Juan 7 - Biblia Dc en Mixe de Quetzaltepec

Ma ja Jesús ka'ap ja nyaax kyajpn kyupëkyën

¹ Ko jëtu'un y'ëkjajty y'ëkkëpejty, jamtsow ja Jesús jyëtijty Galilea y'itjotm. Ka'ap ojts nyijkxy Judea y'itjotm, jä'ä ko yaj'ookanëp ënety ja jutiis ja'ayëty jam.

² E jä'ä ko tyimpatyp ënety ja ujts aaytyëjk xëëw, tu'uk ja xëëw mëti'ipë ja jutiis ja'ayëty xyëëwtuuntëpën,

³ ets ja Jesús ja myëkä'äxtëjk y'ënëmaayëtë: Ka'ap yaa mwë'ëmëty, nëjkx jam Judea ets näjyëtu'un t'ixtëty yë m'ijxpëjkpëtëjk mëti'ipë yaa mtuunpyën.

⁴ Ka'ap pën tii ayu'utsy tuny pën tsyojkpy ets ja ja'ay nijawëty. Tä mijts ya'atë jëtu'unpë xytyunyën, yajnikëxë'ëk ma ja'ayëtyën.

⁵ Jä'ä ko ni myëkä'äxtëjk ja Jesús ënety kyamëpëkyë.

⁶ Ets ja Jesús y'ënëmaayëtë: Ka'apnëmës ja nxëëw tpaaty; je'eyëp ko ma miitsëtyën oyjyëna'ajëty.

⁷ Mëti'ipë ka'ap ja Dios nijawëtën ka'ap tjëkyepy miits m'ëxëëk'ixëtëty; je'eyëp koos xy'ëxëëk'ijxtëpës yë'ëjëty, jä'ä koos nnikäjpxy ko ka'ap tii oy tuntë.

⁸ Nëjkxtë miitsëty mxëëwatë; ëjts ka'apës nnëjkxa'any, jä'ä ko ka'ap ja nyixëëw tpaatynyëm.

⁹ Ko jëtu'un y'ënëmaayëtë ënät ojts jam Galilea jyaak wë'ëmy.

Ko Jesús nyijkx ma ja aaytyëjk yajnixëëwtunyën

¹⁰ Ko ja myëkä'äxtëjk ojts tsyoontë ënät ja Jesús ojts nyijkx ma ja xëëw tyunyën; je'eyëp ko ayu'utsy ame'tsyë, ka'ap y'ijxnë kyä'äxnëty.

¹¹ Ojts ja jutiis ja'ay jya'ixta'ajëtë jam xëëwjotm, ets y'ëna'antë: ¿Ma ënät tääpë ja ja'ay?

¹² May ja ja'ay nyimëtya'akëtë xiitsow yaatsow. Jënaakën y'ëna'antë: Oyjyä'äy yë'ë. Wiinkpë y'ëna'antë: Ka'ap y'oyjëtity; nëkoo ja'ay twin'ëëny.

¹³ Ka'ap pën nyikäjpxyë nikëxë'ëky mayjyä'äyjoty, jä'ä ko tsyë'këtëp ja jutiis ja'ayëty.

¹⁴ Xëëw kujkwä'kxy ja Jesús ojts nyijkx ma ja mëjtsajptëjkën ets yaj'ijxpëjktso'ony.

¹⁵ Ja jutiis ja'ayëty mëj ixy t'ijxtë, paaty y'ënantë: ¿Wi'ix jëtää ya'atë ja'ay winë timynyijawë ets ka'ap të y'ijxpëky?

¹⁶ Ënet ja Jesús y'ëtsoowëtë: Mëti'ipës ja'ay ntuk'ijxpëjkpyën ka'apës ëjts njä'äjëty, yë'ë jyä'ä mëti'ipës të xykyexyën.

¹⁷ Pën jää pën tuna'any mëti'ipë Dios tsyojkpyën, nyijawëp pën jamës ja n'ijxpëjkën tsyoony ma Tiosën, ëkë pën nkë'ëmwinma'anyës nkäjpxyp.

¹⁸ Pën yë kyë'ëm winma'any kyäjpxyp ets ja ja'ay myëjpëjktä'äkyë, yë'ë y'ixtääpy ets yajmëjpëjkta'akëty; mëti'ipë y'ixtääpyën ets yajmëjpëjkta'akëty ja mëti'ipë të kyexyën yë'ë mëtëy kajpxp ets ka'ap tjëkyepy wi'ix tëkatsy yajnimëtya'akëty.

