Lamentaciones 2 - Biblia Dc en Mixe de Quetzaltepec

Wintsën të tyajkutëkoy yë Israel kajpn

¹ Mëj'äämpy yë Wintsën yë tsyip y'äkë të tyaj'ity, mëti'ipë të tyajkukootsën yë Sión kajpn oypyë ënety yaj'ixyën. Tëë tyajma'ta'ay ja Israel kajpn oypyë tsujpë ets jëtu'un të tyajjaty tä jeexyë tsajp kyupojtsnaxyën naaxkëjxy; ko jyoot'anpëjky ka'ap tja'awëy ja tyekpya'tk.

² Nitu'uk yë Wintsën yë Jacob jyëën tyëjk të tkayajwë'ëmë; poj'am të tyajkutëkooytyä'äy, yë Jacob yë nyaax kyajpn mëti'ipë ënety ta'tspëky ets këwent'aty ijtpën; tëë tjaamteeny tnaaxteety yë yajkutujkpëtëjk ets y'ënä'ämpëtëjkëty.

³ Tu'ktonyë të t'akojxtuky yë Israel yë kyutujkën. Tëë tjëpëjkta'ay yë myëk'ajtën ko të nwinkuwa'këmë yë nmëtsip'ajtëmë; tëë tnino'kta'ay winë mëti'ipëjaty të tpaatyën.

⁴ Yë Wintsën jëtu'un tä tu'uk yë mëtsipën, të two'ontë yë tyi'pxn, mëk yë kyë'ë të tpëjktä'äky; jëtu'un tä mëtsipën jëtu'un të tyajkutëkooytyä'äy mëti'ipëjaty ënety y'oy'ijxypyën; tä jëënën të tyajnaxy yë tsyip y'äkë ma Sión kajpn tyaj'ityën yë tsyiptuunpëtëjk.

⁵ Jëtu'un yë Wintsën të y'ëti'itsy mëtsipën; tëë tyajkutëkoy yë Israel, tëë tyajjijtë'kta'ay yë kyutujkëntëjk, tëë tyajkutëkooytyä'äy yë kyajpn mëti'ipë ta'tspëky ets këwent'aty, ijtpën ets të tukpata'ay ja Judá ja ëyo'on jotmay.

⁶ Jëtu'un tä mä'tspën jëtu'un jap tsajptëkoty ëxëëk të y'ëti'itsy; tëë tyajma'ta'ay ma ijty nätyu'ukmukë y'ityën. Yë Wintsën të tyajkutuky ets jam Sión. Ka'ap pën y'ëkxëëwtuunëty ets ka'ap pën sapëtë xëëw t'ëk mëjja'awënëty. Mëët yë tsyip y'äkë ets mëët yë y'ëwa'an'at të tukjoot'anpëky yë teetytyëjkëty ets yajkutujkpë.

⁷ Ka'ap të tkupëky yë wintsë'këntyakn, ka'ap të tkupëky yë tsajptëjk; yë mëtsip të tukkë'ëtëjkëtyä'äy yë potsy mëti'ipë ijty nyapots'ajtypyën yë naax kajpn. Jëtu'un jap tsajptëkoty ja'ay yaxnëtë jyojknëtë tä jeexyë jap xyëëwtuntën.

⁸ Yë Wintsën të tuknipëjktaakë ets jyijta'ajëty yë Sión kajpn. Tëë tnimay tnitajë wi'ix tyajkutëkoyä'änyën ets ka'ap të tmëpo'kxy, koonëm të tuny ijxtëm ënety të tnimay të tnitajën. Tëë tjijta'ay mëti'ipë ja naax kajpn nyapots'ajtypyën ets ja ja'ayëty je'eyë tnimon tnutuktë jëtu'un tä jeexyë pën të y'ookyën, tu'kë'ëyë të nyaaxmëjijtëtyä'äy.

⁹ Ja naax kajpn tëë ja nyitëjk'aaw mya'taaynyë ets mëti'ipë mëët y'ëtukyën nän tëë mya'ta'ay; tëj joow të jyajta'ay, aak naaxkëjxy të kyëtakta'ay. Yë yajkutujkpë ets y'ënä'ämpëtëjk aakjam yajpata'atë wiink naax wiink kajpn ma ja'ay wiink tios t'ëwtatën; ka'ap maa ja Dios ja tyiyajtën y'ëkyajpatnë. Yë kyäjpxynyajxpëtëjk ka'ap y'ëkwinkëmaanëtë ets Wintsën tii y'ëktuk'ijxënëtë.

¹⁰ Yë mëjja'aytyëjk amonyë jyaak u'unyëtë naaxkëjxy, tëë naaxway nyätyukupëjkta'ajëtë ets yë'ë wit të tuktëkëtë mëti'ipë u'kxpën nä'ämpën. Yë to'oxy'ëna'këty mëti'ipë kukajpnajtëpën Jerusalén winta'ak naaxkow jyaak jëtitë.

