Jueces 13 - Biblia Dc en Mixe de Quetzaltepec

Ma Sansón myëxu'unk'atyën

¹ Yë Israel ja'ayëty ojts jatëkok ja jyot wyima'any tyajtëkooykyojnëtëpë ets ëxëëkjaty winë tuuntë Dios wintum, paaty ojts yë Wintsën tyim'ijxmatsëtë ets ëxëëk tyuunëtë yë filistejë ja'ayëty wëxtyikxy jëmëjt.

² Jam Sorá, ma tsyëënëtën yë ja'ayëty mëti'ipë yë Dan jyä'äy'äjtypyën, jam ijty tsyëënë tu'uk yë ja'ay mëti'ipë xyëëwajtypyën Manoa. Yë tyo'oxytyëjk ka'ap ijty nitu'uk yë u'unk maay tmëëtëty, jä'ä ko ka'ap ënety tjëkyepy y'u'unk'ixëty.

³ Ënet ojts tëkok tu'uk yë Wintsën kyukäjpxy nyikëtä'äkyë ets y'ënëmaayë: Mijts ka'ap të tjëkyepy yë u'unk maay xypyaatëty xy'ixëty, e tyam yë'ëts yam ntuknijawëjäämpy ko mijts mpatäämpy m'ixäämpy tu'uk yë u'unk maay.

⁴ Tii tëy mtunëp këtii xy'uukëty yë tsatym nyëë, këtii xy'uukëty nitii nëë mëti'ipë mëkën ets ni yë'ë xykyajë'kxëty tii tsatym nyëë mëti'ipë ëxëëk yajpatpën.

⁵ Jä'ä ko ja u'unk mëti'ipë myajminäämpy myajja'täämpyën naaxwiiny, jä'ä nëjkx yajtijy nazareo ma Tiosën, yë'ë Dios myëtunäämpy ets ka'ap nëjkx yë kyuwaay yajkeepy; jëtu'un'äämpy nëjkx tyaj'ëwaatsëpëtsëmy yë Israel kajpn ma filistejë ja'ayëty ëxëëk tyunëtën y'ënë'ëmxëtën.

⁶ Ënet ja to'oxytyëjk ojts nyijkxy ma ja nyiye'etyëjkën ets tukmëmëtyäky: Tu'ukës yë ye'etyëjk të xynyiminy, Dios yë tyuunpë, jëtu'unyës të ntimwyi'imy koos të nwinku'ixë, jëtu'unës të n'ixy tä tu'uk yë Wintsënën kyukäjpxyën. Ka'apës të nyajtëy tii xyëëwajtyp ets ni yë'ë të xykyatuk'ëwaanës.

⁷ Mëti'ipës tëy të xytyuk'ëwaanën yë'ë ko nmëët'atäämpyëkës tu'uk yë u'unk maay ets ka'apëkës mëpaat n'uuky yë tsatym nyëë ets oy tii nëë mëti'ipë mëkën; ni nkäjë'kxëtyëkës tii mëti'ipë ëxëëkën ëkë ka'apë kyënu'kxëtyën, jä'ä ko ja u'unk mëti'ipës nyajja'täämpyën yë'ë ja Dios nyiwa'anäämpy ets nazareo nëjkx y'ity jëtu'un tyimmëxu'unk'atëty ets jëtu'un nëjkx y'ooky.

⁸ Ënet yë Manoa ojts tmëpëjktsoy yë Wintsën ets t'ënëmaay: Wintsën, tyam mijts n'amëtoy npëjktsoy ets xytyunëty yë mëyajtën xykyäxëty jatëkok ja ye'etyëjk ma ëëtsëtyën ets xytyuk'ëwaanëtyës tiijës mëpaat ntuntën mëët ja u'unk maay mëti'ipë mëxu'unk'ataanpën.

⁹ Dios ojts tjanty y'ëtsowinpity ja Manoa ja pyëjktso'owën, ojts ja Wintsën ja kyukäjpxy nyänyikëxë'ëkyë ma ja Manoa ja tyo'oxytyëjkën, jam ënety kamjotm yajpaaty. E komë yë Manoa ka'ap ënety jam,

¹⁰ ënät ojts ja tyo'oxytyëjk pëyi'ikyë nyinëjkxyë ets y'ënëmaayë: Ëtsow, ja naaxwiinyëtë ja'ay mëti'ipës ojts xy'ëknimiinpën, tëëjës jatëkok xynyiminy.

¹¹ Tä ja Manoa ojts ënätyë tpatsoony ja tyo'oxytyëjk ets tninëjkxtë ja ja'ay, ko jam jyajtë ënät tyajtëëy: ¿Janty mijts jëtu'un ojts mëët m'ëk mëtyakpë yë nto'oxytyëjkës? Ets ja ja'ay y'ëtsooy: Jëtu'un, ëjts jëtu'un.

