Jueces 20 - Biblia Dc en Mixe de Quetzaltepec

Guibeá

¹ Ënet ja Israel ja'ayëty tëkokyë tyu'ukmujktaaytyë mëti'ipë tso'ontëpën Dan, Beerseba ets Galaad, jëtu'un nyämyujkëtë tu'kja'aypyën jam Mizpá, Wintsën wyintuuy.

² Tëkokyë ja mëjja'aytyëjk jënu'un tnikopk'atën ja Israel kajpn, aaktam ënety yajpaatën; ja Wintsën ja nyaax kyajpn, jä'ä niwinë nyämyujkëtë taxk mëko'px mil ets aak tsiptuunpëty, teky'am nyëjkxtë.

³ Ja Benjamín ja jyä'äyëty ojts näjyëtu'un tnijawëtë ko ja myëku'uktëjkëty Israel ja'ayëty ënety jam të nyiye'eypyätë Mizpá. Paatykyëjxm ja Israel ja'ayëty ojts tyajtëwtë ja Leví ja'ay mëti'ipë ënety ja tyo'oxytyëjk të y'ookyën, wi'ix ënety mëtëy të y'ixë'atyën.

⁴ Tääts ja Leví ja'ay y'ëtsooy mëti'ipë ënety të kyu'ookyën: Ëjts jamës ënety të nja'ty Guibeá mëët yë nkutëjkës ma tsyëënëtën yë Benjamín ja'ayëty, jam ja tsuu nyajnaxa'antës.

⁵ E yë ja'ayëty jampë kyukajpn'atën, jä'ä tsu'um ojts tyajnatujkta'atë ja tëjk maas ënety të nja'ajta'aktën, etsës ëjts xyjyayaj'ookantë, e ja nto'oxytyëjkës jä'äts ojts ëxëëk tuntë, tu'ktsu'um tuktsuunajxtë, koonëm tyaj'o'ktë ko ojts xyiinyë.

⁶ E koos ooky ja to'oxytyëjk ojts ntuk'ijxpety, ënätës ja nyini'kx të ntsujktakë, tääts të nkäjxwa'kxta'ayës kajpn'apëtsëmy mapaat yë Israel ja'ayëty tsyëënëtën ets nijawëtëty ni'ëmukë mëti'ipë ya'atë ja'ayëty mëj këjää të tuuntëkoytyën.

⁷ E tyam miits yam ntuknipëjktëp ets xy'ixtëty tii mtuuntëp, xymyëmay xymyëtajtëty wi'ix mëpaat xynyipaye'eytyë.

⁸ Ënet tu'kmukyë wya'akë'ëktaaytyë ets y'ënantë: Tyam ni pën kyawinpitëty ets kyanëjkxëty ma tyëjkën.

⁹ Mëti'ipë mëpaat ntu'unëmën, tsojk xyëëw pyo'ojëty n'ijxpëtsë'ëmënë tääts yajnijawëty pënjaty mëpaat tnitëkëtë yë Guibeá kajpn.

¹⁰ Ma ja nimajkjatypyën ënety ja ja'ayëty të yajmëtyoowpëtsëmtën, nitu'uk jam yajnikajpxpätëty pën ja jë'kx pëky jyotmay'atëpën ets ja tsiptuunpëtëjk kyäytyëty. E ja nitaxtujkpë jä'ä nëjkx jam tukumëtowtë Guibeá mëët mëti'ipë të timy tyuntën, ko ëxëëk ja jyot wyinma'any të tyajkëxë'ëktë.

¹¹ Ja Israel ja'ayëty tu'ukyë nyämyujktaayëtë ets jëtu'un ja kajpn tnitëkëja'antë.

¹² E jëyëjp ojts tkäjxwa'kxtë ja kukäjpxy oymyaakajpnëty ma ja Benjamín ja jyä'äy tsyëënëtën ets t'ënëmaaytyë: ¿Tii ko ya'atë yë to'oxytyëjk të xyaj'ooktë?

