Josue 24 - Biblia Dc en Mixe de Quetzaltepec

Ma Josué nyäjyëkajpxënën

¹ Ënet yë Josué tyajtu'ukmujktaay yë Israel ja'ay jam Siquem. Ojts tmëkajpxmuky jam Wintsën wintum yë mëjja'aytyëjkëty, kopktëjkëty ets tsiptuunpë wintsëntëjkëty,

² ets t'ënëmaay ja naax kajpn: Jëtu'un yë Wintsën y'ënä'äny mëti'ipë Tyios'ajtypyën yë Israel ja'ayëty: Tëëyëp ma jyuuky'äjtyën yë Térah, yë Abraham ets Nahor yë y'u'unk y'ëna'k, miits yë m'ap m'okëty jampë tsyënaaytyën nëë''ëkë'ëm ma ja Éufrates mëjnëëjën.

³ E jamts jëtu'un yë Abraham nyajtso'onyës ma ja Éufrates nëëpa'ajën etsës ojts nyajjëtity ma ja Canaán ja y'itjot nyaaxjotmën. Täätsës nyajnimayëy ets jëyëjp nmooyës yë myaank Isaac,

⁴ e yë Isaac mäjtsk ja myaank y'ijty, Jacob ets Esaú. Yë Esaú yë'ëjës ojts nmo'oy ja Seir tunjot kopkjot ets yë'ë tnaax'atëty; yë Jacob ets y'u'unk y'ëna'k Egiptë ojts nyëjkxtë.

⁵ Ënätës nkejxy yë Moisés ets Aarón, etsës ntëytyuuny ja Egiptë ja'ayëty, koonëmës jap nju'ty ja Israel kajpn.

⁶ Ko miits ja m'ap m'okëty tsyo'ontë jap Egiptë kajpnjoty, yë Egiptë ja'ayëty ënätyë pyatso'onëtë mëët yë kyepy wintëkäämpë mëti'ipë myëtsiptuuntëpën ets kyëwaayëty, tyimpaja'ajtëtë jampaat ma ja Tsaptsmejyën.

⁷ Ënätës ojts xymyëkajpxtë, etsës ojts nyajkootsë itkujky ma yë'ëjëtyën mëët miitsëty, ënätës yë nëë näjyëtu'un najtsmajtsëy ets nyikoonpäjtaaytyë ja Egiptë ja'ayëty. Miitsëty ojts winë kë'ëm xy'ixtë mëti'ipës jap ntuunën Egiptë. Ok ojts jam jeky mjëtijtëpë të'ëts'itjotm.

⁸ Koonëm nyajmiintë ma ja nyaaxjotmën ja Amor ja'ayëty mëti'ipë a'oytsyow wë'ëmpën ma ja Jordán mëjnëëjën, ojts mjanipëtë'ëkëtë, mijts ojts mëta'aktë ets jëtu'un'äämpy xynyiwa'ktë ja nyaaxëty.

⁹ Ënet yë Balac, yë Zipor myaank mëti'ipë ënety jam ënä'ämpën ma Moab ja'ayëtyën ojts mnipëtë'ëkëtë näjyëtu'un, ojts tmëkäjpxy yë Balaam, yë Beor yë myaank ets mpokëtëty.

¹⁰ E ëjts ka'apës ojts n'ëwa'atsy ets ja Balaam mpokëtëty, ni'ikyë ojts mkënu'kxëtë, jä'ä ko jëtu'unës n'ënëmaay. Jëtu'un'äämpy miitsëty mtsoktë.

¹¹ Tää xytyuknajxtë ja Jordán mëjnëë ets mja'ajtë jam Jericó. Ja ja'ayëty mëti'ipë ënety jam tsënaaytyëpën Jericó, yë Amor ja'ayëty, Ferez ja'ayëty, Canaán ja'ayëty, Hit ja'ayëty, gergeseos ja'ayët, Heve ja'ayëty ets Jebús ja'ayëty ojts näjyëtu'un mnipëtë'ëkëtë e kajts xyajmëtaktë jä'ä koos ojts jëtu'un nyajkutuky.

¹² Ja nimäjtskpë Amor ja'ay yajkutujkpë ojts y'ooktë, ka'ap myiitsëty xyaj'o'ktë mëët ja mtëypyujxnëty ets ja mti'pxnëty, ëjts ojts ja nmëk'ajtënës nyajkëtä'äkyës miits mwintuuyëty ets yë'ë kyäktaaytyë ka'anëm ënety miits jam mja'tënëm.

¹³ Tëë miits nmo'otë yë naaxwiinyëtë ma ënety ka'ap nijëna'a të mtuntën ets ja naax kajpn ma ka'ap miitsëty të xykyojtën. E tyam jam mtsëënëtë ets yë'ë mjë'kxtëp ja aay ujts mëti'ipë ka'ap të xykyojtën. Ets ja Josué tjaaknikajpxëy ja y'ayuk:

¹⁴ Mëët tu'kë'ëyë ya'atë mëti'ipë yë Wintsën të tunyën, wintsë'ëkëtë ënät ets mëtuntë winë aaw winëjot. Ixmatstë yë wiink tios mëti'ipë yë m'ap m'ok y'ëwtajtën jam Éufrates mëjnëë'ëkë'ëm ets Egiptë naaxjotm ets mëtuntë yi'iyë tu'uk yë Wintsën tëypyë jaantypë.