¹¹ Moonëpës yë n'ijxën koos je'eyë një'ëy nyä'äxy, jëtu'unës njawë mëpaatëpës yowë nkatsy pyëjnë; tëëjës näjyawëty ntimy xyejykyukëxë koos të n'ixy ja nja'ayës ja nyaax kyajpn të kyutëkoy, koos n'ixy ko yë'ëpaat pi'k ëna'k yuu'o'knëtë tu'ujoty.

¹² Ets ja pi'k ëna'këty t'ënëmaaytyë ja tyaakëty: Nanë, ka'ap tii kääkynyë ka'ap tii uukynyë. Aak ooky muum yajpatnëtë tu'ujoty ma kajpnën, tam tyaak jyatsä'än'itëtë ko y'ooktë.

¹³ ¿Pën mëët nëk ijxkijpxëty wi'ix mjaty mkëpetyën mijts Sión kajpn, oypyë mkëxë'ëkyën? Mëjwiin këjää të m'ëyo'onpaaty; ¿pën m'ëk yajjotkujk'atëtëp?

¹⁴ Ja wiinkëma'ay mëti'ipë ja mkäjpxynyajxpëtëjk ojts mtuk'ëwa'anxëtën nëkoo ojts je'eyë mwin'ëënyë. Ka'ap ojts tkajpxkëxë'ëktë ja mpoky këtiipë ja mjuukyajtënëty y'oyëtëty, nëkoo ojts mtukwinwanëty oypyë juukyajtën ets ojts mtukmëpëkyë.

¹⁵ Ko m'ixyë mëti'ipë jam najxtëpën tu'u'am je'eyë kyë'ë t'apo'kxmuktë ets mtukxi'ikyë; je'eyë kyëpajk tjëpiptë ets wyiin y'aaw tuntë ets y'ëna'antë, tää ënät, ixtë wi'ix yë Jerusalén kajpn jyätyën mëti'ipë ijty janty'oy näyajnajxëpën, mëti'ipë ijty ja'ay tyijtëpën y'oyëty tyujëty.

¹⁶ Aak mwiinktijënëp yë mëtsiptëjkëty. Je'eyë xyu'uxtë ets wyiin jyëjp tuntë ko m'ëtsu'uxyä'äxyë ets y'ëna'antë: Xit ko'ow të ntu'unëmë. Tyam jëtu'un të tpaaty ja xëëw po'o mëti'ipë ënety yajjëjp'ijxpën; tyam ënät njanty y'ijxëmë.

¹⁷ Tëë yë Wintsën tuny mëti'ipë të tmay të tajyën ets jëtu'un winë të tuny tä të tnikäjpxyën. Tëë tyajkutëkoy mëti'ipë tëëyëp nyikäjpxypën ko tyajkutuka'any, yë'ë të tyajnitukë ets mëtsip mnëxi'ik mtukxi'ikëtëty ets mëtsip mëj'äämpy të tyajnaxy.

¹⁸ Yë'ë Wintsën amëtow yë näypyutëkë, mijts Sión kajpn oypyë tsujpë. Yajpëyë'ëk yë mwiin nëëw xëëny koots. Këtii myaxtuky, këtii mwiin xyajpo'kxy mëët yë jë'ëyën yaxën.

¹⁹ Pëtë'ëk, ya'ax jok tsu'um koots; yajtukwa'ats yë m'aaw mjot ma Wintsënën, wä'än yë mwiinnëë tpëyi'iky nëëjën; yujkxaj yë mkë'ë ets amëtow pëjktsow ma yë'ëjë wä'än tpa'ëyoy yë m'u'unk m'ëna'k, mëti'ipë yuu o'ktëpën xii yaa muum ma tu'u y'ëwtityën.

²⁰ Ëk'ix Wintsën, mëmay mëtaj ko mijts ka'ap ni pën jëtu'un xytyunyëm ëxëëk. ¿Mëpaat jëtäätën tu'uk u'unktaak tsu'utsëty yë kyë'ëm u'unkë? ¿Mëpaat jëtäätën y'ooktë tyëkoytyë yë teetytyëjkëty ets käjpxynyajxpëtëjkëty jap ma tsajptëjkënë?

²¹ Xii yaa muum o'kpë kyëxë'knëtë në'ëjoty tu'ujoty, mëjja'ay, mutskja'ay, ye'etyëjk to'oxytyëjk mëti'ipë yo'kpux o'ktën. Ko të mjoot'anpëky tëë o'kën xyaj'ity, ka'ap pën të xypya'ëyoy ko të myajja'ay'ooky.

²² Xii yaa muum të xyajtsoony atsë'ëk ajawëpë, jëtu'un tä jeexyë myintën xëëw'ijxpë; Wintsën ko xyaj'ity yë ëyo'on ni pën të kyamayë kyä'äkëty. Mëti'ipës ojts nyaj'ijxpëkyën yë mëtsip të tyaj'o'kta'ay.