Juan 10 - Biblia Dc en Mixe de Quetzaltepec

Kupixyny këwent'ajtpë mëët ja kyupixyny

¹ Ënet ja Jesús y'ënäny: Tëy miits nëëmëtë, pën ka'ap tyëkën ma ja kemy aawën, mä'tspë ënety ets tu'u'ëtujkpë.

² E pën tëjkëp ma ja kemy aawën, jä'ä ja kupixyny këwënt'ajtpë.

³ Ja kemy kyëwent'ajtpë yë'ë ja kemy yaj'ëwatsyp, ja kupixyny këwent'ajtpë xëëwpety tmëkäjpxy ja kyupixyny, e ja kyupixyny nän yo'kmëtoowëp; ets tyajpëtsëmy jap kemyjoty.

⁴ Ko tyajpëtsëëmta'ay tääts twinye'ey; paye'eyëp jä'ä kupixyny jä'ä ko yo'kmëtoyë.

⁵ E ja mëti'ipë ka'ap t'ixy'atën ka'ap tpanëjkxtë, ni'ikyë tkukä'äktë jä'ä ko ka'ap tyo'kmëtowtë.

⁶ Jëtu'un ja Jesús ojts tpëjktä'äky ja ijxpäjtën, je'eyëp ko yë'ëjëty ka'ap twinmëtoowtë mëti'ipë jyanimëtyakën.

Jëtu'un ja Jesús ijxtëm ja oypyë kupixyny këwent'ajtpën

⁷ Ënet ja Jesús ojts y'ënëmaaykyojënëtëpë: Tëy miits nëëmëtë, ëjts jëtu'un ijxtëm ja kemy aawën ma ja kupixyny nyaxtën.

⁸ Mëti'ipë të myintën jëyëjp ets ok ëjts, toonpë mä'tspë jä'äjëty; ets ja kupixyny kä'äp të tyunëtë këwentë.

⁹ Ëjts jëtu'un ijxtëm ja kemy aawën. Pën tëjkëp ma ëjtsën yë'ë nitso'okaanp. Jëtu'un nyaxa'any ijxtëm ja kupixyny tyëkëtën pyëtsëmtën ets jap jyi'kxypyaatë.

¹⁰ Yë mä'tspë, yi'iyë nyimiimpy ets myäätsa'any, yaj'ooka'any ets yajkutëkoyä'äny. Ëjts yë'ëjës të niminy ets ja ja'ay jyuuky'atëty akujk jotkujk.

¹¹ Ëjts jëtu'un ijxtëm ja oypyë kupixyny këwent'ajtpën. Ja oypyë kupixyny këwent'ajtpë kyu'o'këp ja kyupixyny;

¹² e mëti'ipë nyituunpyën yi'iyë myëju'uny, ko t'ixy myiny ja pa'uk tääts t'ëxmatsy ja kupixyny ets kye'eky, jä'ä ko ka'ap ja kupixyny tjä'äjëty. Tääts ja pa'uk tpajëtijtä'äky ja kupixyny ets t'awojpwä'kxy.

¹³ Tääpë ja'ay paaty kye'eky jä'ä ko yi'iyë myëju'uny nyituunpy, ka'ap ja kupixyny tmëmay tmëtajy.

¹⁴ Ëjts jëtu'un oypyë kupixyny këwent'ajtpë. Jëtu'un ijxtëm xy'ixy'ätyës ja nTeetyës nän jëtu'unës n'ixy'äty ja nTeetyës; jëtu'un n'ixy'ätyës ja nkupixynyës ets yë'ëjëty nän jëtu'unës xy'ixy'atë. Ëjts nyäjkpyës ja njuukyajtën maas ja nkupixynyën.

¹⁵ Ëjts jëtu'un oypyë kupixyny këwent'ajtpë. Jëtu'un ijxtëmës ja Dios Teety xy'ixy'ätyën nän jëtu'unës ëjts yë'ë n'ixy'äty. Nku'o'këpës ja nkupixyny.

¹⁶ Tääs ja kupixyny wiinkpë nmëëtëty mëti'ipë ijtëpën ma wiinkpë kemyën; nyajminäämpyës ja näjyëtu'un yaa. Xymyëmëtowantëpës yë'ëjëty ets tu'ukyë y'ita'antë yaa ma tu'ukpë ja kupixyny këwent'ajtpën.

¹⁷ Xytsyojkpës ja nteety, jä'ä koos nyäky ja njuukyajtën ets jatëkok n'ëxajëja'anyës.

¹⁸ Ka'ap pën xypyëjkës ja juukyajtën, koos nyäky nkë'ëmtsojkënës jëtu'un. Nmëët'ajtypyës ja kuttujkën etsës nyakëty etsës n'ëxajëty jatëkok. Jëtu'unës ja nTeety të xymyo'oy ja ënä'ämën.

¹⁹ Ko ja jutiis ja'ayëty ojts tmëtowtë mëti'ipë ja Jesús kyäjpxypën ënät ojts ka'ap tu'knax myäytyë tyajtë.

