Josue 6 - Biblia Dc en Mixe de Quetzaltepec

Wi'ix tuknipëjktakëtyë ets ja Jericó kajpn tnitëkëja'antë

¹ Jam ma Jericó kajpnën ni pën ënety jam kya'ëktëjkënë ets kya'ëkpëtsëëmnë. Jä'ä ko tëë ënety ja tëjk'aaw y'ëtujkta'ay, këtiipë ja Israel ja'ayëty jap tyëkëtëty kajpnjoty.

² Paaty ja Wintsën t'ënëmaay ja Josué: mijts yam ntukë'ëtëjkëp tääpë naax kajpn mëët yë nyiyajkutujkpë ets tsyiptuunpëtëjk.

³ E miitsëty tsiptuunpëtëjkëty winjëpom xynya'ëwtitëty tääpë kajpn ets jëtu'un kya'pxëty tëtujk xëëw.

⁴ Ëpëky ja teetytyëjkëty niwëxtujk twinye'eytyëty ja kaaxë mëti'ipë yë käjpxytyu'unën myë'ijtypyën. Nitu'ukjaty ja teety aak myëët'atëp ja xyuxn, yë'ë tsajppaxwaj. Ko wyëxtukxëëwpätëty, wëxtujk'ok nëjkx xynya'ëwtitë ja kajpn, e ja teetytyëjkëty jä'ä ja xuxn tyukxu'uxtëp.

⁵ Wi'ix xymyëtowtën ja xuxn xyu'uxy, jëtu'un mëk jyänty yujkya'axtëty ets nëjkx ja potsy kyëtäy ets nitu'ukjaty ënätyë xynyitëkëtëty ja kajpn.

⁶ Ënet ja Josué ojts tmëkajpxmujkta'ay ja teetytyëjkëty ets t'ënëmaay: Mënëjkxtë yë kaaxë mëti'ipë yë käjpxytyu'unën myë'ijtypyën, mëti'ipë yë Dios jyä'ä'ajtypyën; niwëxtujk jam mnäwyimpiwëtëty mëti'ipë jëjp'am nëjkxtëpën ma ja kaaxë yajmëye'eyën ets yë'ë tyukxu'uxtëp ja tsajppaxwaj.

⁷ E yë naax kajpn tyaa t'ënëmaay: Miitsëty nëjkxtë jam ma kajpn pa'ajën ets xynya'ëwtitëty. Ja ye'etyëjktëjk mëti'ipë tsip'ixëtyën jam nyëjkxtëty jëjp'am ma ja kaaxë tmënëjkxtën mëti'ipë Wintsën jyä'ä'ajtypyën.

⁸ Ja ja'ayëty tyuuntaaytyë tä ënety ja Josué të tyuk'ënä'ämëtën. Ja niwëxtujkpë ja teetytyëjkëty jä'ä wyinye'eytyëp ja Wintsën ja kyaaxë ets ja xyuxn tukxu'uxtë, e jam ix'am jam ja kaaxë yajmëye'ey.

⁹ Ja ja'ayëty mëti'ipë tsip'ixyëtyën jä'ä jëjp'am nëjkxtëp ma ja teetytyëjkëtyën, ëpëky näjyëtu'un nyëjkxtëpë tu'këëyi'iky ix'am ma ja kaaxë yajmëye'eyën, tyam ja teetytyëjkëty ja xuxn tjantyaj'ëna'antë.

¹⁰ E ja maytsyiptuunpëtëjkëty ojts ja Josué y'ënë'ëmxëtë ets amonyë ye'eytyëty, koonëm yë'ë kë'ëm y'ënë'ëmxëtëty jëna'a mëk yujkya'axtëtyën.

Wi'ix ja Jericó tnitëjkëtyën

¹¹ Josué jä'ä tni'ënä'ämëy tëkok tmëë'ëwtitëty ja kaaxë mëti'ipë ja Wintsën jyä'ä'ajtypyën ma ja kajpn pa'ajën winjëpom. Ko t'ëkmë'ëwtijta'atë tääts jatëkok nyëjkxtë ma ja tsyënaaytyaknëtyën ets jam ja tsuu tyajnaxtë.

¹² Komjëpom janty tsojk ojts yë Josué pyëtë'kojy mëët ja teetytyëjkëty ets tmëtso'ontë ja Wintsën ja kyaaxë.

¹³ Niwëxtujk ja teetytyëjkëty twinye'eytyë ja Wintsën ja kyaaxë, aakmëët ja xyuxnëty mëti'ipë tyukxuxtëpën. Ja ja'ayëty mëti'ipë tsip'ixyëtyën jä'ä jëjp'am ets ix'am nëjkxtëp. Ja xuxn ka'ap ninu'un y'ëmony.

¹⁴ Komjëpom ojts näjyëtu'un tna'owtitë ja kajpn, ko tna'ëwtijtaaytyë tääts wyimpijtë jatëkok ma ja tsyënaaytyaknëtyën. Jëtu'un ojts tna'owtitë ja kajpn winjëpom, tëkokjaty tëtujk xëëw jëtu'un y'ijty.

