Josue 8 - Biblia Dc en Mixe de Quetzaltepec

Jëtu'un ja Israel ja'ayëty nitëjkëtyë ja Aí kajpn

¹ Ënet ja Wintsën t'ënëmaay ja Josué: Këtii ninu'un mtimtsyë'ëkëty ets ni mkakumay mkakutajëty. Tuknipëjktaakë ets woowtso'onta'a tëkokyë yë mtsiptuunpëtëjk ets xynyitëkëty akujk jotkujk tääpë naax kajpn mëti'ipë xyëëwajtypyën Aí. Ëjts tëëjës nkë'ëyäky ma mijtsën tëkokyë ja'ayëty mëti'ipë jam tsënaaytyëpën ets mëët ja nyiyajkutujkpë. Näyjyëtu'un ja nyaax kyajpnëty ets ja y'it nyaaxwiinyëtëty mijts mjä'ä'atëp,

² Yë Aí kajpn mëët ja nyiyajkutujkpë mëti'ipë jam ënä'ämpën, jëtu'un nëjkx xyajjaty xyajkëpety tä xytyuunyën yë Jericó. Je'eyëp ko ja mëti'ipë ënety mtukyajni'o'ktutëpën ja mëtsipëty, jyëkyäpëp miits xyjyä'ä'atëty. Tuknipëjktaakë ets tääpë kajpn ajotkumonë jëxkë'ptsow xynyitëkëty.

³ Ënet ja Josué ojts tyajtu'ukmujkta'ay ja tsyiptuunpëtëjk ets t'ijxka'pxtaay. Tääts tnitëkëja'antë ja Aí kajpn. I'px majk mil twin'ijxy ja tsiptuunpëtëjk mëti'ipë yajxon tsip'ixyëtyën mëti'ipë ojts koots tkexyën,

⁴ ets t'ënëmaay: Jam nëjkxtë kajpn jëxkë'ëm, jam mnäpyëjkta'akëtëty ame'tsyë ets jëjp'ixy mtimy'itëty.

⁵ E ja mayjyä'äy ëjts mëët nëjkxa'any winkon ma ja kajpnën, e ko ja kukajpnëty ëëts xy'ixtëty nmintë, ënetyës nkukä'äka'antë ets y'ëna'antëty ko näjyëtu'un jatëkok nkä'äka'anëmë tä ojts n'ëkkukäkëmën.

⁶ Yë'ëjëty xypyatsoona'anëm ënätyë ko ënety jam kajpnjotm nkäkpëtsë'ëmëmë ets myäya'an tyajja'antë ko nkukäkëm jatëkok.

⁷ Ënet mpëtsëmtëty ënätyë ets ja kajpn xynyitëkëtëty, jä'ä ko yë Wintsën tëë tkë'ëyäky.

⁸ Ko ënety të xynyitëkëtë, tääts xyjyëënmo'otëty, jä'ä ko jëtu'un ja ënä'ämën myiny.

⁹ Ënet ja Josué ojts tkexy ja ja'ayëty ets jam nyäyu'utsëtëty ma Betel mëët nyämyëwinkon'atyën yë Aí, anajnytsyow ma Aí yajpaatyën. E ja Josué jam ojts wyi'imy ma ja tsyënaaytyaknëtyën.

¹⁰ Komjëpom janty tsojk ojts yë Josué pyëtë'kojy ets t'ijxka'pxtaay ja tsyiptuunpëtëjk. Jëjp'am ojts nyäpyëjktä'äkyë mëët ja mëjja'aytyëjkëty mëti'ipë yajpatëpën ma ja Israel kajpnën ets tuknipëjktakëy tnitëkëja'any ja Aí kajpn.

¹¹ Tëkokyë ja ja'ayëty, ja tsiptuunpëtëjkëty mëti'ipë mëët yajpaatën ja Josué, wintuuytsyow ojts tnimintë ja kajpn ets jam anëkëjxmtsow nyäpyëjktakëtë, itkujky yajpaatë ma ja joyjyot mëët ja Aí nyäpyäätyë.

¹² Josué jä'ä ënety yë tsyiptuunpëtëjk të tyu'utsy nimëkoxk mil, jam anajnytsyow ma Betel mëët yë Aí nyäpyäätyë.

