Jueces 2 - Biblia Dc en Mixe de Quetzaltepec

Ja Wintsën ja kyukäjpxy mëti'ipë nänyikëxë'kën jam Boquim

¹ Ënet ojts tu'uk yë Dios yë kyukäjpxy jam tsyoony Guilgal ets ojts nyijkxy Boquim, jam t'ënëmaay ja Israel ja'ayëty: Ëjts miits të njuutë jap Egiptë ets yaa të nyajmintë ma ya'atë it naaxwiinyëtën mëti'ipës ojts ja m'ap m'ok ntukwinwanëtën: Ja käjpxytyu'unën mëti'ipë të ntu'unëmën ka'ap ja nijëna'a nyaj'atëkoyä'änyës,

² këtiipë mëët oy tii aaw tii ayuk xymyëët'atëty yë ja'ayëty mëti'ipë jam tsënaaytyëpën, ni'ikyë xyajkutëkooytya'atëty yë wyintsë'këntyaknëty. E miitsëty ka'apës xymyëmëtoowtë, wiinkjaty m'ëtëtstë.

³ E paaty tyam n'ënëëmëtë ko ka'apës tääpë kajpn nyajpëtsëma'any ma miitsëtyën, yë'ëjëty mëët yë tyiosëty nëjkxëp m'atsipëtë.

⁴ Ko ja Dios ja kyukäjpxy kyajpxtaay ënät ja Israel ja'ayëty tyëjkëtyë yaxpë.

⁵ Paaty tyajxëëwpäjtë tääpë ja it naaxwiinyëtë Boquim, jam ojts yë Wintsën wyintsë'kën tmo'otë.

Ma ja Josué y'o'knën

⁶ Ko ja Josué ojts nyäjyëkajpxënë ma ja Israel ja'ayëtyën, ënät nyëjkxtaaynyëtë maajaty ja nyaax kyajpn ënety të tyuka'ajëtën.

⁷ Ma Josué jyuuky'äjtyën ojts yë Israel ja'ayëty oy Wintsën tmëtuntë ets näjyëtu'un mapaat jyuukyajtën yë mëjja'aytyëjkëty mëti'ipë ënety mëët ja Josué të yajpaatën ets mëti'ipë të t'ixtën ja Wintsën ja myëj'ajtën.

⁸ E ko ja Josué ojts y'o'knë ma ënety ja jyëmëjnën mëko'px ja majk.

⁹ Jam ojts tyajnaaxtëkëtë ma ja nyaax kyajpnjotmën mëti'ipë xyëëwajtypyën Timnat-sérah mëti'ipë yajpatpën anëkëjxytsyow ma ja it naaxwiinyëtë txëëwatyën Gaas, ja kopkjot mëti'ipë yë Efraín ja jyä'äy nyitënaaytyëpën.

¹⁰ Ja Israel ja'ayëty mëti'ipë ënety mëët ja Josué tu'ukyë të jyuuky'atën ojts y'o'knëtë. Jëtu'un'äämyp ja ja'ayëty mëti'ipë ojts ok myintën naaxwiinyëtë ka'ap ojts näjyëtu'un tnijawëtë Wintsën ets ja myëj'ajtën mëti'ipë ënety të tuny të tkäjpxyën ma ja Israel ja'ayëtyën.

Ma ja Israel ja'ayëty ka'ap ja Wintsën y'ëkmëj'ijxnëtën

¹¹ Ja yu'unënëty kyajpxënëty ja Israel ja'ayëty wiink ojts ja Dios t'ixy, jä'ä ko ojts wiink ja tios tpanëjkxtëjkënyëtë mëti'ipë tyijtëpën Baal.

¹² Ojts t'ëxmajtsnëtë ja Wintsën ja Tyiosëty ja y'ap y'okëty mëti'ipë ënety jap të yajpëtsëmëtën Egiptë. Ets ojts nyätyukë'ëtëjkënëtë ja ka'apë tyiosëtyën ets t'ëwtajnëtë, jëtu'un'äämpyts ja Wintsën tyajjoot'anpëjktë.

