Juan 3 - Biblia Dc en Mixe de Quetzaltepec

Jesús ets Nicodemo

¹ Jam ijty tu'uk ja fariseë ja'ay, Nicodemo'ajtp, mëj'äämpy ijty y'ity ma ja jutiis ja'ayëtyën.

² Yë'ë ojts ninëjkxy ja Jesús koots ets t'ënëmaay: Wintsën, nija'awëtyëpës ko mijts Dios të mkexyë ets ëëts xyaj'ijxpëktëty, jä'ä ko ka'ap tjëkyepy pën tunëty ja mëj'ajtën ijxtëm mijts xytyunyën pën ka'ap ja Dios tmëëtëty.

³ Ënet ja Jesús y'ënëmaayë: Tëy mijts t'ënëëmë, pën ka'ap jatëkok ja ja'ay myëxu'unk'aty, ka'ap tjëkyepy t'ixëty ja Dios ja kyutujkën.

⁴ Tä ja Nicodemo tyajtëëy: ¿Wi'ix tëy ja'ay jatëkok myëxu'unk'ajnëty? ¿Wä'än jëtää tu'uk ja'ay mëjja'aypyë tyëkëty tyaak jyootjoty ets jatëkok myëxu'unk'ajtwinpitëtyë?

⁵ Ënet ja Jesús y'ëtsoowë: Tëy mijts t'ënëëmë, pën ka'ap myëxu'unk'aty mëët ja nëë ets ja Dios ja Myëjaaw myëk'ajtën, ka'ap tjëkyepy tyëkëty ma ja Dios ja kyutujktaknën.

⁶ Ja ja'ay jëtu'un myëxu'unk'atë ijxtëm yaa naaxwiinyëtën, ni'kx kopkën je'eyë; pën jatëkok mëxu'unjk'ajtp mëët ja Dios ja Myëjaaw myëk'ajtën, ka'ap ja kyëxë'ëky.

⁷ Këtii nëkoo xymyëkjawë ko t'ënëëmën: Ko kopkpëky ko ja'ay jatëkok myëxu'unk'atëty.

⁸ Yë poj, pojp oymyaajëty, ets oy jyayajmëtoy ko y'amu'uy; ka'ap yajnijawë maa tsyoony ets maa nyijkx; näjyëtu'un yë'ëjëty mëti'ipë mëxu'unk'ajtëpën jatëkok ka'ap yaj'ixtë.

⁹ Tääts ja Nicodemo ojts tyajtëëwkojnëpë: ¿Wi'ix ya'atë jëtu'unpë tyunëtëty jyatëtëty?

¹⁰ Ets ja Jesús y'ëtsoowë: Israel ja'ay yaj'ijxpëjkpë mijts, ¿ets ka'ap ya'atë xynyijawë?

¹¹ Tëy mijts t'ënëëmë ko nija'awëtyëpës mëti'ipës nnikajpxtëpën, ets nija'awëtyëp ëëtsëty mëti'ipës të n'ixtën; je'eyëp ko miitsëty ka'ap xymyëpëktë mëti'ipë njatukmëmëtyaktëpën.

¹² Pën ka'ap miits xymyëpëktë ko ntukmëmatya'aktë mëti'ipë yaa naaxwiinyëtën, ¿wi'ix xymyëpëka'antë ko ntukmëmëtya'aktëty mëti'ipë tsajpjotmën?

¹³ Ni pën tsajpjotm të kya'otsy, yi'iyë mëti'ipë jam të tsyoonyën ets yaa naaxwiiny të kyëtä'äky, yë'ë jëtu'un ja naaxwiinyëtë ja'ay ja y'U'unk.

¹⁴ Jëtu'un ijxtëm ja Moisés ojts ja tsa'any tyajpëtë'ëkyën jam të'ëts'itjotm, näjyëtu'un ja naaxwiinyëtë ja'ay ja y'U'unk pyëtë'ëka'any;

¹⁵ ets jëtu'un, pën mëpëjktëp ma yë'ëjën pyaatantëp ja juukyajtën xëmëkyëjxmëpë.

Tios tsyojkpy ja naaxwiinyëtë ja'ay

¹⁶ Yë'ë ko Dios ni'ik ja naaxwiinyëtë ja'ay tsoky, paaty tkejxy ja y'U'unk tu'kpajkpë. Pën myëpëjkpy ka'ap y'ookëty, yë'ë myëët'atëp ja juukyajtën xëmëkyëjxmëpë.

¹⁷ Jä'ä ko yë Dios ka'ap yë'ëkyëjxmëty tkejxy ja y'U'unk naaxwiiny ets tyajnitukëja'any ja naaxwiinyëtë ja'ay, yë'ëkyëjxm të tkexy ets tyaj'ëwaatsëpëtsëmëty ja ja'ay.