¹⁹ Ojts mo'ojëtë ja Moisés ja ënä'ämën, ¿këtiijë? ets nitu'uk të xykyapatuntë. ¿Tiits koos xyaj'ooka'antë?

²⁰ Ets ja ja'ay y'ëtsoowëtë: Ku'oypyë mijts mmëët'ajtyp. ¿Pën yam myaj'ookanëp?

²¹ Ënet ja Jesús y'ënëmaayëtë: Ni'ëmukë miitsëty janty mëj'ixy xyjyawëtë koos ojts tu'uk ja mëj'ajtën ntuny po'kxënxëëw.

²² Oy jyapo'kxënxëëwëty, mnatsujk'ëwtijtëp ja mye'etyëjk'ajtënëty, ijxtëm ja Moisés ja y'ënä'ämën myinyën. Oy yë'ëjëty ja Moisés tkayajtso'ontäky, aptëjk ojts tyajtso'onta'aktë.

²³ E miitsëty ko xykyaninaxa'antë ja Moisés ja y'ënä'ämën, mnatsujk'ëwtijtëp ja mëxu'unk ja ye'etyëjkajtën po'kxënxëëwjoty. ¿E tiits ko xywiinkjawëtë koos nyajtso'oky po'kxënxëëwjoty tu'uk ja pa'amja'ay?

²⁴ Ka'ap tii nitsuu nipoj xypyaye'eytyëty. Mëtëy winë xypyaye'eytyëty.

Ko ja Jesús tnikäjpxy ma tsyoonyën

²⁵ Tääts ojts pënëty tyajtëwtë mëti'ipë tsënaaytyëpën jam Jerusalén: ¿Këtii yë'ëjëty ya'atë mëti'ipë y'ijxtaaytyëpën ets tyaj'ooka'antë?

²⁶ Ix jam kyäjpxy myëtyä'äky nikëxë'ëky mayjyä'äyjotm. ¿Tii ko ka'ap wi'ix nëëmëtë? ¿Wä'än jëtää yë kutuunktëjk tëë tmëpëktë ko tyiyëty ko yë'ë ja ye'etyëjk mëti'ipë Yajnitso'okaanpënë?

²⁷ E nnija'awëtëpës ëëts yë'ë maa tsyoonyën. Ko myina'any ja Kristë ka'ap pën nijawëja'any maa ënety tsyoony.

²⁸ Tam ënety ja Jesús yaj'ixpëky ma ja mëjtsajptëjkën, ënät mëk y'ënäny: Xy'ixy'ajtëpës miits ets mnija'awëtëp maas ntsoonyën. E ka'apës kë'ëmwinma'any të nminy, yë'ëjës të xykyexy mëti'ipë mëtëy winë tyuunpyën, mëti'ipë miits ka'ap xy'ixy'atën.

²⁹ Ëjts n'ixy'äjtypyës yë'ë jä'ä koos jam ntsoony ets yë'ëjës të xykyexy.

³⁰ Ënet ojts tjamatsa'antë, je'eyëp ko ni pën ojts tkanixajë, jä'ä ko ka'anëm ënety ja nyixëëw tpaatynyëm.

³¹ May ja ja'ay ojts myëpëktë ets y'ënantë: Ko myinëty ja Kristë, ¿wäänë jëtää ni'ik tunëty ja mëj'ajtën këtiinëm ya'atë ye'etyëjkë?

Ko ja fariseë ja'ayëty tjamatsantë ja Jesús

³² Ko ja fariseë ja'ayëty tmëtoy'ajtëy ko ja ja'ay ja Jesús tnikäjpxy tnimëtya'aktë, ënät yë fariseë ja'ayëty ets ja teety wintsënëty ojts tkäxtë ja mëjtsajptëjk këwent'ajtpë ets tmatstëty ja Jesús.

³³ Tääts ja Jesús y'ënäny: Wäänës yaa njaak'ita'any mëët miitsëty, tsojkës jam nëjkxa'any ma yajpaatyën mëti'ipës xykyäjxpën.

³⁴ Nëjkxëpës xyjya'ixta'atë, je'eyëp ko ka'apës xypyaata'antë, jä'ä ko ka'ap tjëkyepy miits jam mnëjkxtëty maas nnëjkxyën.

³⁵ Tääts ja jutiis ja'ayëty nyäyajtëëwëtë nixim niyam: ¿Ma nyëjkxa'any ya'atë ja'ay ets ka'ap n'ëkpatënëty? ¿Kajts tjëkyepy jam muum nyëjkxëty wiink kajpn ets jam muum ma jyëpyo'kxykyajpnën tyaj'ijxpëkëty yë jutiis ja'ay?

