Josue 4 - Biblia Dc en Mixe de Quetzaltepec

Ja majkmäjtskpë ja tsaa Jordán nëëjotypë yajju'tyën

¹ Tëë ënety ja Jordán mëjnëë tuknajxta'atë, ko ja Wintsën ojts tmëkäjpxy ja Josué:

² Win'ixtë ja'ay majkmäjtsk ma naax kajpnën, mëti'ipë kyutänëpën ja nimajkmäjtskpë ja Israel ja'ayëty.

³ Ets xy'ënëëmëty ko wä'än tjuutë majkmäjtsk yë tsaa jap nëëjoty, këëktu'uk tkoonë'ëktëty yë tsaa jap nëëjoty ma teetyëjk jap tyänëtën ets tmënëjkxtëty jam ma ja tsuu tyajnaxa'antën.

⁴ Ënet ja Josué twin'ijxy ja ja'ay nimajkmäjtsk ets twoowmujky,

⁵ tä t'ënëmaay: Tëkëtë jam nëë'itkujkm ma ja teetytyëjk tkëëy'itën ja kaaxë, mëti'ipë myë'ijtypyën yë käjpxytyu'unën ets xyjyuutëty jap nëëjoty këëktu'uk yë tsaa, jä'ä wyinë'atëty majkmäjtsk.

⁶ Yë'ë nëjkx jëna'a xytyukja'amyätstë ko tyam xytyuknaxtë ya'atë mëjnëë ets ko ënety jëna'a ja m'u'unk m'ëna'k myajtëwëtë: ¿Ya'atë tsaa nipiiwpetypë y'ityën tiijën jyanikäjpxyp?

⁷ Tääts xy'ëtsowtëty: Ëk'ix u'unk, ya'atë yë'ë nyikäjpxyp, ko tëëyëp ma ja Wintsën ja kyaaxë ojts yajmënaxyën ma ja Jordán mëjnëëjën ojts mäjtskpëky nyäwyä'kxyë ets jëtu'un'äämpy ojts të'ëts wa'ats yajmënaxy. E tyaapë tsaa nipiiwpetypë y'ityën yë'ë ijtp ijxpät ets yaja'amyätsëty mëti'ipë ojts tëëyëp tyunyën jyätyën.

⁸ Jëtu'un tjanty tyuuntë tä ënety ja Josué të y'ënë'ëmxëtën. Ojts jap tyëkëtë nëë'itkujky ets ja tsaa tju'të këëktu'uk, jä'ä wyinë'ajty ja tsaa majkmäjtsk, jëtu'un tä ënety ja y'aptëjk wyinë'atën ets jam tmënëjkxtë ma ënety të jyajta'aktën, ya'atë majkmäjtskpë tsaa, itkujky ojts tkoonta'aktë jëtu'un tä ënety ja Josué ja wyintsën Dios të tyuk'ëne'emyën.

⁹ Ëpëky ojts yë Josué näjyëtu'un tkoontä'äky majkmäjtsk yë tsaa jap nëëjoty ma ënety ja teetytyëjkëty të tmëtänëtën ja kaaxë mëti'ipë ja käjpxytyu'unën myë'ijtypyën. Tääpë tsaa jap ojts wyë'ëmtë tyampaat.

¹⁰ Ja teetytyëjkëty mëti'ipë kyiiytyëpën ja kaaxë, mëti'ipë myë'ijtypyën ja käjpxytyu'unën, jap ojts tmëwa'ak'oyëtë nëë'itkujky, tyam ja Israel ja'ayëty jyänty nyajxkojtë ets tuunta'atë tä ënety ja Wintsën të tni'ënä'ämën ma ja Josuéjën. Tu'kë'ëyë tuuntaaytyë tä ënety ja Moisés të tuk'ëne'emyën ja Josué. Ja ja'ayëty poj'am ojts jyänty nyajxkojtë,

¹¹ ko ja ja'ayëty nyajxtaaytyë ets aaktam ënätyëty nëë'awinm, ënät ja teetytyëjkëty ojts jëjp'am tmënaxtë ja Dios ja kyaaxë ma ja mayjyä'äyëtyën.

