Jueces 14 - Biblia Dc en Mixe de Quetzaltepec

Ma ja Sansón pyikyën

¹ Tëkok ojts yë Sansón nyijkxy jam ma tu'uk yë kajpnën mëti'ipë xyëëwajtypyën Timnat ets t'ijx jam tu'uk yë to'oxy'ëna'k janty'oy janty tsujpë mëti'ipë filistejë ja'ayën.

² Ko wyimpijty ma tyëjkën ënät yë tyeety tyaak tukmëmëtyäky ets t'ënëmaay: Tuntë mëyajtën ntsojkpyës ets xytyuknipëjktaakëtëty. Ëjts pëkäämp ukaanpës mëët tu'uk yë to'oxytyëjk filistejë ja'ay jampës të n'ijxyën Timnat.

³ E yë tyeety tyaak jëtu'un y'ëtsoowtë: ¿Wi'ix ko jam muum yë to'oxytyëjk xy'ixta'ajaanpë ma filistejë ja'ayëtyën ka'apë yë Dios t'ëwtatën? ¿To'oxytyëjk jëtää yaa ka'ijtpë ma mëkunaax mëkukajpnënë? Yë Sansón y'ëtsooy: Tääpë kiixy yë'ëjës jëtu'un të ntsojkën'aty ets yë'ëjës mpëkäämpy.

⁴ Ja tyeety tyaakëty ka'ap ënety tnijawëtë pën Tiostëm ënety jëtu'un të tuknipëjktaakë ets ja Sansón jëtu'un myäyëty tsyajëty ets ja winma'any jëtu'un tpaatëty, t'ixta'ay wi'ix ja filistejë ja'ay t'ëknipëtë'ëkëtyën mëti'ipë ënä'ämtëpën ma Israel ja'ayëtyën.

⁵ Paatykyëjxm yë Sansón ojts tsyoontë mëët ja tyaak tyeety ets ojts nyëjkxtë jam Timnat. Tam ënety yë Sansón jyajnë kajpntum ko tu'uk yë mëj kaa nyipëtsëëmë jam ma tu'uk yë tsatym kyamën ets nyipëtë'kë.

⁶ Ënet yë Sansón tyuktëjkëyë yë Wintsën yë myëk'ajtën, kë'ë'am ojts ja kaa twäjxtakta'ay, jëtu'un tä jeexyë tyaj'ookyën yë tsajppax; je'eyëp ko ka'ap ja tyaak tyeety tuk'ëwa'anëy mëti'ipë ënety të tyuny të jyätyën.

⁷ Tä ojts nyijkxy ma ja kiixy tsyëënën ets mëët myëtyäky.

⁸ Tëë ënety mäjtsk tëkëëk xëëw nyäxy ko jatëkok wyimpijty ets pyëka'any mëët ja kiixy. E tamts ënety jëtu'un tyu'uye'ey ko ajotkumonë ojts jyotja'tëty ja kaa ooky, ënät ojts jam tnikuye'eynyäxy; ko tpaty ja kaa ooky tää t'ijxy ko ma ja kaa ooky ja jyotën Cerë jëyujk jap mayjyajtëp ets mëët ja pya'ak.

⁹ Tääts tnikuxajëy ets tu'uk mëjkë'ëy tkëëypyëtsiimy ja uuxpa'ak, tää jatëkok ja tyu'u tpëjky ets tu'ktu'u tjanty jyi'kxy ja uuxpa'ak. Ko ja tyeety tyaak tpaty ënät ojts ja uuxpa'ak tmo'oy ets tjë'kxtë, yë Sansón ka'ap ojts ja tyeety tyaak tuk'ëwaanë ma ënety ja uuxpa'ak të tyajpëtsëmyën.

¹⁰ Ja Sansón ja tyeety ojts jam nyijkxy ma ja kiixy ja tyeety tyaakën ets yaj'amëtooy ja kiixy ets pyëktëty. Ënet ja Sansón tu'uk ja xëëw tnipëjktakëy jä'ä ko jëtu'un ënety ja ëna'ktëjk jam tuunk'atë.

¹¹ E komë yë filistejë ja'ayëty tsyë'këtyëp ënety yë Sansón, ënät ojts ni''ipxmajk nyäwyoomukëtë ets nyëjkxtë jam ma ënety ja Sansón ja xëëw të tnipëjktaakën.

