Lamentaciones 3 - Biblia Dc en Mixe de Quetzaltepec

Jam ja ëwaatsëtuuy'ajtën yajpaaty ma Wintsënën

¹ Ëjts tëëjës njawë yë ëyo'on jotmay, ko Wintsën të jyoot'anpëky.

² Jamës të xyajnëjkxy ma y'api'its y'akootsëtyën, jamës të xyajye'ey ma ka'ap tyi'kxy jyäjyën;

³ janaam jatsojk ets winëjääjëty xykyoxyës xytsyiikyës.

⁴ Tëë tyaj'ëmëjë njot nini'kxës, atëj tuktëjë të tuunta'ay nwaay npajkës;

⁵ tëë xytyuknajuuxyës yë pëjkën ijxën ets mëti'ipë nmë'ëyowëpës;

⁶ akootstuuyës të xyajjuuky'äty, jëtu'un tä mëti'ipë tëëyëp o'ktëpën.

⁷ Kemy jotypyën të xypyëjktä'äkyës mëti'ipë ka'ap tmëëtëtyën pëtsëëmtakn; etsës të xytyuktsuumtä'aty yë pujxntä'äky;

⁸ oyës mëk të amëtoy yë näypyutëkë, ka'ap të tmëtoy yë n'aaw nyo'knës;

⁹ tëë mëjpotsy tpëjktä'äky maas ënety naxa'anyën, tëë tyajtëkatsy yë në'ë ntu'ujës.

¹⁰ Jëtu'un të nyäpyëjktä'äkyë ma ëjtsën tä tu'uk kaajën mëti'ipë muum yu'utsy näpyëjktakëpën;, jëtu'un tä tu'uk osën mëti'ipë nipëtë'ëkaanpën.

¹¹ Tëës xyajtu'utëkatsy ets tëë xyajtsëtyuty, yajxonës të xy'ëtsë'kënë.

¹² Ëjtsës yë tyi'pxn të xytyukni''ixyë.

¹³ Ja ti'pxn mëti'ipë yë Wintsën të ti'pxë'ëkyën kujkës të xypyääty ets yajxon të kyëktëkë.

¹⁴ Aak je'eyës nja'ay xynyëxik xytyukxiknë; janaam jatsojk aak'ëjts yajnikajpxp yajnimëtyakp.

¹⁵ Ëxëëkës yë Wintsën të xytyuny; ta'amëm jyawë mëti'ipës të xytyuk'uukyën.

¹⁶ Yajxon të tnaxkutäxë n'aaw ntëtsës naaxkëjxy; tëëjës xytyukpatijë'ëky yë naaxway.

¹⁷ Ma ëjtsën ka'ap yajpaaty jotkujk'atë, tëëjës nja'atyëkooynyë wi'ix ja'ay nyäjyawëty jotkujk.

¹⁸ Tëës ënety n'ënanë ko ka'apës ja Wintsën n'ëktukjotkujk'atanë.

¹⁹ Nja'amyejtsypës yë nmonyë ntukyës, yë n'ëjënës ntu'kënës ets n'ëyo'on njotmayës;

²⁰ koos nmëmay nmëtajy jëtu'unyës näjyawëty nmëjaawkëxy.

²¹ Tä tu'uk winma'any mëti'ipës nmëët'ajtypyën njotjoty nwinma'anyjoty ets jämyës yë njot nwinma'any njaakpëjktä'äky.

²² E yë Wintsën, ijxtëm yajnijawën ka'ap yë tsyojkën jya'awën kyixy nyäxy ets y'oy jot y'oywyinma'any ka'ap kyukëxë.

²³ Jopy jopy y'ajämë; mëjwiin këjää yë tsyojkën jya'awën.

²⁴ Tëës xy'ënëëmë: Ko yë'ëjës ntuk'ijxpäjtëp ets ko jamës winë mpaata'any.

²⁵ Yë Wintsën y'oyjya'ap yë ja'ay mëti'ipë tuk'ijxpäjtëpën, mëti'ipë yë'ë nimiinëpën.

²⁶ Oy ko yë Wintsën n'a'ijx njëjp'ijxmëty yë näypyutëkë, yë'ë nyija'ap jëna'a xypyutëkëja'anëmë.

²⁷ Oy ni'ik ko yë ja'ay yë'ë tëyajtën tuny.

²⁸ Yë ja'ay amonyë ets nätyu'uk mëpaat wyi'imy ko yë Wintsën y'ënë'ëmxëtëty ets amonyë y'itëty ets nätyu'uk wyë'ëmëty;

²⁹ ni'ikyë mëpaat tkukajpxë ets wyintä'äky nyaaxkoy, wä'änxyëp yë Wintsën pya'ëyowëtëty;

³⁰ ni'ikyë mëpaat wyiin jyëjp tyäky ma oypyën ets t'ëxajëty yë kajpxwijën oy ja'ay wi'ix y'ënë'ëxëtëty.

³¹ Yë Wintsën ka'ap tu'ukyë xyjyä'äytyëko'omyëty.

³² Oy xy'ëkyaj'ëyo'owmëty, xypya'ëyo'owmëp jatëkok, jä'ä ko tsyojkën jya'awën mëj këjää ni'ik.

³³ Yë'ë ka'ap t'oyjyawë ko yë naaxwiinyëtë ja'ay y'ëyoy jyotëkoy ets ka'ap jëtu'un jyawinmay tyaj'ëyowa'any yë naaxwiinyëtë ja'ay.