¹⁵ Ko wyëxtujkxëëwpejty janty tsojk ojts pyëtë'kojtë, ets tna'ëwtijtë ja kajpn, e ka'ap ojts jye'eyëty tu'k'ok t'ëkna'ëwtijtnëtë, wëxtujk'ok ojts tna'owtitë.

¹⁶ Ko ja teetytyëjkëty ojts ja xyuxnëty tukxu'uxtë ma ja wëxtujk'okpë kya'pxnën, ënät ja Josué ojts mëk kyäjpxy ets t'ënëmaay ja mayjyä'äy: tyam ya'axtë joktë ënät mëktä'äky, jä'ä ko yë Wintsën tëë tääpë naax kajpn tkë'ëyäky.

¹⁷ Ja kajpn ets tëkokyë jënu'un winë yajpaatyën ma yë'ëjën nëjkxëp kyutëkooytyä'äy, jä'ä ko yë Wintsën tëë tni'ënä'ämë ets tëë kë'ëm ëpëky timpyëjktä'äky. Yi'iyë nëjkx wyi'imy yë Rahab mëti'ipë jyot nyini'kx tyo'kpyën, mëët yë jyiiky myëku'uk tyaak tyeety ets tëkokyë jënu'un jap yajpaatën ma tyëjkën, jä'ä ko ojts tyu'utsy ja mëti'ipë ojts jam ja kajpn t'ixtën tuntën, mëti'ipë yajkäjxtën.

¹⁸ E miitsëty këtii nitii xytyontëty mëti'ipë yë Wintsën të tyajkutukyën kyutëkoyëty, jä'ä ko tii xytyoontëpëty tsojk naax kajpn ëxëëk jyatëty kyëpätëty ets nëjkx pokymyëët wyi'imy.

¹⁹ Yë'ë tëy ja pu'ts pujxn, poop pujxn, tsuxkpujxn ets juunpujxn nëjkxëp yajpëjkë'ëky ets jap yajpëjkta'akëty ma ja apëjkënën ma ja wit meeny nyipetyën mëti'ipë ja Dios jyä'ä'ajtypyën.

²⁰ Ënet ja ja'ayëty tyëjkëtyë yaxpë jojkpë ets ja xuxn näjyëtu'un tjantyyaj'ënantë. Ko yë Israel ja'ayëty tmëtoowtë ja xuxn tyëjkëtyë xuxpë, ënät ojts ni'ikyë mëk jyänty'ënaanta'aktë koonëm je kajpn nyakëtaawtutaay, jä'ä ko napotsy ënety yajpaaty. Ënet tyëjkëtyë kajpnjoty ets ojts tniwa'kta'atë.

²¹ Yaj'o'ktaaytyë ja ye'etyëjk, to'oxytyëjk, mëjja'ay, mutskja'ay, jëyujk, tsajpkaa, yë tsajppax ets kupixyny. Wa'ats winë tyajkutëkooytyääytyë.

²² Ënet ja Josué t'ënëmaay ja nimäjtskpë ja ja'ayëty mëti'ipë ënety ja kajpn ëka'any të t'ixtën: Nëjkxtë yajpëtsëmtë ja to'oxytyëjk mëti'ipë jyot nyini'kx tyo'kpyën, mëti'ipë ojts myu'utsëtën, mëët tëkokyë jënu'un jap mëët yajpaatën, jëtu'un tä ojts mëët xykyäjpxy'atën.

²³ Tä ojts tnitëkëtë ja Rahab ets tyajpëtsëëmtë mëët ja tyaak tyeety jyiiky myëku'uk ets jënu'un ënety jap yajpaatën ma tyëjkën. Jam tyajnëjkxtë kajpnpë'am ma ka'ap kyutsë'ëkëtyën.

²⁴ Ënet ja Israel ja'ayëty tjëën'ixko'onëtyë ja naax kajpn ets tyajtooytyëkooytyë, yi'iyë ojts ka'ap tnino'oktë ja pu'ts pujxn, poop pujxn, tsuxkpujxn ets ja juunpujxn mëti'ipë jap myënëjkxtën ma ja Dios ja wyit myeeny nyipetyën.

²⁵ Ja Josué ojts ja Rahab tnime'kxy mëët ja tyaak tyeety ets ja jyiiky myëku'uk, jä'ä ko yë'ë ojts tyu'utsy ja ja'ayëty mëti'ipë ojts ja kajpn t'ixtën tuntën jam Jericó. E tyampaat yajpatëp yë Rahab yë y'u'unk y'ok ma Israel ja'ayëtyën.

²⁶ Ënet yë Josué ojts yajxon timnyikäjpxy ya'atë aaw ayuk mëët yë Wintsën xyëëwkyëjxm ets y'ënäny: Poky nëjkx yë ja'ay wyi'imy mëti'ipë ok kyoj'o'oyëpën ya'atë Jericó kajpn. Ko tkojtsoonëty ja kajpn potsy'ëjx yë'ë nëjkx y'ooky ja kyä'äxkopk, e ko tpëjktaknëty ja nyi'akaj yë'ë nëjkx y'ooky ja kyutëëm.

²⁷ Yë Josué mëj këjää ojts Wintsën pyutëkëty ets mëj'äämpy muum yajnikäjpxy.