Josue 7 - Biblia Dc en Mixe de Quetzaltepec

Ja poky mëti'ipë ja Acán tyuuntëkooyën

¹ Tu'uk yë ja'ay mëti'ipë xyëëwajtypyën Acán yë'ë Judá jyä'äy, yë myaank yë Carmí, y'ok'u'unk yë Zabdí ets Zara, ojts kanaak winë tmënëjkxy ma tyëjkën mëti'ipë ënety yë Dios të tni'ënä'ämën ets kyutëkoyëty, e mëët ko ojts toonpë mëti'ipë ënety ja Wintsën të tnikäjpxyën ets kyutëkoyëty, tëkokyë ja Israel ja'ayëty ojts pyokytyëëmë'kta'atë. Yë Wintsën ojts tyukjoot'anpëkëtë.

Wi'ix tkumëtoowtën ja poky ets wi'ix ka'ap myëtaktën mëët ja Aí

² Yë'ë Josué ojts jëyëjp tkexy yë ja'ay jam Aí mëti'ipë tso'ontën Jericó ets nëjkx t'ixtë tuntë ja naax kajpn wi'ix yajpaatyën, tääpë kajpn a'oytsyow ënety wyi'imy mëët yë Betel, winkon ma txëëwatyën Bet-avén. Ja ja'ayëty ojts jam nyëjkxtë ets ojts y'ixtë tyuntë.

³ E ko wyimpijnëtë tä t'ënëmaaytyë ja Josué: ka'ap kyopkpëkyëty nyëjkxta'atëty yë ja'ay tsiptuunpë ets Aí kajpn yajnitëkëty. Jyëkyejpy je'eyë nyëjkxtëty mäjtsk mil ëkë tëkëëk mil, këtii ja'ay xykyäjxta'ajëty, jä'ä ko mëti'ipë kyuwantëpën yë kajpn niwäänë jam yajpaatë.

⁴ Ënet ojts nitëkëëk mil yë ja'ayëty tsyoontë ets tninëjkxtë yë Aí. Ko jam jyajtë ka'ap yajmëtakëtë ja Aí ja'ayëty ni'ikyë ojts yajkäkta'ajëtë,

⁵ jä'ä ojts y'ooktë yë Israel ja'ayëty i'px majkmokx tu'uk, ëpëky ja mëti'ipë ojts jyaakä'äktën ojts yajpapo'otë jampaat ma ja tsaatunën. Jam yajnajtspatëtë ma wyinjënäkyën ets ëxëëk yajtuuntë. Paaty ojts may ja ja'ay jyotmäjtskëtë ets ja jyotmëk'ajtën tyajtëkooytyë.

⁶ Ja Josué ets ja mëjja'aytyëjkëty mon tuk ojts nyäyjyawëtë ko jëtu'un tmëtoowpatë, paaty yë wyit tkë'tstaaytyë ets ja naaxway nyätyuknipëjkëtë, tyajkëxë'ëktë jëtu'un ja monyëtukyë ets ja pëjkën ato'onën mëët ko ënety o'ktëy të jyat të kyëpätë. Ënet ojts jam nyëjkxtë ma ja Dios ja kyaaxë y'ityën ets nyäkyoxtënaaytyakëtë naaxkëjxy koonëm nyaxkukowëtë ets jëtu'un tyajtsu'ujëtyë.

⁷ Tääts ja Josué ojts y'ënä'äny: Wintsën Dios, nikë oy jeexyë të xykyayajnaxtës ma mëjnëëjën. ¿Ix je'eyë ëëts yam o'ktëy njajnëtës nkëpäjnëtës ma Amor ja'ayëtyën, ëkë paatyën të xyajnaxtës ets ënät yë'ëjëty xyaj'ook xyajtëkoytyëtyësë? Ni'ik oy jeexyë ëëts jam të ntimwyë'ëmtë Jordán nëë'awinaxy.

⁸ Wintsën. E tyam ¿tii ayukës ënät npaatëp ma tyam ja Israel ja'ayëty ka'ap ja myëtsip yajmëta'akëtën?

⁹ Ja Canaán ja'ayëty mëti'ipë winkon tsënaaytyëpën ko ënät nijawëtëty koos ka'ap ja nmëtsip të xyajmëta'aktë, yë'ë nämyukëtëp ënätëty ets xyajkutëkoya'antëtyës. E ko ënety ëëts të n'o'kta'atë, ¿pën ja mxëëw nyaja'amyätsëp?

¹⁰ Ënet ja Dios y'ëtsoowë: Pëtë'ëk, ¿tii ko mkoxtänë?

¹¹ Yë Israel ja'ayëty poky të tuntë, jä'ä ko ka'ap të tmëjpëjkta'aktë ja käjpxytyu'unën. Tëë tmënëjkxtë ma jyëën tyëjkëtyën mëti'ipës ënety të ntuknipëjktaakën xyajkutëkoytyëty, tëë tontë tmäätstë ets t'apëjkmuktë mëët ma winë tyaj'itën mëti'ipë jyä'ä'ajtëpën.

¹² Paaty ka'ap ninu'un tjëkyepy tsyiptuntëty mëët ja myëtsipëty. Jëtu'unyë nëjkx kyäkta'atë jä'ä ko nitëjkëyëtëp y'o'kta'atëty yë Israel ja'ayëty. Pën miitsëty ka'ap xyajkutëkoytyë mëti'ipës të nikäjpxyën xyajkutëkoytyëty, ëjts ka'apës n'ëkyajpaatanë ma miitsëtyën

¹³ Pëtë'ëk ets yajtu'ukmuk yë naax kajpn. Ënëëmë wä'än tnäynyipëjktaakëtë etsës jopy xywyinkuwa'akëtëty, ëjts ënaanp, yë Wintsën mëti'ipë Tios'ajtpën ma Israel ja'ayëtyën: Mijts Israel kajpn, tëë xytyony ja mëti'ipë të yajtuknipëjktaakën kyutëkoyëty. Pën kä'äpyëm xyajkutëkoy ja mëti'ipë të xytyonyën ets xyajjëwä'äky ma mijtsën, ka'ap tjëkyepy xywyinkuwa'akëty yë mëtsip.

