Jueces 17 - Biblia Dc en Mixe de Quetzaltepec

Ja Micaías ja tsyajptëjk

¹ Jam ma ja kopkjotmën mëti'ipë yë Efraín jyä'äy nyitënääpyën, jam ijty tu'uk yë ja'ay tsyëënë jä'ä xyëëwajtyp Micaías.

^2-3 Ojts ja tyaak tuk'ëwaanë ets t'ënëmaay: Nanë, ja meeny mëti'ipë m'antijpyën ko tëë yajmeetsy ets mëët yë'ëkyëjxn ja mä'tspë të xypyoky. Ja poop pujxn meeny mëti'ipë m'antijpyën, ëjtsës yë nmä'ts, e tyamts jatëkok nmo'oy, jä'ä ko okës të nijawë ko ja Wintsën ënety mtuknipëjkë'këp ets tu'uk xyaj'oyëja'any yë awinax oytyuny mëët yë poop pujxn. Ko ja poop pujxn meeny tkë'ëyäjky, ënät ja tyaak janty jotkujk nyäjya'awëyë ets mëk yujk'ënany: Dios mkënu'kxëtëp mëjwiin këjää u'unk maay.

⁴ Ko yë Micaías tmooy yë tyaak ja poop pujxn meeny, yë tyaak ojts tukë'ëtëky mäjtsk mëko'px ja poop pujxn meeny, tu'uk yë poop pujxn'oytyuunpë ets tyajkojëty ja awinax oytyuny yajxon ets tuknikoyëty yë poop pujxn, ko kyojtaay jap ojts tpëjktä'äky ma ja Micaías ja tyëjkën.

⁵ Micaías myëët'ajtyp ijty tu'uk tëjk ma Dios t'ëwtatyën. Ojts tu'uk yë wit t'oytyuny mëti'ipë ja teety pyëjktaktëpën, kanaakpëky yë tios tyajmëjnajxy, tu'uk ja myaank tuknipëjky ets tyeety'atëty.

⁶ E tëëyëp yë Israel ja'ayëty ka'ap ënety yë yajkutujkpë tmëët'atënëm, paaty ijxtëm ja wyinma'any timpyaatën jëtu'un winë tuntë.

⁷ Jam Belén jam ijty tu'uk tsyëënë yujkyeeky'ëna'k, Judá jyä'äy, Leví y'u'unk y'ok.

⁸ Ya'atë yujkyeeky'ëna'k ojts jam tsyoony Belén ets ojts nyijkxy wiinktsow, t'ixta'ay ma y'ëktsënaaytyaknpëkëty. Ko jam jyä'äjty ma kopkjotmën mëti'ipë yë Efraín nyitënääpyën, jam ojts jyajtä'äky ma ja Micaías ja tyëjkën.

⁹ Ets yajtëëwë ¿Maaxëtëm mtsoony? Jam Belén. Jëtu'un y'ëtsooy ja yujkyeeky'ëna'k. Leví ja'ayës, yë'ëjës yë it naaxwiinyëtë n'ixtääpy maas n'ëk tsënaaytyaknpëkëty.

¹⁰ Yaa mtsëënëty, mëët ëëtsëty. Jëtu'un ja Micaías y'ënäny, ets mijts yaa mtunëty teety ets jëtu'un njawëty tä jeexyë mijts nntimtyeety'ätyën. Nmëjuyëp näjyëtu'un, majk yë poop pujxn meeny ntukmëjuyëty tu'kjëmëjtpë, ëpëky nyajkay nyaj'uukëty ets nmo'ojëty yë mwit mtujkxy.

¹¹ Ja Leví ja'ay ojts tkupëky ko jam wyë'ëma'any ma ja Micaías ja tyëjkën tsënääpyë ets jëtu'un yë Micaías jya'awëyë tä jeexyë y'u'unk'atyë myaank'atyën.

¹² Micaías ojts yajnaxyë teety ets jëtu'un ojts jam wyi'imy tsënääpyë.

¹³ Tääts ja Micaías ojts myäy tyäjy ko ja jyëën tyëjk ets ja jyuukyajtën jëjp'ixy ënety tmëët'ajnë ja Dios ja kyënu'kxën, jä'ä ko yë'ë ënety jam teety'ajtp ma ja tyëjkën tu'uk yë Leví ja'ay.