²⁰ May ja ja'ay mëti'ipë ënantëpën: ¿Tii ko yë'ë xymyëpëka'antë? Ku'oypyë myëët'ajtyp, ja'akyupoj yë'ë.

²¹ Näy tam mëti'ipë ënantëpën: Ka'ap pën jëtu'un kyäjpxy pën ku'oypyë myëët'ajtyp. ¿Wä'än jëtää tjëkyepy tu'uk ja ku'oypyë tyaj'ijxë'ëkëty ja ja'ay wiintspë?

Ko jutiis ja'ayëty ka'ap tmëpëktë ja Jesús

²² Potm'ajtp ënety ko ojts ja mëjtsajptëjk tnixëëwtuntë jam Jerusalén.

²³ Jam ënety ja Jesús yajpaaty ma ja mëjtsajptëjk wiinën ma txëëwatyën Salomón Tyëjkwiin.

²⁴ Ënet ja Jesús ojts ja jutiis ja'ayëty nyapikëty ets yajtëëwë: ¿Xëmë jëtu'un ëëts ka'ap nijawëtëty pën mijts mKristë? Tuk'ëwa'anëtëkës etsës nijawëtëty.

²⁵ Tä ja Jesús y'ëtsooy: Tëë miits njatuk'ëwaanëtë je'eyëp ko ka'ap xymyëpëktë. Ja mëj'ajtën mëti'ipës ntuunpyën mëëtës ja nTeety ja kyutujkën, yë'ë ja tëyajtën yäjkpy ma ëjtsën,

²⁶ e miitsëty ka'ap xymyëpëktë, jä'ä ko ka'ap nkupixyny'atë.

²⁷ Yë nkupixynyës xyo'kmëtoowtëpës yë'ëjëty, etsës xypaye'eytyë.

²⁸ Ëjts nmooytyëp ja juukyajtën xëmëkyëjxmëpë, nijëna'a kyakutëkoytyëty ets ni pën xykyapëjkëtyës.

²⁹ Mëti'ipës ja nTeety të xymye'eyën ni'ik myëjëty këtiinëm tii, ets ka'ap pën myäyëtëty pyëjkëtëty.

³⁰ Dios Teety ets ëjts, tu'ukyë ëëtsëty.

³¹ Ënet ja jutiis ja'ayëty jatëkok tkoonë'ktë ja tsaa ets tjaka'atsantë ja Jesús,

³² e ja Jesús jëtu'un y'ënëmaayëtë: May ja mëj'ajtën të ntunyës ma miitsëtyën mëët ja nteetyës ja kyutujkën. ¿E tiis ko xykyuka'atsa'antë?

³³ Tääts ja jutiis ja'ayëty y'ëtsoowtë: Ka'ap yë'ëjëty myajtukuka'atsa'any ko tii oy xytyuny, yë'ë myajtukuka'atsaanp ko ja Dios xymyëkajpxtëkoy. Mja'ayts mijts ets Dios mnätyijyë.

³⁴ Ënet ja Jesús y'ëtsoowëtë: Ma miits ja m'ënä'ämën mkutujkën xymyëët'atën jëtu'un jap kyëxja'ayëty: Jëtu'unës n'ënany ko miits mtios'atë.

³⁵ Yajnija'ap ko ka'ap tjëkyepy ja Dios ja y'aaw y'ayuk këxja'aypyë yajninaxëty; ets ja Dios, nän tios ojts tijy ja ja'ayëty mëti'ipë ja y'aaw y'ayuk tyukmëtoowën.

³⁶ E pën ëjts tëëjës ja Dios xykyënu'kxy ets yë'ëjës të xykyexy yaa naaxwiiny, ¿tii ko m'ëna'antë ko Dios nmëtëkoyës koos nätyijyë ko yë'ë xy'u'unkëtyës?

³⁷ Pën ka'apës yë'ë ntuny mëti'ipë ja nTeetyës tyuunpyën, ka'apës xymyëpëktëty.

³⁸ E pën ntuunpyës mëti'ipë yë Teetyës tyuunpyën, oy ja n'ayukës xykyamëpëktëty, yë'ë mëpëktë mëti'ipës ntuunpyën ets xynyijawëtëty ko ja Dios Teety tu'ukyë y'ity mëët ëjts ets ëjts mëët yë'ë.

³⁹ Tääts ojts tjamatsa'antë jatëkok, je'eyëp ko ojts ja Jesús ye'eytyëkoy.

⁴⁰ Ënet ja Jesús ojts nyëjkxkojnëpë jam xëëwpëtsëmy nëë'awinm ma ja Jordán mëjnëëjën, ma ja Juan ijty yajnëëpetyën.

⁴¹ May ja ja'ay ojts nyinëjkxyë ets y'ëna'antë: Oy ja Juan Yajnëëpäjtpë ojts tkatuny ja mëj'ajtën, tu'kë'ëyë mëti'ipë nyikajpxën mëët ya'atë ye'etyëjk tëë y'atëëwta'ay.

⁴² May ja ja'ay tmëpëjktë ja Jesús ma tääpë itjotmën.