¹³ Mäjtskpëky ojts nyäyyajwa'kxëtë, tu'kpëky jam anajnytsyow, kajpnpë'am ets tu'kpëky wintuuytsyow ma ja Israel ja'ayëty ënety të nyäpyëjkta'akëtën, jam anëkëjxmtsow. Yë Josué mëët yë tsyiptuunpëtëjk, koots ojts tmëwinkontë ja kajpn ets jam jyajtë ma ja joyjyot kyujkwä'kxyën.

¹⁴ Ko ja yajkutujkpë t'ijxy mëti'ipë jam ënä'ämpën Aí, ënät ojts ënätyë twoowmujkta'ay ja tsyiptuunpëtëjk ets tnitso'ontë ja Israel ja'ayëty. Tninëjkxtë jam joyjyotm ma ja Jordán mëët nyämyëwyinkon'atyën, ni tkanijawë pën jam ja wiinkpë yu'utsy yajpaatë kajpn jëxkë'ëm.

¹⁵ Ja Josué ojts nyätyijyë tkukä'äktë ja ja'ayëty mëti'ipë tso'ontëpën Aí, jamtsow ojts nyëjkxtë ma ja tu'ujën mëti'ipë nëjkxpën të'ëts'itjotm.

¹⁶ Tëkokyë ja tsiptuunpëtëjkëty mëti'ipë Aí kukajpnajtëpën ojts yajkäjxta'atë ets tpapo'otëty ja Israel ja'ayëty, e komë jä'ä y'ëkpapooytyëp ja Josué, jëtu'unyë ojts ja kajpn atu'uk t'ëxmatstë.

¹⁷ Nitu'uk ojts yë tsiptuunpë kyawë'ëmy jam Aí ets Betel, jä'ä ojts tpatso'onta'atë ja Israel ja'ayëty ko kyäktë, tääts ja kajpn ojts jëtu'unyë t'ëxmatstë, ka'ap jap pën ja kuwaanpë.

¹⁸ Ënet yë Wintsën t'ënëmaay yë Josué: Ënëëmë yë ja'ayëty wä'än nitëkëtë yë kajpn Aí. Jä'ä koos tëëjës nkë'ëyäky. Ënet ja Josué ojts tjanty nyi'ënä'ämë ets ja kajpn tnitëkëtëty.

¹⁹ Ja tsiptuunpëtëjkëty poj'am pyëtsëëmtë mëti'ipë ënety jam yu'utsy yajpatëpën ko tnija'awëtyë tëë ja Josué tni'ënä'ämë ets tnitëkëtëty ja kajpn. Ko tnitëjkëtyë tää tjëënmooytyë ënätyë.

²⁰ Ko ja ja'ayëty y'ijxwinpijtë mëti'ipë Aí kukajpnajtëpën, ënät t'ijxtë ko ja kyajpnëty jam tyoy ko ja jëënjok pyëtsimy. Ojts jya'ënanëtë jeexyë kyä'äktë, e ka'ap ojts t'ëkjëkyäjpnë, jä'ä ko tëë ënety ja Israel ja'ayëty yajnatukëtë mëti'ipë ënety të kyä'äktën jamtsow joyjotm, tä nyiwinpijtëtë.

²¹ Ko ja Josué näjyëtu'un t'ijxpaty ko ja Israel ja'ayëty mëti'ipë jam yu'utsy të yajpaatën tëë tnitëkëtë ja kajpn, tääts tniwinpijtë ja Aí ja'ayëty ets ëxëëk tuuntë.

²² Mëti'ipë ënety ja kajpn të tjëën'ixkonëtën, ojts jam tsyoontë ets tnimiintë mëti'ipë ja Israel ja'ayëty të pyapo'ojëtën. Jëtu'un'äämpy ojts wyë'ëmtë itkujky ja Aí ja'ayëty ets tëkokyë tyaj'o'ktaaytyë.

²³ Yi'iyë ojts juuky tyajwë'ëmtë ja yajkutujkpë mëti'ipë jam ënä'ämpën Aí, je'eyë tmajtstë ets ojts tukninëjkxtë ja Josué.