¹⁴ Ko jyëpom'atëty tu'kja'ayjyäty yaa myajtsoktë, ja mëti'ipës ënety nikäjpxypën, aak tu'kmëkukajpn nëjkx xymyëjyaaxë, aak tu'kjëën tu'ktëjk nëjkx xymyëjyaxëtyä'äy, e ja mëti'ipës ënety ni''ijxëpën ma ja tu'kjëën tu'ktëjkpën, jä'äts nëjkx xymyëjyaxëtyä'äy ja ye'etyëjktëjk.

¹⁵ E mëti'ipë ënety yajpatpën pokymyëët, ko të tyu'utsy mëti'ipë Dios të tuknipëjktaakën ets kyutëkoyëty, nino'oky nëjkx y'ooky jëtu'unpë ja ja'ay mëët tëkokyë jënu'un ënety winë tmëët'atyën ets ja y'u'unk y'ëna'k, mëët ko ënety të tuny mëti'ipë ka'ap tyuunëtyën ets ko ja poky të tmëtëkë ma Israel kajpnën ko të tkumëtoownaxy ja Wintsën ja kyäjpxytyu'unën.

Wi'ix ja Acán tkumëtooyën ja pyoky

¹⁶ Komjëpom tsojk ojts ja Josué pyëtë'kojy ets t'ënëmaay ja naax kajpn ets tu'kja'ayjyäty nyäpyëjkwa'kxëtëty. Dios yë'ë ojts tni''ixë yë Judá yë jyä'äy.

¹⁷ Ënet ja Judá ja jyä'äy ojts nyäwya'këxë'ëkëtë ets yë'ë ojts yajni''ixë ja Zara ja jyä'äy. Ma ja Zara ja jyä'äyën yë'ë ojts yajni''ixë ja jyiiky myëku'uk ja Zabdí.

¹⁸ Ko nätyu'ukjaty wya'këxë'ktë ja ye'etyëjktëjk mëti'ipë jyiiky'äjtyp myëku'uk'ajtypyën yë Zabdí, yë'ë ojts yajni''ixë yë Acán, yë myaank yë Carmí, yë y'ok'u'unk yë Zabdí, yë y'ok'u'unk yë Zara, yë Judá jyä'äy.

¹⁹ Ënet ja Josué t'ënëmaay ja Acán: U'unk maay, mëjjaw jaantyjawë yë Wintsën mëti'ipë yë Israel ja'ayëty Tyios'ajtëpën; nikajpx mëti'ipë të xytyunyën ets këtii nitii xykyuyu'utsëty.

²⁰ Tä ja Acán y'ëtsooy: Tëyajtën, tëëjës yë Wintsën njanty myëtëkoy, mëti'ipë yë Israel Tyios'ajtypyën. Ëjts ya'atës të ntuuntëkoy:

²¹ Mëti'ipë jam winë të yajpaatyën ma Jericó kajpnën, tu'ukës yë mëjwit të n'ixy janty'oy mëti'ipë kojpën Babilonyë, mäjtsk tsim naxy ja poop pujxn meeny, tu'kkäpy yë pu'ts pujxn, jä'ä jye'emtyëty naxy kujkmtsim. E ëjts janty këjääjës të n'ixy, paatyës të ntony, jamës të nmënëjkxy maas yë ntëjkën etsës të nitajy ntëjk'itkujkyës. Ja poop pujxn pa'tkë'pës të npëjktä'äky.

²² Ënet ja Josué poj'am tkejxy nimäjtsk nitëkëëk ja ja'ay jam ma ja Acán ja tyëjkën ets ojts jam tjuutë ja wit meeny mëti'ipë Acán ënety jam yu'utsy yaj'ijtypyën.

²³ Tä tukninëjkxtë ja Josué ets ja Israel ja'ayëty ets tukë'ëtëjkëtyë ja Wintsën.

²⁴ Ënet ja Acán jam tmëtso'ontë ets tyajnëjkxnëtë ma tu'uk ja it naaxwiinyëtë txëëwatyën Acor mëët ja pu'ts pujxn ets ja poop pujxn, ja wyit tyujkxy, y'u'unk tyo'oxytyëjk, y'u'unk y'ëna'k, jyëyujk tsyajpkaa, tsyajppax kyupixyny ets tëkokyë jënu'un ënety winë tmëëtëtyën.

²⁵ Ënet ja Josué t'ënëmaay: ¿Tii ko jëtu'unpë ëyo'on jotmay të xyajminy ma ja naax kajpnën? Tyam wä'än yë Wintsën yë'ë ëxëëk mtunyë, jëtu'un tä ëëts miits të xyajjat të xyajkëpätën. Ko jëtu'un kyajpxtaay ja Josué, ënät nitu'kë'ëyë ja ja'ayëty ojts pyëtë'kta'atë ets tyaj'o'ktë ja Acán kuka'atsy, ko y'o'këtäky ja nyini'kx ojts tnino'këtë.

²⁶ Ok ojts may tuknipiwtë yë tsaa, tyampaat je'eyëm jam tsaanipiy yaj'ixy. Paaty ojts txëëwmo'otë ja it naaxwiinyëtë Acor. Koonëm jëtu'un jyajtë kyëpäjtë täänëm ja Wintsën ojts tuk'ëwa'anxeemy ja Israel kajpn.