¹⁸ Pën myëpëjkpy ja Dios ja y'U'unk; ka'ap nyitukëja'any; e mëti'ipë ka'ap myëpëkyën tëë nyitukë jä'äkyëjxm ko ka'ap të tmëpëky ja Dios ja y'U'unk tu'kpajkpë.

¹⁹ Mëti'ipë ka'ap myëpëktën tëë nyitukëtë, jä'ä ko, yi'iyë ja ëxëëkpë tyuuntëp paaty ja kujaj kutë'kxën ka'ap të tsoktë ko të jyaminy yaa naaxwiiny.

²⁰ Pën tyuuntëp ja ëxëëkpë, y'ëxëëk ijxtëp ja të'kxën jajën, këtiipë yajnijawëty mëti'ipë tyuuntëpën.

²¹ E ja mëti'ipë juuky'ajtëpën mëtëy, myëwinkoontëp ja kujaj kutë'kxën ets yaj'ix yajnijawëty tu'kë'ëyë mëti'ipë tyuuntëpën ijxtëm ja Dios tsokyën.

Ko Juan tnikäjpxy ja Jesús

²² Ko jëtu'un tyuunë jyajtë, tääts ja Jesús ojts nyijkx mëët ja y'ijxpëjkpëtëjk Judea y'itjotm, ma ojts wäänë y'ityën ets tyajnëëpejty ja ja'ay.

²³ Näyjyëtu'un ja Juan ënety yajnëëpety jam Enón, winkon ma tu'uk ja kajpn txëëwatyën Salim, jä'ä ko ko ënety jam ja nëë; jamts ja ja'ay ijty nyëjkxtë ets nyëëpätë.

²⁴ Jëtu'un tyuunë jyajtë ka'anëm ënety ja Juan yajtsumnyëm.

²⁵ Ojts jënaakën ja Juan ja y'ijxpëjkpë tyajkäjpxykyojtë mëët tu'uk ja jutiis ja'ay wi'ix ja ja'ay nyäyajwa'atsëtëtyën,

²⁶ ets ojts tuk'ëwaanëtë ja Juan, ets t'ënëmaaytyë: Wintsën, ja ja'ay mëti'ipë ënety mijts jam mëëtën, jam Jordán, mëti'ipë të xynyimëtyä'äkyën tam tyam yajnëëpety ets nimay ja ja'ay jyänty nyiminyë.

²⁷ Ets ja Juan y'ënëmaayëtë: Ka'ap pën tii tmëëtëty pën ka'ap ja Dios të myo'oyë.

²⁸ Ojts miits kë'ëm xy'ixtë ko ojts n'ëna'anyës koos ka'ap ëjts nKristëty, je'eyës jëyëjp të nyajkexy.

²⁹ Ma ja pëjkën ukën y'ityën, ja ye'etyëjk yë'ë kyë'ë'am'ajtyp ja to'oxytyëjk; ets xoontakp ja pëjkpë ye'etyëjk ja myëku'uk mëti'ipë mëët oy nyämyäyën ko tmëtoy kyäjpxy myëtyä'äky ja pëjkpë ye'etyëjk. Näjyëtu'unës tyam, xoontakpës nyajpaaty ko Jesús ja y'aaw y'ayuk nmëtoowës.

³⁰ Yë'ë, ni'ik wyimpäta'any, e ëjts ni'ikyës naxymyëja'any.

Mëti'ipë tso'onpën jam këjxm

³¹ Mëti'ipë tso'onpën jam këjxm, yë'ë tu'kë'ëyë winë nyikopk'ajtääpy. Mëti'ipë naaxwiinyën, naaxwiiny je'eyë tyuny, ets yi'iyë nyimëtyäkpy yaapë naaxwiinyën. E mëti'ipë tso'onpën tsajpjotm, yë'ë tu'kë'ëyë winë nyikopk'ajtääpy,

³² yë'ë myëtyäkpy mëti'ipë të t'ixy të tmëtoyën, je'eyëp ko ka'ap pën të tkupëky ja tëyajtën mëti'ipë jyanikäjpxypën.

³³ E pën kyupëjkpy, yë'ë nyikäjpxyp ko Dios tyiyëty jyääntyëty.

³⁴ Pën ja Dios të kyexyë, Dios ja y'aaw y'ayuk myëtyäkpy, jä'ä ko Dios ja Jya'awën të tyäky ëmuumtu'ukjot.

³⁵ Ja Dios Teety tsyojkpy ja y'u'unk ets tëë tukkë'ëtëjkëtyä'äy mëti'ipë myëët'ajtypyën.

³⁶ Pën ja Dios U'unk myëpëjkpy, yë'ë myëët'ajtyp ja juukyajtën xëmëkyëjxmëpë; e mëti'ipë ka'ap tmëpëkyën Dios U'unk, ka'ap tmëët'ata'any ja juukyajtën xëmëkyëjxmëpë, yë'ë y'ëxajëjäämpy ja Dios ja tyiytyu'unën.