Jueces 19 - Biblia Dc en Mixe de Quetzaltepec

Ja Leví ets ja mëmäjtskpë ja tyo'oxytyëjk

¹ Jä'ä xëëw jä'ä jëmëjt ma ënety ja Israel ja'ayëty ka'ap tmëët'atënëm yë yajkutujkpë, tu'uk yë Leví ja'ay jam kyukajpnëty ma ja naax kajpnën, ma Efraín ja jyä'äy tnitänën. Ojts tu'uk yë to'oxytyëjk mëët nyäpyuwa'akëty mëti'ipë jam kukajpn'ajtpën Belén ma Judá ja jyä'äy tnitänën.

² E ja to'oxytyëjk ojts tukjoot'anpëky ja nyiye'etyëjk ets jam tsyo'ony, jam ojts nyijkxy ma ja tyeety ja tyëjkën jam Belén. Tëë ënety taxk po'o nyäxy,

³ ko ja Leví ja'ay nyimiinë ets wyowa'anyë jatëkok, ja to'oxytyëjk ojts oy t'ëxajë ja nyiye'etyëjk. Ja Leví ja'ay ojts twoy tu'uk yë tyuunpë ets jyämyëët'ajtë.

⁴ Näyjyëtu'un ja to'oxytyëjk ja tyeety ojts tyajja'ajtä'äky ja myë't ma ja tyëjkën akujk jotkujk. Ja Leví ja'ay ets ja tyuunpë tëkëëk xëëw ojts jam wyë'ëmtë ma ja to'oxytyëjk ja tyeety ja tyëjkën, oy tsuj jam kyääytyë y'uktë ets myaatë pyo'kxtë.

⁵ Ko myajktaxk xëëwpejty tsojk ojts pyëtë'ëktë ets tsyona'antë. E tim tso'onëtëpts ënätynyë ko ja to'oxytyëjk ja tyeety t'ënëmaay ja myë't: Kay wäänë ets mëjaawtëkëty, tääts akujk jotkujk mnëjkxëty.

⁶ Ënet nimäjtskëty ja pyu'uy yajmooytyë ets nyaaxwä'tstë kääpyë ukpë, tääts y'ënëmaayëtë ja to'oxytyëjk ja tyeety ets jyaakwë'ëmtëty ja tu'ktsuujën.

⁷ Ja Leví ja'ay ojts jyatimwyä'ätsë'knë ets tsyonanë jam, ja myë't ni'ikyë jyänty y'ënä'äny ets wyë'ëmëty.

⁸ Kommëkoxk xëëw, ja Leví ja'ay ju'unëm ojts pyëtë'kojy ets nyäjyëjp'ijxë ets tsyoonanë, e ja to'oxyëjk ja tyeety mëktä'äky ojts jatëkok y'ënë'ëmxëty ets kyäytyëty jëyëjp ets nyëjkxtëty ets myëjaawpëktëty tääts akujk jotkujk nyëjkxtëty; tääts tyëjkëtyë kääpyë ukpë, jëtu'un ojts pyoxnëtë.

⁹ Ko ja Leví ja'ay ojts pyëtë'knë ets tsyonanë mëët ja tyo'oxytyëjk ets ja tyuunpë, ja myë't ojts jyaakënë'ëmxëty ko tsu'ujënyëp ënätynyë nëkoopë tsyoontëty, tiits jaakwë'ëmtëp jeexyë ja tu'ktsuujën ets komjëpomnën mnëjkxtëty.

¹⁰ Ja Leví ja'ay ka'ap ojts t'ëkkupëjknë wyë'ëmëty tu'ktsuu. Ënet ojts jam tsyo'onë mëët ja tyo'oxytyëjk, mëët ja tyuunpë ets nimäjtsk ja jyëyujk mëti'ipë tyuk'u'unyääytyëpën. Ko jyajtë Jebús mëti'ipë tyam yajtijnëpën Jerusalén,

¹¹ ënät ja tyuunpë y'ënëmaayë ja Leví ja'ay: ¿Wintsën, wi'ix mijts m'ënaanpë? Tää jeexyë yë tsuu nyajnajxëmë ma ya'atë kajpnën ma Jebús ja'ay tsyëënëtën.

¹² Të ja Leví ja'ay y'ëtsooy: Ka'ap, ka'ap tjëkyepy yaa nmaawë'ëmëty pën ka'ap y'Israel kajpnëty. Ja'amtë, tsojk mtu'uye'eyëmë koonëm jam nja'ajtmëty Guibeá,

¹³ jam jyëkyejpy nmaataknpëjkmëty oy jyamëty Guibeá ëkë Ramá.

¹⁴ Paaty ojts tyu'uye'eytyë, ko ja xëëw ojts tyun'awä'tsnë, tëë ënety jam jya'ajnëtë Guibeá ma ja kajpnën mëti'ipë yë Benjamín ja jyä'äyëty nyitënääpyën.

¹⁵ Ënet ja tyu'u ojts tjëjpye'eytyutnëtë ets nyëjkxnëtë Guibeá ma ënety ja tsuu tyajnaxa'antën; tä ja Leví ja'ay jam nyaaxwe'tsy kajpntum, jä'ä ko ni pën ënety ja ja'ajtakn kyamo'oyë.

¹⁶ Tëë ënety ja Leví ja'ay jam jeky y'ëwxijnë, ko janty po'oxy nyajxnën tu'uk yë mëjja'ay, jam tsyoony kyamjotm. Ya'atë mëjja'ay jam ënety kyukajpnëty ma nyaax kyajpnën yë Efraín ja jyä'äyën, ma ja Guibeá kajpnën, je'eyën ënety jam y'atsëëënë, jä'ä ko yë Guibeá ja'ay yë'ë ënety nyitënääpy yë Benjamín ja'ay.

