Biblia Todo Logo
Bìoball air-loidhne

- Sanasan -

Juan 16 - Biblia Dc en Mixe de Quetzaltepec

1 Paaty miits ya'atë ntuk'ëwaanëtë këtiipë xy'ëxmatstëty ja mmëpëjkën ma ëjtsën.

2 Nëjkxëp myaj'ixkäxtë jap tsajptëkoty ets nëjkxëp ja'ay myaj'ookëtë ets jëtu'un nëjkx myäytyë tyajtë ko Dios myëtuuntëp.

3 Paaty nëjkx jëtu'un y'ëtë'ëtstë, jä'ä ko ka'ap ja Dios Teety t'ixy'atë, ets ëjts nän ka'apës xy'ixy'atë.

4 Paaty miits ya'atë ntuk'ëwaanëtë ets xyjyä'ämyätstëty ko ënety jëtu'un të nëëmëtë ko ja xëëw po'o tpaatëty. Ka'ap ënätyë të ntuk'ëwaanëtë jä'ä ko jaaktää'ajtpës ënety mëët miitsëty.


Mëti'ipë Kënu'kxymyëkajtën tyuunpyën

5 E tyam nnëjkxyës ets mëët nyajpaata'anyës mëti'ipës të xykyexyën ets nitu'uk miits xykyayajtëwtë pën maas nnëjkxy.

6 Wäänëni'ik miits të mmontë mtuktë koos jëtu'un të n'ëna'any.

7 E tëy miits nëëmëtë: Nëjkxaanpës ets miits xytyuk'oy'atëty. Koos nkanëjkxëty, ka'ap tjëkyepy myinëty ja Nikajpxtutpë ma miitsëtyën; e pën nëjkxpës, ëjts jam nkäxäämpy.

8 Ko ja Nikajpxtutpë myinëty, yë'ë nyikajpxäämpy pën pokymyëët, kapokymyëët ets pën nëjkx t'ëxajë ja Dios ja tyiytyu'unën.

9 Mëti'ipë pokymyëëtën yë'ëkyëjxm koos ka'ap xymyëpëky;

10 pën ka'ap pyokymyëëtëty: ëjts, nëjkxpës maajës yë nTeetyën ets miitsëty ka'ap xy'ëk'ixanëtës;

11 pën nëjkx t'ëxajëtë ja Dios ja tyiytyu'unën: mëti'ipë ënä'ämpën yaa naaxwiiny naaxkëjxy, tëë nyitukë.

12 Tapnëm may mëti'ipë miits ntukmëmëtya'akantëpën, je'eyëp ko tyam tsip ets ntukmëmëtyakta'atëty.

13 Ko ënety myiny ja Kënu'kxymyëkajtën, mëti'ipë ja tëyajtën yäjkpyën, yë'ë nëjkx tu'kë'ëyë mtuk'ijxpëkëtë ja tëypyë jaantypë, jä'ä ko ka'ap kyë'ëm winma'any tnikajpxa'any, yë'ë nyikajpxäämpy mëti'ipë myëtoopyën ets mtuk'ëwaanëja'anëtë mëti'ipë tunan jatanëpën.

14 Nëjkxëpës ja xymyëjjaw xyjyääntyjyawë, jä'ä ko yë'ë y'ëxajëjäämpy mëti'ipës ëjts njä'äj'typyën ets miits myajmo'oja'antë.

15 Tu'kë'ëyë mëti'ipë ja Dios Teety myëët'ajtypyën, ëjts yë'ë njä'a näjyëtu'un. Paatyës të n'ëna'any ko ja Kënu'kxymyëkajtën t'ëxajëty mëti'ipës ëjts njä'ä'ajtypyën ets miits myajtuknijawëja'antë.

16 Tim jawäänë maajës miits ka'ap xy'ëk'ijxnëtëty, je'eyëp ko nän wäänë y'itëty täätsës jatëkok xy'ixtëty.


Ko monyëtukyë y'awinpity ja xoontakën

17 Ënet jënaakën ja y'ijxpëjkpëtëjk xim yam nyäyajtëëwëtë: ¿Tiijën jyatijäämpy ko jëtu'un y'ëna'änny? Ko y'ënä'äny ko wäänë y'ita'any ma ka'ap n'ijxmëtyën ets ko jatëkok y'ënaankojnëpë ko nän wäänë y'itëty ets n'ijxmëty ets yë'ëkyëjxm ko nyijkx ma Dios Teetyën.

18 ¿Wi'ixën ya'atë nyiwijy tim jawäänëpë? ka'ap nja'akyujkëmë mëti'ipë myëtyäkpyën.

