Josue 5 - Biblia Dc en Mixe de Quetzaltepec

Jam Guilgal ojts tsyënaaytyaknpëktë, ja Israel ja'ayëty

¹ Tëkokyë yë yajkutujkpëtëjk mëti'ipë ënety jam yajpatëpën xëëwkëtä'äkytsyow ma ja Jordán mëjnëëjën, ets ja yajkutujkpëtëjk Canaán ja'ayëty, jampë tsyëënëtën winkon ma ja naax mejy'itkujkpyën; ojts nijawëtë ko ënety ja Dios ja Jordán mëjnëë të tyajtë'ëtsy ma ja Israel ja'ayëty nyajxtën, paaty ojts tsyë'ëkëtë ets ka'ap tnipëtë'ktë ja Israel ja'ayëty.

² Ënet yë Wintsën t'ënëmaay ja Josué: Oytyun mäjtsk tëkëëkën yë tsujkn, yë tsaa mtuk'oytyunëp ets xynyatsujk'ëwtijtëty ja ye'etyëjkajtën ja Israel ja'ayëty mëti'ipë ka'ap ja nätsyukë tpaatënëm.

³ Tä ja Josué ja tsujkn tjanty'oytyuuny ets ojts tnatsujk'ëwtijta'ay ja ye'etyëjk'ajtënëty ja ye'etyëjktëjk jam ma ja Aralot kopkën.

⁴ Ya'atë nätsyukë paatykyëjxm ojts jëtu'un tuny, jä'ä ko ja ja'ayëty mëti'ipë jap tso'ontën Egiptë tëë ënety ja xyëëw jyëmëjt tpatnëtë ets nyëjkxtëty tsiptuunpë, ojts ja y'o'ktaaynyëtë jam të'ëts'itjotm.

⁵ Ja Israel ja'ayëty mëti'ipë jap Egiptë tso'ontën oy ënety aak tsuky jyayajpaatë, ja mëti'ipë mëxu'unk'ajtën jam të'ëts'itjotm ka'ap ënety tsyuky'atë.

⁶ Yë Israel ja'ayëty wëxtyikxy jëmëjt jam jyëtijtë të'ëts'itjotm, ja ja'ayëty mëti'ipë jap tso'ontën Egiptë tëë ënety y'o'ktaaynyëtë, mëti'ipë jyëkyäjpnëtëp tsyiptuntëty. Tääpë ja'ayëty ka'ap ënety të tmëmëtowtë ja Wintsën, paaty ojts yajxon tyim'ënëmxëtë ko ka'ap nëjkx tyëkëtë ma ja it naaxwiinyëtën mëti'ipë të yaj'ëwaanëtën ja y'ap y'okëty ko yë'ë yajmo'oja'antë ja it naaxwiinyëtë ma ja jë'kxy pëky ka'ap y'ëmaaytyä'äkyën.

⁷ E paaty kyëjxm jëtu'un yë Josué natsujk'ëwtijtaay ja ye'etyëjktëjk ja ye'etyëjk'ajtënëty mëti'ipë ënety ok të myintën naaxwiiny, mëti'ipë ja Dios pyëjktakën kutëkats ma ja mëti'ipë të y'ooktën, jä'ä ko yë'ëjëty ka'ap ënety tsyuky'atë, jä'ä ko tu'ujoty yajpaatë.

⁸ Ko ojts yajtsujkta'atë ojts t'ëmaay'atë kanaak xëëw koonëm yajxon tsyoktaaytyë.

⁹ Ënet yë Josué y'ënëmaayë Dios: Mëët ya'atë nätsyukë yë'ëjës mëët të njëpëky ja tsëtyu'un ma Egiptë ja'ayëtyën. E paatykyëjxm tampë it naaxwiinyëtë yajtijy Guilgal.

¹⁰ Yë Israel ja'ayëty jam ojts tsyënaaytyaknpëktë Guilgal, e ko myajkmajkts'aany ja po'o jää ojts tnixëëwtuntë ja ëmaayxyëëw, ma ja mëj joyën mëti'ipë Jericó kajpn jyä'ä'ajtypyën.

¹¹ Jä'ä xëëw ojts tkaytyë ja tsajpkääky ka'apë tsyooymyëëtëtyën ets näjyëtu'un yë tsajpmoktë'ëts; e ko komjëpom yë'ë ojts tjë'kxnëtë mëti'ipë ijtp wintëëpën ma tampë ja it naaxwiinyëtën.

¹² Jä'ä xëëw ojts t'ëxmajtsnëtë ja maná, ka'ap ojts t'ëkaaynyëtë. Ja jë'kxy pëky mëti'ipë jam yajpatpën ma tääpë it naaxwiinyëtën jä'ä ojts tjë'kxnëtë.

Josué mëët ja Wintsën ja tsyiptuunpë kopk

¹³ Tëkok ojts jyäty kyëpety, jam ënety yë Josué yajpaaty winkon ma Jericó kajpnën, ko tu'uk yë ja'ay nyimiinë mëët yë yenypyujxn jam kyë'ëkëjxm, ënät ja Josué ojts tninëjkx ets tyajtëëy: ¿Wi'ix miny ëëts xypyutëkëjantëpë ëkë mëtsip mputëkëjäämpyë?

¹⁴ Ënet ja ja'ay y'ëtsooy: Ka pënës nkaputëkëja'any. Ëjts Tiosës xykyäjxjëtijtp, yë'ëjës niwintsën'ajty yë kyukäjpxytyëjkëty. Paaty ojts yë Josué ënätyë nyäkyoxtënaaytyä'äkyë ets tyajtëëy: ¿Tii yë Wintsën mtukmëkäjxëyëp maas ëjtsën?

¹⁵ Ënet ja Dios ja kyukäjpxy nyiwintsën, y'ëtsooy: Jän yë mkë'ëk, jä'ä ko tääpë it naaxwiinyëtë mëti'ipë mtukte'empyën ëmaay yë'ë. Ënet ja Josué ojts tjantyjyeny ja kyë'ëk.