³⁴ Ko yë tsumjyä'äytyëjk ka'ap yajpa'ëyoy mëti'ipë tsumy matsy ijtëpën ma naax kajpnëtyën,

³⁵ ko kyayajmëj'ixy ja tëyajtën ma ja Ni'ik Këjxmëpë, mëti'ipë tu'uktu'uk ja ja'ay patëpën,

³⁶ ko ja oypyë ja nipaye'eyën kyayajtuny, ka'ap yë Wintsën jëtu'unpë t'oyjyawë.

³⁷ Ko pën wi'ix y'ënä'äny, ko pën tii jyätyë kyëpetyë, paaty jyëtu'un'aty jä'ä ko Ni'ik Këjxmëpë jëtu'un të tyajnikutukë.

³⁸ Ko winë oy wyimpëtsëmy ets ko winë ëxëëk wyimpëtsëmy, yë Wintsënën jëtu'un yajkutujkpy.

³⁹ Yë naaxwiinyëtë ja'ay pokyjoty je'eyë jyuuky'äty, ¿tii ko nëkoo? y'ënä'äny y'ëti'itsy.

⁴⁰ Tsojk nmëma'ay nmëtajëmë wi'ix nyajpatëmë ets tsojk niwinpijtëmë yë Wintsën.

⁴¹ Tsojk Wintsën tsajpjotmëpë nmënu'kxtakëmë.

⁴² Ëëtsajtëmë tëë ntuuntëko'oyëmë ets tëë nkäjpxykyumëtoownajxëmë ets mijts ka'ap të mpokymye'kxy.

⁴³ Yë mtsip m'äkës të xytyukna'ëwtitë, tëëjës xy'ixjëtit xypyajëtitë, etsës të xyaj'ooktë, ka'apës të xypya'ëyowtë.

⁴⁴ Je'eyë të mnäyu'utsyë yootsjoty këtiipë xymyëtowëty ëëts ja nnu'kxtakënëty.

⁴⁵ Jëtu'unës të xyajnaxtë pu'uxmën ma ja'ayëtyën.

⁴⁶ Aak xynyi'apëtsëëmtëpës yë nmëtsiptëjkëty;

⁴⁷ ëtsë'këtyëp, yaj'ookantëp, yajkutëkoyantëp ets xit ko'ow ëëts je'eyë të xytyuunta'atë, jëtu'unës njat të nkëpätë.

⁴⁸ Nijëëy niyäxypyës ja nnaax nkajpnës koos n'ixy wi'ix kyutëkoyën.

⁴⁹ Xëmë ka'atëëpës yë nwiin nëë, ka'apës mpo'kxy, jä'ä ko ka'apës npaaty tiijës xyajjotkujkta'akëpën

⁵⁰ ënätnëm tëy ko yë Wintsën xynyi''ijxkëta'aktëtyës.

⁵¹ Njootjotypyaatës pyëjknë yë nwiinës, mëët ko o'ktëy jyatë kyëpätë ja to'oxy'ëna'këty mëti'ipë nkajpnjotyës yajpatëpën.

⁵² Yë nmëtsiptëjkës ajotkumonës të xymyatstë, jëtu'un tä ja'ay tmatsyën joon jëyujk ets ka'apës tii poky nmëëtëty;

⁵³ ajuukyës të xykyujëpipëtë nëëjutjoty ets t'akë'ëtë mëët tu'uk yë mëjtsaa.

⁵⁴ Etsës ja nëë të xynyijä'tstëkoy, japës të nmay të ntajy: Tëë, tëkoopyës jëtu'un.

⁵⁵ E ëjts, Wintsën, ënetyës të nkajpxpaaty yë mxëëw maas ënety jap naaxpa'tkë'p nyajpaatyën;

⁵⁶ mijts të xymyëtoy yë n'aaw nyo'knës ets tëë xymyëtoow'ity ko të nmënu'kxtä'äky.

⁵⁷ Jä'ä xëëw ma nmëkäjpxyën, jä'ä xëëw mminy ets xy'ënëëmës: Këtii mtsë'ëkëty.

⁵⁸ Mijts Wintsën, mijtsës xynyiwaantutp tsipjoty ets mijts myajtsokpy yë njuukyajtënës.

⁵⁹ Mijts wa'ats xy'ixy xynyijawë wi'ix ka'ap oy nyajnipaye'eyën, paaty mijts npëjktsoy etsës mijts xypyaye'eyëty.

⁶⁰ Mijts wa'ats xy'ixy xytyuny wi'ix je'eyë yaj'o'okwinpita'antën ets mnija'ap wi'ix xynyimay xynyitajëtënës.

⁶¹ Mëtoow'it wi'ix y'ëna'antën ëxëëkjaty ets wi'ix xynyimay xynyitajëtënës;

⁶² je'eyë tsyäty kyajpxtë ets janaam jatsojk ëjts xykyatuk'ëmoontëp.

⁶³ Ix, wi'ix tii tuntën, mëti'ipëjaty tyuuntëpën aak'ëjts je'eyë xynyëxik xytyukxiktëp.

⁶⁴ Mijts tukukëpät ijxtëm pyaat'atyën, tëytyun ijxtëm pyaatëtën.

⁶⁵ Mëk jyot wyinma'any pëjktakëyë këtiipë oypyë tja'akyukëtëty ets xypyokëty.

⁶⁶ Mpaja'tëp oy maa tyimnëjkxtëty, Wintsën, mijts m'a'ixëp ets yaa naaxwiiny tyimkutëkoytyëty.