¹³ Yë'ëjës yam ntsojktëp ets xykyë'ëyaktëty tääpë yajja'ay'o'kpëty mëti'ipë ëxëëk ja jyot wyinma'anyëtyën, jampë tsyëënëtën Guibeá. Wä'än näjyëtu'un timy'ooktë ets wya'atsëty ja kajpn ma ja pokyën mëti'ipë të tsëëmë'ëktën. E ja Benjamín ja'ayëty ka'ap ojts ninu'un timy tyuntë këwentë ja myëku'uktëjkëty oy jëtu'un jya'ënantë.

¹⁴ Ni'ikyë ojts janty nimay nyäwyoowmukëtë jam Guibeá ets tsyiptuna'antë mëët ja myëku'uktëjkëty Israel ja'ayëty.

¹⁵ Ja tsiptuunpëtëjkëty mëti'ipë ojts yajxon tuknipëjktaakëtën ets tsyoona'antë tsiptuunpë mëti'ipë jyä'äy'äjtypyën yë Benjamín, jä'ä nyiwinë'ajtë ni''i'px tëtujk mil, ëpëky niwëxtujk mëko'px mëti'ipë ënety të yajwin'ixtën jam Guibeá ets tsip'ixëty yajxon.

¹⁶ Ma ya'atë mayjyä'äyëtyën niwëxtujk mëko'px ënety jam yë ja'ay yajpaatë mëti'ipë tyukjajtëpën wi'ix yë tsaawëtu'un tyajtuntëtyën ets anajnykyë'ë yajtuuntëp, ya'atë ja'ayëty yajxon ënety kyujka'tsnëtë, wä'än twaayëty kujk tmo'otë.

¹⁷ E ja wiinkëtypë ja Israel ja'ayëty mëti'ipë pyaye'eytyëpën ja nëë poky, jä'ä nyimay'atë taxk mëko'px mil ets aakyë'ë tsip'ixëtypë mëti'ipë kanaak'ok muum të tsyippatnëtën.

Wi'ix ja tsip tyuunën mëët ja Benjamín ja'ayëty

¹⁸ Tä yë Israel ja'ayëty jam tsyo'ontë ets ojts nyëjkxtë jam Betel, yë'ë nyijawëjantë pën ja Dios ënety wyin'ijxyp ets tnitëkëty ja Benjamín ja'ayëty. Yë Wintsën yë'ë wyin'ijx yë Judá ja'ayëty ets tsyiptunëty mëët ja Benjamín ja'ayëty.

¹⁹ Ko kyomjëpom'ajty janty tsojk ojts pyëtë'kojtë yë Israel ja'ay ets nyëjkxtë jam Guibeá.

²⁰ Ojts tnitsoontë ja Benjamín ja'ayëty, jam nyäpyëjktakëtë winkon ma ja Guibeá kajpnën waatswitsy.

²¹ E ko ja Benjamín ja'ayëty pyëtsëëmtë jap kyajpnjotyëty, jä'ä xëëw jä'ä tyaj'o'ktë ja Israel ja'ayëty i'px mäjtsk mil.

^22-24 Paaty ojts jatëkok ja Israel ja'ayëty nyëjkxtë jam Betel ets twinjëëy twinyaxtë ja Dios mëët ko ënety may ja jyä'äyëty të y'ooktë ets jëtu'un tyimkutsu'ujëtyë ets jatëkok tyajtëëwtë pën y'ëwatsyp ja Wintsën ets tsyiptunëty mëët ja Benjamín ja'ayëty. E ja Wintsën ojts t'ëwa'atsy ets jatëkok tsyiptuntëty mëët ma myëku'ukëty, paatykyëjxm jatëkok jyotmëktaktë, komjëpom ojts jatëkok tninëjkxkojnëtëpë, ja myëku'ukëty Benjamín ja'ayëty ets mëët tsyiptuna'antë, jam ma ënety të nyäpyaatëtën.

²⁵ E ja Benjamín ja'ayëty ko jatëkok tsyo'ontë jap kyajpnjotyëty, ojts yajja'ay'o'kojnëtëpë, jä'ä tyaj'o'ktë ja tsiptuunpëtëjkëty mëti'ipë Israel ja'ayëtyën majkmokx tëkëëk mil.

