjotm jayajpatëpën ka'ap tii tuntë.

¹⁰ Jajp toopy ëëts ja njot nini'kxëty jëtu'un tä jëënkopk jyäjyën tyoyën, mëët jëën mëti'ipës mpa'am'ajtëpën.

¹¹ Jam ma Sión kajpnën ets jam ma Judá kajpnën ka'ap ja to'oxytyëjkëty ets ja to'oxy'ëna'këty pën të wyinkutsë'ëkëty.

¹² Ja nkopktëjkëtyës kyë'ëkëjxy të yajtëëyë'ëktë, ja mëjja'aytyëjk ka'ap pën të y'ëkwinkutsë'kënë.

¹³ Ja ja'ayëty mëti'ipë mëkëtyën kumëjaawëtyën yë'ë yajpëjktaktë jëtsymyääpë; e ja ëna'ktëjkëty yë'ë yajpëjktaktë nija'axpë.

¹⁴ Ka'ap maa ja mëjja'aytyëjkëtynyë mëti'ipë jam ma tëjkëtyaknën yajpatëpën; ka'ap y'ëkyajmëtoownë ëna'ktëjkëty y'ëk'ëëw y'ëkyaxnëtë.

¹⁵ Ka'ap yë xoontakën; y'ëkyajpatnë maas yë n'aaw njotëtyën; ja ety puty monyëtukyë të y'awinpijnë.

¹⁶ Jëtu'unës nyajajnëtë tëë yowë ja nkujanëtyës xykyuka'atutnëtë; janty mon janty tuk ëëts nyajpaatë koos të mpokytyuntë.

¹⁷ Paaty ëëts ja n'aaw njotëty pyëktë y'atontë; paaty ëëtsëty ja n'ijxën myoonëtë.

¹⁸ Yë Sión kopk tsaanipiyën je'eyë kyëxë'knë; yë wax je'eyë najxnëtëp tëjkënëtëp.

¹⁹ E mijts Wintsën, xëmë myajkutuka'any; xëmë myajpaata'any ma mkutujktaknën.

²⁰ ¿Wi'ixës ko xëmë xyjyä'äytyëkoytyë? ¿Wi'ixës ko jeky xy'ëxmatstë?

²¹ Wintsën, yajwinpijtëk ëëts jatëkok ma mijtsën, winpitantëp ëëtsëty. Mijts m'a'ixëp etsës ja njuukyajtënëty jëtu'un jatëkok y'awinpitëty tä ijty tëëyëpën.

²² Mijts je'eyë ëëts të xy'ixtij xy'ëxwanëtë; mëj këjää yowë të mtimjyootanpëky ma ëëtsëtyën.