¹³ Ojts t'ëxmajtsnëtë ja Wintsën mëët ko ja wiink tios ojts tpanëjkxtëjkënyëtë tä ja tiosën mëti'ipë tyijtëpën Baal ets ja Astarté.

¹⁴ Paaty ojts yë Wintsën mëk tukjoot'anpëky yë Israel kajpn ets tyajkutujky ets ja mä'tspë ëxëëk tyunëtëty ets tpëjkta'ajëty tiijaty ënety myëët'ajtëpën ets ëxëëk tyuunëtë ja myëtsipëty mëti'ipë ënety jam mëwinkon'ajtëtëpën.

¹⁵ Ko ijty jyatsoontë tsiptuunpë je'eyë nëjkx ëxëëk o'ktëy jyatë kyëpätë ets nimay y'ooktë tyëkoytyë, ka'ap myëta'aktë. Jä'ä ko ja Wintsën ka'ap ënety y'ëkputëjkënëtë, jëtu'un tä ënety të t'akäjpxyën. E ko ja Dios t'ijxy ko ja Israel ja'ayëty o'ktëy jyatë kyëpätë,

¹⁶ ojts twin'ixy tu'uk mäjtsk yë ja'ay mëti'ipë tsip'ixëtyën ets ja naax kajpn tu'uwinwowtëty ets tnitsiptunëty ma o'ktëy ja myëtsiptëjk tyunëtën.

¹⁷ E ja Israel ja'ayëty ka'ap ojts tuntë këwentë ya'atë ja'ayëty mëti'ipë tsiptuuntën, je'eyëm ojts ja wiink tios tpanëjkxtëkëtë ets t'ëwtatë, t'ixtijtë jëtu'un mëti'ipë juuky Tiosën ets mëtëyën. Ja y'ap y'okëty oy ojts ja Wintsën oy tjamëtuntë, yë'ëjëty ka'ap ja y'ënä'ämën tyiyajtën ojts tuntë këwentë.

¹⁸ Xëmë ko ënety ja Wintsën twin'ixy tu'uk ja ja'ay mëti'ipë tsip'ixyën ets twinye'eyëty ja naax kajpn, pyutëjkëp ijty ets ja Israel ja'ayëty yajnitsiptuntë këtiipë o'ktëy ja myëtsip tyunëtëty. Jä'ä ko ja Wintsën myëtoopy ënety ko ja Israel ja'ayëty jyë'ëtë ya'axtë ko ja myëtsiptëjkëty o'ktëy yajjat yajkëtpäjtëtë.

¹⁹ E ko ja ja'ay y'o'knë mëti'ipë ënety tsip'ixyën ets tëë ja nyaax kyajpn twinye'ey ënätyë ijty jatëkok ja wyinma'any tyajtëkoytyë ets ni'ik o'ktëy winë tuntë këtiinëm ja y'ap y'okëty, t'ëwtatë ja wiink tios ets tmëtuntë. Ninu'un ënety tkatimy'ëxmatstë ja y'ëxëëktu'un y'ëxëëkkajpxënëty ets ja y'ëxëëkjot y'ëxëëk winma'anyëty.

²⁰ Paaty ojts ja Wintsën tukjoot'anpëky ja Israel kajpn ets y'ënäny: Ya'atë ja'ayëty je'eyë nëkoo tyajma'aty yë nkäjpxytyu'unënës mëti'ipës ntuunën mëët yë y'ap y'okëty ets ka'apës xymyëmëtowa'antë.

²¹ Paatyës ka'ap nimëti'ipë kajpn n'ëkyajkutëkoyanë mëti'ipë yajpatëpën ma yë'ëjëtyën mëti'ipë ojts yë Josué tyajwë'ëmyën ma ënety jyuuky'ätynyëmën.

²² Ja Dios jä'ä ënaty jya'ixäämpy pën ja Israel ja'ayëty pyanëjkxtëp oy ja Wintsën ja nyë'ë'aaw tyu'u'aaw, jëtu'un tä ënety ja y'ap y'okëty të y'itën.

²³ Paatykyëjxm yë Wintsën ka'ap ojts ënätyë yë naax kajpn tyajkutëkoy mëti'ipë ja Josué yajwë'ëmën.