²⁶ Ënet jatëkok ojts nyëjkxtaaykyojnëtëpë ja tsiptuunpëtëjkëty ets tëkokyë ja ja'ayëty jam Betel ets jyiiytyë yaxtë Dios wintum mëët ko ënety may ja myëku'uk të y'o'kojnëtëpë. Tu'kxëëw yajxon ka'ap kyääytyë y'uktë ets ja Wintsën tmooytyë ja wyintsë'kën ma tuntën mëët ja näy'ëëw'oy näykyajpx'oyë.

^27-28 Jä'ä xëëw jä'ä jëmëjt ja Dios ja kyaaxë, mëti'ipë yë käjpxytyu'unën myëët'ajtypyën jam ënety yajpaaty Betel, ets Finees yë'ë ënety teety'ajtp, yë'ë myaank yë Eleazar, y'ok'u'unk yë Aarón ets ja Israel ja'ayëty tyajtëëwtë ja Wintsën: ¿M'ëwatsyp jatëkok etsës ntsiptuntëty mëët nmëku'ukëtyës, yë Benjamín ja'ayëty, ëkë yë'ë oy koos ntimy'ëxmatstëtyë? Tä ja Wintsën y'ëtsoowëtë: Nëjkx mëët mtsiptuntë, jä'ä ko jëpom miits nyajmëta'akantëp.

²⁹ Ënet jam may nyäpyëjktakëtë yë tsiptuunpëtëjkëty kajpnpë'am,

³⁰ e ja nimaypyë ojts tninëjkxtë ja Benjamín ja'ayëty ets mëët jatëkok tsyiptuna'antë, jä'ä ja mëtëkëëkxëëwpë. Yajxon nyäpyëjktakëtë wääpy tä ënety tsyiptuna'antën jam kajpnwintum; näjyëtu'un tä ënety të nyäpyëjkta'akëtën ma ja mëmäjtsk'okpën.

³¹ Ënet ja Benjamín ja jyä'äyëty jatëkok jam pyëtsëëmtë ma ja kyajpnëtyën ets mëët tsyiptuna'antë ja Israel ja'ayëty. Ja Benjamín ja'ayëty jä'ä ojts tyaj'o'kojtë ja Israel ja'ayëty ni''i'px majk jam ma ja tu'ujën mëti'ipë tso'onpën Betel ets nyijkxy Guibeá ets näjyëtu'un jam muum ujtsjotm.

³² Yë Benjamín ja'ayëty jä'ä tjëjp'ijxtë ja Israel ja'ayëty tëkooytyëp yowë jatëkok, paaty kyäktë, jëtu'un tä ënety të y'ëkjajtëpën. Tiits ja Israel ja'ayëty je'eyë nëkoo twinkakëtyë ja myëtsip ets tmëjëkämkä'äktëty ja kyajpnëty.

³³ Ajotkumonë ojts yë Israel ja'ayëty pyëtsëëmta'atë jap ma yu'utsy y'itën ets ojts nyämya'kxta'ajëtë jëtu'un tä tsyiptuntën jam ma twëëwatyën Baal-tamar. E ja mëti'ipë ënety jam të nyäyu'utsëtën ujtsjotm kajpnpë'am, ojts näjyëtu'un jap pyëtsëëmta'atë ma ënety yu'utsy të y'itën,

³⁴ ets tnitëjkëtyë ja kajpn. Nimajk mil ojts yajwin'ixtë ja tsiptuunpëtëjkëty, aakjä'ä mëti'ipë tsip'ixëtyën mëti'ipë ojts tnitëkëtën ja Guibeá kajpn. Ja tsip ojts myëjënë kyëjääjënë ets myëktaknë; yë Benjamín ja'ayëty ka'ap ënätyë tnijawëtë pën tëkoyantëp.

³⁵ Yë Wintsën yë'ë ojts tyajmëtä'äky yë nyaax kyajpn ma Benjamín ja'ayëtyën. Yë Benjamín ja'ayëty jä'ä ojts jä'ä xëëw y'ooktë, i'px mëkoxk mil ja mëko'px.

³⁶ Komjeky yë Benjamín ja'ayëty ojts tja'ijxnëtë ko tamtëm ënety tyëkooynyëtë. Yë Israel ja'ayëty nëkoopë ojts je'eyë twinkääkëtë ja Benjamín ja'ayëty. Je'eyë ënety nëkoo të kyä'äktë, Jä'ä ko tëë tnijawëtë ko ja ja'ayëty jampë yu'utsy yajpaatën kopkpëky ko tnitëkëja'antë ja kajpn.