²⁴ Ko tyaj'o'ktaaytyë mëti'ipë ënety ja Israel ja'ayëty të pyapo'ojëtën, ënät ojts wyimpitë jam kajpnjotm ma Aí kajpnën ets tyaj'o'ktaaytyë wa'ats mëti'ipë ënety jam juuky të wyë'ëmtën.

²⁵ Jä'ä xëëw, jä'ä ojts y'ooktë Aí ja'ayëty, majkmäjtsk mil, ye'etyëjk to'oxytyëjk.

²⁶ Jä'ä ko yë Josué ojts tni'ënä'ämë ets tëkokyë ja'ay tyaj'o'kta'atëty.

²⁷ Ja jëyujk tsajpkaa ets tëkokyë winë yë'ë ojts ja Israel ja'ayëty tjä'ä'ajta'atë, jä'ä ko jëtu'un ënety ja Wintsën të tuk'ëne'emy ja Josué.

²⁸ Josué wa'ats tyajtooytyääy ja Aí kajpn ets xit ko'ow tuuntaay, jëtu'un tä tyampaat kyëxë'ëkyën.

²⁹ Ja yajkutujkpë Aí kepykyëjxm yë Josué tkutëëy ets jëtu'un y'o'ky koonëm ja xëëw kyëtäky, tääts ni'ënä'ämëy ets tyajënaktëty ets jam tsaanipiwtëty ma ja kajpn yajnitëkën. Tsyampaat tääpë tsaanipiy yajpatpnëm jam.

Josué tkäjpxy yë ënä'ämën ma Ebal kopkën

³⁰ Jam ma Ebal kopkën, jam ojts yë Josué tu'uk wintsë'këntyakn tyaj'oyë ma Wintsën mëti'ipë Israel ja'ayëty Tyios'ajtëpën yajmëjjawëty.

³¹ Jëtu'un tä ënety ja Moisés të tuk'ëne'emyën ja Israel ja'ayëty ma jyaak juuky'ätynyëmën ets tä jap myinyën ma ja ënä'ämën mëti'ipë ja Moisés jyääyën: Ja wintsë'këntyakn ka'apë wyopëtyën kyä'ätsyëtyën. Ënet ja Israel ja'ayëty jam ja wintsë'kën tyajktë, ojts ja tsajpkaa jam tnino'k tnixaamtë ets ja Wintsën tukwintsë'këtyë, jëtu'un tuuntë ja nay'ëëw'oy näykyajpx'oyë.

³² Tää ja Josué tyëjkëy jääpyë jam tsaakëjxm, ma ënety të tyu'ukmujkta'atën ja Israel ja'ayëty ets tkëxjaaytyääy ja ënä'ämën tëyajtën mëti'ipë ja Moisés të tyajwë'ëmyën.

³³ Tëkokyë ja ja'ayëty jam nyäpyëjktakëtë, ma ja kaaxën mëti'ipë ja käjpxytyu'unën myë'ijtypyën mëti'ipë ja Dios jyä'ä'ajtypyën, yë kukajpn ets jaaypyaat jaaypyo'kxyëty. Näyjyëtu'un ja mëjja'aytyëjkëty, ënä'ämpëtëjkëty ets ja tsiptuunpë wintsëntëjkëty. Jëtu'un ja näkyënu'kxë tpaata'antë ni'ëmukë, jam ma ënety ja teetytyëjkëty mëti'ipë Leví ja'ayëtyën myëtënaaytyëpën kyejkyijxyëty. Nikujkwä'kxy jam yajpaatë ma ja Guerizim kopkën, ets ja kujkwä'kxy jam yajpaatë ma ja Ebal kopkën, jëtu'un tä ënety tëëyëp yë Moisés të tni'ënä'ämën, ja Wintsën ja tyuunpë.

³⁴ Tä ja Josué tkajpxtaay ja ënä'ämën, tu'ukjaty tnimëtyaktaay ma myinyën ja näkyënu'kxë ets ja näpyojkën.

³⁵ Josué wa'ats tkajpxtaay ja aaw ayuk ma ja naax kajpnën mëti'ipë ënety ja Moisés të tyajwë'ëmyën ma ja Israel ja'ayëtyën, ja ja'ayëty ojts tmëtoowta'atë wä'än mëjja'ay mutskja'ayëty ets wä'än jaaypyaat jaaypyo'kxyëty.