¹² Ojts näjyëtu'un tuknaxtë ja mëjnëë ja ja'ayëty mëti'ipë tsip'ixëtyën, yë Rubén yë jyä'äy, Gad yë jyä'äy ets kujkwä'kxy yë Manasés yë jyä'äy. Tyaapë ja'ayëty jëjp'ixy ënety tyim'itë mëët ja mëti'ipë myëtsiptuuntëpën, xëmë jëjp'am ye'eytyë ma ja myëku'uktëjkëtyën, jëtu'un tä ënety ja Moisés të tni'ënä'ämën ma ënety jyaak juukyëtynyëm.

¹³ Ja ja'ayëty mëti'ipë tsip'ixyëtyën jä'ä nyimay'ajtë wëxtyikxy mil ets jëjp'ixy tyimyajpaatë mëët ja mëti'ipë myëtsiptuuntëpën oy jëna'a tsyokëtëty. Waatswitsy ye'eytyë Dios wintum ets jamtsow nyëjkxtë ma ja joyjyotën mëti'ipë yë Jericó nyitënääpyën.

¹⁴ Jä'ä xëëw ojts yë Dios tyajkutuky ets tëkokyë yë Israel ja'ayëty mëj'äämpy tyajnaxtëty yë Josué ets twinkutsë'ëkëtëty, tä ja Moisés ënety të twinkutsë'ëkëtën ko jyuuky'äjty.

¹⁵ Ënet ja Wintsën t'ënëmaay yë Josué:

¹⁶ Ënëëmë yë teetytyëjkëty mëti'ipë kyiiytyëpën yë kaaxë, mëti'ipë myë'ijtypyën yë käjpxytyu'unën, wä'än jap nëëjoty tpëtsëmtë.

¹⁷ Tä ja Josué tjanty y'ënëmaay ets pyëtsëmtëty.

¹⁸ Tim je'eyë ojts pyëtsëmtë ja teetyëty jap nëëjoty ma ja Jordán nëëjën ets wya'ak'o'oyëtyë jam nëëpë'am, ënätyë ojty ja nëë jatëkok nyämyukyë ets pyëyë'ktso'ontë janty kom, jëtu'un tä ënety të y'ëk'ijtpën.

¹⁹ Yë Israel ja'ayëty jä'ä jam tsyo'ontë Jordán, ma myajk'anyën ja mëtu'kpo'opë, mëti'ipë tso'ontakpën jëmëjt'ëjxy ets jam jyajtë Guilgal ma tsyënaaytyaknpëjktën, winkon mëët yë Jericó wyi'imy.

²⁰ Jam ojts ja Josué tnikoonpäjta'ay ja majkmäjtskpë ja tsaa mëti'ipë ënety të tmëtsoontën jam ma Jordán mëjnëëjën

²¹ ets t'ënëmaay ja Israel ja'ayëty: Ko jëna'a yë m'u'unk m'ëna'k myajtëwëtëty ets y'ëna'antëty: ¿Ya'atë tsaa tiijën jyanikäjpxyp?

²² Ets xytyukmëmëtya'aktëty wi'ix yë Israel kajpn tuknajxyën yë Jordán mëjnëë të'ëts wa'ats.

²³ Wi'ix ojts nyäwyä'kxyën mäjtskpëky ets ojts të'ëts wa'ats mnaxtë, jëtu'un ijxtëm ojts jam Tsapts mëjmejy jyäty kyëpetyën, ko ojts ja mejy yajtuknaxy.

²⁴ Jëtu'un nëjkx tëkokyë ja naax kajpn tnijawëtë naaxwiinyëtë apëtsëmy ko yë Wintsën mëj ets jaanty yë'ë. Miitsëty yë'ë xëmë m'ëwtatëp ets xymyëjjaw xy'oyjyawëtëty, tääpë Wintsën mëti'ipë miits mTiosajtëpën.