³⁷ Ya'atë ja'ayëty ajotkumonë ojts tnitëkëtë yë Guibeá kajpn, ojts tëkokyë tyaj'o'kta'atë ja ja'ayëty japë ënety kyukajpn'atën.

³⁸ Ja ja'ayëty jampë yu'utsy yajpaatën kajpnpë'am, tëë ënety nyäkyajpxëtë mëët ja myëku'uktëjkëty ko ja jëënjok mëët nyätyuk'ëwaanëja'anëtë ko ënety ja kajpn të tnitëkëtë.

³⁹ E ko ënätyë ja Israel ja'ayëty t'ixtë ja jëënjok jam pyëtsimy kajpnjotm, ënät tniwinpijtë ja Benjamín ja'ayëty. Yë Benjamín ja'ayëty ojts tyaj'o'kojtë ja Israel ja'ayëty i'px majk, ja Benjamín ja'ayëty jëtu'un tjëjp'ijxtë tëë yowë myëtakojnëtëpë, tä më''ëka'any myëtaktën.

⁴⁰ E ko y'ijxwinpijtë ënät t'ijxtë ko yajxon jam ja jëënjok pyëtsëëmnë kyajpnjotmëty ets ja jëën yajxon yä'änë këjxmpaat.

⁴¹ Ënet ojts ja Israel ja'ayëty tniwinpijnëtë ja Benjamín ja'ayëty, yajxon mëët tsyiptuuntë; ja Benjamín ja'ayëty jëtu'unyë kyujo'ptaaytyë mëët ko t'ijxtë ja ëyo'on mëti'ipë ënety tukëtakëtëpën.

⁴² Ënet tkukäktääytyë ja Israel ja'ayëty jamtsow ma ja të'ëts'itjotmën, e oy jyakäktë ka'ap ojts tjëkyepy ma nyëjkxtëty, jä'ä ko ja Israel ja'ayëty mëti'ipë tso'ontëpën jam kajpnjotm jä'ä tu'u'ëtujkëtëp ets yaj'ookëtë.

⁴³ Yë Benjamín ja'ayëty jëtu'unyë nyatujktaaytyë mëët yë Israel ja'ayëty, oy ma jyanëjkxtë yajpaja'ajtë jampaat ets wa'ats y'o'ktaaytyë mëti'ipë tso'ontën jam Menuhá ets jyakäktë jampaat Guibeá.

⁴⁴ Jëtu'un ojts ja Benjamín ja'ayëty y'ooktë, jä'ä nyiwinë'ajtë majkmokx tëkëëk mil.

⁴⁵ E ja wiinkëtypë poj'am ojts wyimpitë ets kyäktë jamtsow të'ëts'itjotm, jam ma tsaatunjotmën mëti'ipë yajtijpën Rimón; ja mëti'ipë jam naskäkëtyën jä'ä y'o'ktë nimëkoxk mil, ëpëky ojts tjaakyaj'o'ktëpë mäjtsk mil mëti'ipë ja Israel ja'ayëty jëkämpaat pyaja'ajtën.

⁴⁶ Ja Benjamín ja'ayëty mëti'ipë o'ktën jä'ä xëëw, jä'ä nyiwinë'ajtë i'px mëkoxk mil, aakjä'ä ja tsiptuunpëtëjkëty mëti'ipë tsip'ixëtyën.

⁴⁷ Ets ojts kyäktëpë nitëtujk mëko'px jamtsow të'ëts'itjotm, jä'ä ojts jam yu'utsy y'itë taxk po'o ma ja tsaatun txëëwatyën Rimón.

⁴⁸ Ja Israel ja'ayëty pyatë ja Benjamín ja'ayëty ets tyaj'o'ktaaytyë; oymyëti'ipë kajpnëty, ja ye'etyëjktëjk aak tsujkn mëët tukyaj'o'ktaaytyë. Näyjyëtu'un ja jyëyujk tsyajpkaajëty ets wä'än timmyëti'ipëty, ja kyajpnëty aak ojts tyajnitooytya'atë.