19 Ënet ja Jesús nija'awëy ko ja y'ijxpëjkpëtëjkëty tam mëti'ipë tjayajtëwantëpën winë, paaty t'ënëmaay: Tëë miits nëëmëtë ko wäänë jyaak ita'any maajës ka'ap xy'ëk'ijxnëtëty ets nän wäänë y'itëty tääts jatëkok xy'ixtëtyës. ¿Ya'atë miits ka'ap xyjyä'äkyukëtë?

20 Tëy nëëmëtë, ko nëjkxëp mjë'ëtë mya'axtë ets mmontë mtuktë ma ënety ja ja'ay xyoonta'aktën mëti'ipë yajtuuntëpën ja naaxwiinyëtë winma'any; e oy ënety y'ëkjëtu'unëty ma miits jam mmontë mtuktën ets mjë'ëtë mya'axtën, ja mjë'ëyënëty myaxënëty ets ja mmo'onënëty mtukënëty jä'ä nëjkx y'awinpity xoontakën.

21 Ko tu'uk ja to'oxytyëjk y'u'unkpaata'any, mëk pyikyë y'ixyë, ko wyinkony ma ja y'u'unk myëxu'unk'ata'anyën; e ko ja mëxu'unk myiinë jya'ajnë, jyä'äytyëkooytyääpy ja pëjkën ato'onën jä'äkyëjxm ko tukxoontä'äky ko tëë tu'uk ja mëxu'unk tyajminy tyajja'ty naaxwiiny.

22 Näyjyëtu'un miits tyam mmontë mtuktë; je'eyëp koos winpitaanpës jatëkok ets min n'ixa'antë ets jotkujk mnäjyawëtëty ets ni pën mkapëjkëtëty ja mxoontakënëty.

23 Ka'ap nëjkx tii xy'ëkyajtëëwnëtës jä'ä xëëw. Tëy miits nëëmëtë, mmo'ojëtëp miits ja nteetyës mëti'ipë m'amëtoowtëpën ëjtskyëjxm.

24 Tyampaat ka'ap miits tii xy'amëtowtës ëjtskyëjxm; amëtowtë ets myajmo'otëty, jëtu'un ja mxoontakën kya'pxtëty.


Jesukristë myëmëtäkpy ja naaxwiinyëtë winma'any

25 Tëë miits ya'atë ntuk'ëwaanëtë mëët ja nyi''ijxpäjtën. E pyatäämpy ja xëëw jëmëjt ko miits ka'ap n'ëktuk'ëwaanëjanëtë winë mëët ja ijxpäjtën, wa'ats nëjkx ntukmëmatyaknëtë ja nTeetyës.

26 Jä'ä xëëw nëjkx ja nteetyës winë xy'amëtowtë ëjts nxëëwkyëjxm; ets ka'apës n'ëna'any koos n'amëtowa'any ja nTeetyës mëët miitskyëjxmëty,

27 jä'ä ko ja nTeetyës kë'ëm miits mtsojkëtëp. Mtsojkëtëp jä'äkyëjxm koos miits tsyoktë ets jä'ä ko tëë xymyëpëktë koos jam ntsoony ma Tiosën.

28 Jamës të ntsoony maajës ja nTeetyën ëts yaa naaxwiiny të nminyës, e tyamtsës n'ëxmatsy ya'atë naaxwiinyëtë etsës nnëjkxy jatëkok maajës ja nTeetyën.

29 Ënet ja y'ijxpëjkpëtëjk y'ënantë: Tyam tëy wa'ats të'kxy jam mkajpxnë, ka'ap xy'ëkyajtuunë ja ijxpäjtën.

30 Tyamës nijawëtë ko mijts tu'kë'ëyë winë xynyija'awëtyä'äy ets ko ka'ap xyajmëyäty pën tii myajtëwëtëty. Yë'ëkyëjxmës tyam nmëpëktë ko mijts mtsoony jam ma Tiosën.

31 Ets ja Jesús y'ëtsoowëtë: ¿Mjantymyëpëjktëp miits tyamnë?

32 Tëë ja xëëw jëmëjt tpaaty ets tyam jëtu'un nixëëwaty, ko miits mkääkwa'kxta'atëty ets mnëjkxtëty këëkjëën këëktëjk etsës nätyu'uk xy'ëxmatstëty. E ka'apës nätyu'ukëty, jä'ä ko tääjës ja nteety mëët.

33 Ntuk'ëwa'anëtëp miits tyam ya'atë tu'kë'ëyë ets ja kijpxyajtën jyää'atëty ma miitsëtyën. M'ëyowantëp miits yaa naaxwiiny, je'eyëp ko amëk jotmëk myajpaatëty, ëjts tëëjës nmëmëtä'äky ja naaxwiinyëtë winma'any.

Biblia Dc en Mixe de Quetzaltepec, Oaxaca México © Sociedad Bíblica de México, A.C.

Bible Society of Mexico
Lean sinn:



Sanasan