³⁶ ¿Ka'ap oy yajja'akyukë tiitën jyatijäämpy: Xy'ixta'atëpës, je'eyëp ko ka'apës xypyaata'antë jä'ä ko ka'ap jam tjëkyepy mnëjkxtëty maas nëjkxyën?

Jesús yë'ë yäjkpy nëë mëti'ipë yajjuuky'ajtpën

³⁷ Ja tu'kxëëw ënety kyakëxy ja mëj xëëw tyunyë jyätyën. Ko ja Jesús ojts wya'kukë ets mëk y'ënäny: Pën tëtsëp, wä'änës xynyiminy ets y'uukëty.

³⁸ Ets y'atëwëty ijxtëm jap kuja'ay myinyën: Mëti'ipë mëpëjkpën jëtu'un jap y'aawjoty jyotjoy yajpaata'any ijxtëm jeexyë ja komnëë jap myuutyën mëti'ipë yajjuuky'ajtpën.

³⁹ Ko ja Jesús jëtu'un y'ënäny yë'ë Kënu'kxymyëkajtën tyij mëti'ipë y'ëxajëtëpën ja mëpëjkpë, jä'ä ko ka'anëm ënety ja Jesús tsyajp petynyëm, paaty ja Kënu'kxymyëjajtën ënety ka'ap myinyëm.

Ma ja ja'ay nyäpyëjkwa'kxëtën

⁴⁰ Jam may mayjyä'äyjyotm y'ënantë ko jëtu'un tmëtoowtë: Tëy ko ya'atë yë'ëjëty yë Dios yë kyäjpxynyajxpë.

⁴¹ Ets ja wiinkëtypë y'ëna'antë: Yë'ë yë Kristë ets jatu'kpëky y'ëna'antë: Ka'ap Kristëty jä'ä ko ka'ap jam tsyoona'any Galilea y'itjotm.

⁴² Jëtu'un ja Dios ja y'aaw y'ayuk y'ënä'äny ko ja yajkutujkpë David ja y'u'unk y'ok nëjkx Kristë'aty ets jam tsyoona'any Belén, jä'ä ko jam ja David ijty kyukajpnëty.

⁴³ Tääts ja ja'ayëty ka'ap ojts oy tyajtu'knaxëtë ja wyinma'anyëty ko tjanikajpxtë pën Jesus'ajtp.

⁴⁴ Tam jënaakën mëti'ipë ojts tjamatsa'antën, je'eyëp ko ka'ap tmajtstë.

Ko ja yajkutujkpëtëjk ka'ap tmëpëktë ja Jesús

⁴⁵ Ënet ja mëjtsajptëjk këwent'ajtpë ojts wyimpijtkojnëtëpë ma ja teety wintsënëtyën ets ma ja fariseë ja'ayëtyën, ets y'ënëmaayëtë: ¿Tii ko të xykyayajmintë?

⁴⁶ Ets y'ëtsoowtë: Jä'ä ko ka'ap nijëna'a pën jëtu'un kyäjpxynyëm ijxtëm yë'ë kyäjpxyën.

⁴⁷ Ënet ja fariseë ja'ayëty y'ënëmaayëtë: ¿Tëë näjyëtu'un miits myajwin'ëëntë?

⁴⁸ ¿Ëkë tëë jää pën nitu'ukën yë wintsën ëkë fariseë ja'ay myëpëkyë?

⁴⁹ Ja'ay mëti'ipë ka'ap tnijawëtën ja Dios ja y'ënä'ämën, kajpxpoky y'itë.

⁵⁰ Ja Nicodemo mëti'ipë ojts tëkok myëtyä'äkyën mëët ja Jesús, jëtu'un ojts y'ënë'ëmxëtë:

⁵¹ Jëtu'un ja tëyajtën y'ënä'äny ko ka'ap y'oyëty ets ja ja'ay nyajnitujkëmëty pën ka'anëm nmëto'owëm wi'ix y'ënä'änyën ets yajnijawëty tii të tunyën.

⁵² Ets ja myëku'uktëjk jëtu'un y'ëtsoowtë: ¿Näy mkaliletë ja'ay mijtsë? Ixpëk yë Dios yë y'aaw y'ayuk, tääts xy'ixëty ko ka'ap pën Dios käjpxynyajxpë tsyoona'any jam Galilea.

Ja to'oxytyëjk mëti'ipë ka'ap twintsë'ëkën ja pëjkën ukën

⁵³ Tääts ja ja'ay ojts nyëjkxnëtë këëktëjk.