¹² Ya'atë ni''ipxmajkpë ja ëna'ktëjkëty, ojts yë Sansón y'ënë'ëmxëty: Tyam tu'uk yë najtsja'apë mëtyä'äky ntukmëmëtya'aka'antë. Pën mnajtsja'awëp ma ënety ya'atë xëëw wyëxtujk xëëwpetyën, nitu'ukjaty nmo'otëty tu'kni'kx yë wit mëti'ipë ja'ay myëxëëw'ijxypyën ets tu'kmëjye'epy yë linë wit.

¹³ E pën kajts xynyajtsjawë nitu'ukjaty miitsëty nëjkxëpës këëktu'uk xymyo'otë yë wit tu'kni'kx mëti'ipë yë ja'ay myëxëëw'ijxypyën ets tu'kye'epy näjyëtu'un yë linë wit. Ets ojts ja ëna'ktëjk y'ëtsowtë: Nikajpx mëti'ipë mnikajpxäämpyën, tyam ëëts nmëtoow'itë.

¹⁴ Tä ja Sansón ojts tnikäjpxy ja ayuk mëti'ipë ënety tyuknasjawëjäämpyën ja ëna'ktëjkëty: Mëti'ipë ënety tsu'tspën, tsu'utsy të y'awinpity; mëti'ipë ënety mëkën, pa'akwijtsnë të y'awinpity. Ko tyëkëëkxëëwpejty ka'ap tnija'awëtyë wi'ix t'ëtsowtëtyën ja ayuk.

¹⁵ Paaty ojts tninëjkxtë ja Sansón ja tyo'oxytyëjk ma tyaxkxëëpetyën ets t'ënëmaaytyë: Ënëëmë yë mniye'etyëjk ets tnikajpxëty tiitën jyatijäämpy. Jä'ä ko pën ka'ap tnikäjpxy mnitoyëp yam mijts ets näjyëtu'un yë mteety mtaak. Jëtu'un yajja'akyukë ko je'eyë yowë yajxon të xynyimay të xynyitajëtë ko yaa xywyowa'antës ets xypyëjkëja'antës mëti'ipës njä'ä'ajtëpën.

¹⁶ Ënet ja kiixy ojts tninëjkxy ja Sansón ets jëëpy yaxp t'ënëmaay: Mijts ka'apës xytsyoky. Mijts xy'ëxëëk'ijxptëmës yë'ë. Paaty ya'atë ayuk të xymyo'oy yë nmëkunaax nmëkukajpnës mëti'ipë nyajtsjawëtëpën ets mijts ka'apës xytyuk'ëwaanë tiitën mjatijäämpy. Ets ja Sansón y'ëtsooy: Ni nteety ni ntaakës të nkätuk'ëwaanës ets miits njaaktuk'ëwaanëtyë.

¹⁷ E ja kiixy jëtu'un ojts jam yajpaaty ma ja Sansónkën jëëpy yaxp winjëpom, koonëm wyëxtujkxëëwpejty ja xëëw, tääts ojts ja Sansón t'ëwa'anënë ja tyo'oxytyëjk ko mëktä'äky yajtëëwënë ja nyi'ëtsoowinpijtën, ja ayuk mëti'ipë yajnajtsjawëjaanpën. Ko ja kiixy tnija'awëy ja ëtsoowinpijtën, ënät ojts tuk'ëwaanë ja myëkunaax myëkukajpn.

¹⁸ Kom wëxtujk xëëw ma ënety jam kyëta'akanën ja xëëw, ënät ojts ja filistejë ja'ayëty tninëjkxtë ja Sansón ets t'ënëmaaytyë: Ko nitii jëtu'un kyapa'akëty, tä yë cerë pa'akën, ets katii jëtu'un kyamëkëty tä yë kaajën. Tae ja Sansón y'ëtsoowëtë: Mëët yë'ë ko të xyajyu'utë mëti'ipës ntsajpkaa'ajtypyën, paatykyëjxm të xynyijawëtë ja ayuk wi'ix xynyi'ëtsowtëtyën.

¹⁹ Ënet ja Sansón ojts ja Wintsën ja myëk'ajtën tyukëtä'äkyë, ets ojts nyijkxy jam Ascalón, i'px majk ja ye'etyëjk ojts tyaj'ooky ets ja wyit tpëjkëtyääy mëti'ipë ënety myëët'ajtëpën. Ja wit yë'ë ojts tmo'oy ja ëna'ktëjkëty mëti'ipë ja ayuk të tni'ëtsowtën mëti'ipë yajnajtsja'apën. Ko jam tsyo'ony tä ojts nyijkxy ma ja tyeety tyaakën.

²⁰ Ja tyo'oxytyëjk yë'ë ojts yajkë'ëmo'oy tu'uk ja myëku'uk mëti'ipë ënety oy mëët nyäjyawëtyën.