¹² Ënet ja Manoa y'ënäny: Ko ënety y'atëy tä të m'ëna'anyën, ¿Tii ëëts ntuntëp mëët yë'ë?

¹³ Tääts ja Wintsën ja kyukäjpxy y'ëtsooy: Yë nto'oxytyëjk yë'ë tyunëp, tëkokyë mëti'ipës të ntuk'ëwaanën.

¹⁴ Ko këtii yë tsatym nyëë t'uukëty, ets nëë mëti'ipë mëkën, jampë pyëtsimyën ma tsatymyë; ka'ap nëkooyë tii tjë'kxëty ka'apë kyënu'kxëtyën. Yi'iyë tyunëp mëti'ipës të ntuk'ëne'emyën.

^15-16 Ënet yë Manoa t'ënëmaay ja ye'etyëjk, ka'ap ënety nijawë pën Wintsën yë kyukäjpxy: Tun yë mëyajtën wë'ëm maas yë ntëjkën ets nkä'ämyëty n'ukmëty, tyamës tu'uk yë tsajppax nyaj'ooka'any. E ja Wintsën ja kyukäjpxy tyaa y'ëtsooy: Oyxyëp jeexyë njawë'ëmpës ka'ap tjëkyepy nmëëtkayëty. E pën myaj'ookäämpy yë tsajppax oy yë'ë Wintsën xytyukwintsë'ëkëty ma ja wyintsë'kën yajmo'oyën nino'okpyë.

¹⁷ Ënet ja Manoa tyajtëëy ja Wintsën ja kyukäjpxy: Tuk'ëwa'anëtëkës tiitën mxëëwajtyp ets jëtu'un ëëts mijts nja'amyätstëty ets nja'awëkyëta'aktëtyës ko ënety jëtu'un tyunyë jyätyë tä mijts tyam të xynyikäjpxyën.

¹⁸ E ja Wintsën ja kyukäjpxy tyaa y'ëtsooy: ¿Wi'ix ko xynyijawëja'any yë nxëëwës? Yë'ë yu'utsyës nmëët'aty.

¹⁹ Manoa ojts ja tsajppax u'unk tyaj'ooky ets ojts ëpëky yë aaypyajk ujtspajk tukwintsë'ëkë Dios, tä tkëxpëjky ma tu'uk yë mëjtsaajën jamts ojts tnino'oky ets jä'ä ja Wintsën tukwintsë'ëkë. Ënet ojts yë Dios tu'uk yë mëj'ajtën tyaj'ixyë mëti'ipë yë Manoa ets tyo'oxytyëjk yajjotkujktakëtën.

²⁰ Ko ja jëën yä'änë'ky jam ma ja wintsë'këntyaknën ënät ja Manoa mëët ja tyo'oxytyëjk ajotkumonë t'ijxpatë ko jap jokjoty taptëm ja Wintsën ja tsyajpjotmëtë kukäjpxy pya'tëjkënë tsajpjotm. Ënätyë ja Monoa nyäjyijtakë mëët ja tyo'oxytyëjk.

²¹ Tä ja Manoa tja'akyujkëy ko ja ye'etyëjk Wintsën ënety. Jä'ä ko ka'ap ojts nijëna'a maa y'ëkëxë'knë ni tyo'oxytyëjk ojts ma mëët kya'ëknäpyatënë.

²² Tää t'ënëmaay ja Manoa ja tyo'oxytyëjk: Tyam kopkpëky yë'ë ko ënät n'o'kënëty, jä'ä ko tëë yë Dios n'ijxëmë.

²³ E ja tyo'oxytyëjk tyaa ja y'ëtsooy: Kooxyëp yë Wintsën jeexyë xyaj'ooka'anëmë, kajxyëp të tkupëky yë wintsë'kën mëti'ipë të nmo'oyëmën, ka'ap jeexyë yë myëj'ajtën të xytyuk'ijxëmë ets ka'ap jeexyë tii të twinwanë.

²⁴ Ma ënety ja Wintsën ja kyukäjpxy të t'akäjpxyën myëxu'unk'ata'any ja u'unk, jää ojts jyänty myëxu'unk'aty ets tmooytyë ja xyëëw Sansón. Ko ye'ky pyejty ojts ja Dios mëjwiin këjää kyënu'kxyë.

²⁵ E nëjkxëp tu'kxëëw tu'kjëmëjt nyijkxy yë Sansón jam ma Dan yë y'ijtaknën mëti'ipë yajpatën itkujky ma naaxwiinyëtë txëëwatyën Zorá mëët yë Estaol, ënät ojts kyëxë'ëky yë Wintsën yë myëk'ajtën ma yë'ëjën.