¹⁷ Ko ja mëjja'ay t'ijxy tu'uk ja tu'uye'epyë jam y'u'unyë, tä tyajtëëy: ¿Maatën mtsoony ets maatën mnëjkxy?

¹⁸ Tä ja Leví ja'ay y'ëtsooy: Najxtëp ëëts je'eyë, jamës ntsoontë Belén ma kajpnën mëti'ipë yë Judá ja'ay nyitënääpyën, e jamës nëjkxtë jëkäm ma ja kopkjotmën mëti'ipë yë Efraín ja jyä'äy nyitënääpyën maas ëjts ntsëënën. Jamës Belén mäjtsk tëkëëk xëëw të npo'oxy, tyam winpijnëpës maas yë ntëjkën, e yaatsës njayajnaxa'any yë tsuu ets ka'apës pën xyajja'ajtä'äky.

¹⁹ E ëëtsëty nmëët'ajtëpës yë nyujkjë'kxyëty ets näjyëtu'un yë ka'ayën ukën mëti'ipë ëëts ni'ijtëpën, yë nto'oxytyëjkës ets ntuunpës, ka'apës nitii xytyëkoy'ajtxëtë.

²⁰ Tääts ja mëjja'ay y'ëtsooy: Akujk jotkujk timnäyjyawët. Ëjts nija'ap tiijës yam ntuunpy ets ka'ap tii mtëkoy'ajtxëtëty. Ëjts ka'apës n'a'ixë ets miitsëty yaa muum yë tsuu xyajnaxtëty tu'ujoty.

²¹ Ja mëjja'ay ojts tyajnëjkxy ja tu'uye'epyë ma ja tyëjkën, ja tu'uye'epyëty tap ja ënety kyë'ëpuj tyekpyujtu ets kyäytyë y'uuktë, ko ja mëjja'ay ja jëyujk jap näjyëtu'un tyajjë'kx.

²² Jää ma ënety jap jotkujk yajpaatën, jää ojts myintë yë ja'ayëty jampë kyukajpn'atën ets tyajnatujktë ja tëjk, tää t'ënëmaaytyë ja mëjja'ay mëti'ipë kutëjk'ajtpën: Juut tääpë ye'etyëjkëty mëti'ipë të xyaja'ajtä'äkyën. Wä'änës mëët t'ëko'knëtë.

²³ E ja kutëjk mëktä'äky ojts myënu'kxta'akëtë ets y'ënëmaayëtë: Mëku'ukëty, tuntë mëyajtën, këtii jëtu'unpë ëxëëk winma'any xypyaatë, yë'ë ntëjk'ëye'epyës yë'ë, këtii xytyuntë ka'apë tyuunpëtyën.

²⁴ Ëk'ixtë, nikajpxtë pën to'oxytyëjk mtsojktëp, tapës tu'uk yë nnëëx mëti'ipë ka'ap yë ye'etyëjk tmëët'atynyëmën, tyam nmo'otëty ets miits ixtë wi'ix xytyuna'antë. E mëëtpë ja ye'etyëjkëty mëti'ipës xykyu'ijxëtëpën ka'ap tjëkyepy miits wi'ix xytyuntëty.

²⁵ E yë'ëjëty ka'ap ojts timy tyuntë këwentë tä ja mëjja'ay ënety jya'ëna'anyën, paatykyëjxm ja Leví ja'ay ojts ja tyo'oxytyëjk tkäjxpëtsëm tëja'p. Ets ja ja'ayëty jä'ä yajtuk'akäjxëtyë, ëxëëk ojts tuntë, ojts tyajtsëtyut tyajwintëkoytyë ets jëtu'un timy tyuktsuunajxtë. E ko t'ijxtë xyiinyënë täänëm t'ëxmajtstë.

²⁶ Xëënyënëp ënätynyë, ko ja to'oxytyëjk ojts wyimpijnë ma ja mëjja'ay ja tyëjkën, ma ënety ja nyiye'etyëjk jam yajpaatyën, je'eyë oy wi'ix jyä'äjty ets y'o'ky jam tëjk'ëkë'ëm.

²⁷ Ko ja nyiye'etyëjk ojts pyëti'iky ets tyaj'ëwatsy ja tëjk'aaw, ënät tuk'ijxpejty ja tyo'oxytyëjk jyëpijpnë naaxkëjxy ma ja tëjk'aawën.

²⁸ Ënet y'ënëmaay: Pëtë'ëk ets ja'amënë. E ja to'oxytyëjk ka'ap ojts y'ëk'ëtsoowënë, jä'ä ko ooky ënätynyë. Të twijtsë'ky ja o'kpë ets jam jyëyujkëjxm tkëxwë'ëny ets jëtu'un ojts tmënëjkxy ma ja tyëjkën.

²⁹ Ko jyä'äjty ma ja tyëjkën, ënät ojts ja o'kpë tsujktä'äky, majkmäjtsk tsuky ets ojts tyajwä'kxy ets tkäjxwa'kxtaay maajaty ja Israel kajpn yajpaatyën.

³⁰ E ko t'ijxtë ja Israel ja'ayëty ja jëtu'unpë ja nini'kx tsujktä'äkpyë, ënät y'ënantë: Maju'unëm ntso'onëmën jap Egiptë, ka'ap maa jëtu'unpë n'ijxëm. Kopkpëky ko nmëma'ay nmëtajmëty tii mëpaat ntu'unëmë mëët ya'atë të tyuny të jyätyën.