¹⁵ E pën kajtsën xymyëtuna'antë yë Wintsën, tyam xytyimnikajpxtëty pën mpanëjkxantëp: nikajpxtë pën yë'ë mpanëjkxantëp ja wiink tios mëti'ipë ja m'aptëjkëty y'ëwtajtën jam Éufrates mëjnëë''ëkë'ëm, ëkë tiosëty mëti'ipë yë Amor ja'ayëty y'ëwtajtëpën yaapë tsyënaaytyën. E ëjts mëëtës yë n'u'unk n'ëna'k etsës yë nkujëën nkutëjk yë'ëjës yë Wintsën nmëtunantëp.

¹⁶ Ënet ja naax kajpn y'ëtsooy: Ka'ap mëpaat, yë Wintsën t'a'ixë etsës yë wiink tios npanëjkxtëty.

¹⁷ Yë Wintsën yë'ë jëtu'un ojts jap xyjyuutës Egiptë kajpnjoty ets näjyëtu'un ja n'ap n'okëtyës, ma ënety jap je'eyë n'ëyow nmëtuntësën. Ojts mëj këjää ja myëj'ajtën tyaj'ixyë ets ojts xypyutëkëtës koos në'ë'am tu'u'am nyajpatë ets koos kanaak yë naax kajpn ntuknajxtë.

¹⁸ Yë'ë ojts tyajkutëkooytyä'äy ja kajpn maajaty ojts najxëmën ets yë'ë näjyëtu'un yajkutëkooytyääy ja Amor ja'ayëty mëti'ipë ijty yaa tsënaaytyëpën. Mëët ma ya'atë tëkokyë të tuny të tkäjpxyën tsojk ënät nmëtu'unëm ja Wintsën, jä'ä ko yë'ë nTios'ajtëm.

¹⁹ E ja Josué tyaa y'ëtsoowëtë: Miitsëty ka'ap xyjyëkyäptë Dios xymyëtuntëty. Jä'ä ko wa'ats yë'ë ets ni'äkë'ajtp; ko pën je'eyë kyäjpxykyutëjy ets pyokytyuny, ka'ap jëtu'unyë tnani''ijxnaxy.

²⁰ Paaty miitsëty yam n'ënëëmëtë pën mpuwa'ktutëp yë'ë ets wiink tios xypyanëjkxtëjkënëtëty, yë Wintsën Dios nëjkxëp mpuwa'ktu'utëtë ets myajkutëkoyëtë, oy ënety oy winë të tuny të tkäjpxy mëët miitskyëjxmëty.

²¹ Tä ja mayjyä'äy y'ëtsoowtë: Ka'ap jëtu'un jyata'any. Ëëtsëty Wintsënës nmëtunantëp.

²² Ënet ojts ja Josué y'ëtsoy: Miits yam kë'ëm m'ënantëp ko yë Wintsën xymyëtuna'antë. Jëtu'un, ëëts yam ëna'antë, jëtu'un y'ëtsoowtë.

²³ Tä ja Josué y'ëtsooy: Pën janty jëtu'un, jëpëjkta'atë yë wiink tios mëti'ipë mëët'ajtëpën ma mjëën mtëjkëtyën ets jootwinpitë winë aaw winëjot ma Israel ja'ayëty yë Wyintsën Tiosën.

²⁴ Ets ja mayjyä'äy y'ëtsoowtë: Ëëtsëty yë Wintsën nmëtunantëpës ets ntunantëpës mëti'ipë yë'ë nyikäjpxypën.

²⁵ Jä'ä xëëw yë Josué ojts tuny tu'uk yë käjpxytyu'unën mëët ja naax kajpn jam Siquem, ojts tmo'oy ja aaw ayuk ets ja ënä'ämën tëyajtën tii mëpaat tuntën.

²⁶ Jap tjaaypyäjtaay ma ja nokyën ma ja Wintsën Dios ja tyiyajtën myinyën ets jam tkujpëy tu'uk yë mëjtsaa kepypya'tkë'ëm ma tu'uk yë xoj'ëjxën ma ënety jam yajpaatyën ja Dios ja jyëën tyëjk.

²⁷ Ets t'ënëmaay ja naax kajpn: Ya'atë tsaa n'ënyääytyä'äkyësën, yë'ë wë'ëmp tä tu'uk yë ijxpäjtënën mëët ko yë'ë yaa tyam yaa yajpatp ets të tmëtoowta'ay tä ja Wintsën të y'ënä'änyën. Yë'ë mtuk'ixtëp ko ënety xy'ixtë ja Wintsën xymyëtëkoya'antë.

²⁸ Ko ja Josué myëtyaktaay, tä ojts ja ja'ayëty tkäjxtaaynyëpë ma ja nyaax kyajpnëtyën.

Ma ja Josué y'o'knën

²⁹ Wäänë jyaak'ijty, tääts ojts yë Josué y'o'knë, Nun yë myaank, mëti'ipë tmëtunyën yë Wintsën; jä'ä ënety yë jyëmëjnë mëko'px ja majk ko ojts y'o'knë.

³⁰ Ets jam tyajnaaxtëjkëtyë Timnat-sérah, ma ja nyaaxjotmën mëti'ipë jyä'ä'ajtypyën, jam yajpaaty ma ja kopkjotmën mëti'ipë nyitënääpyën yë Efraín, anëkëjxytsyow wyi'imy ma Gaas kopkën.

³¹ Yë Israel ja'ayëty myëtuuntë yë Wintsën ko jyuuky'äjty yë Josué ets ko ojts y'o'knë ojts tjaakmëtuntë, ma ënety jyaak juuky'atënëm ja mëjja'aytyëjkëty mëti'ipë y'ijxtë nyija'awëtyën tiijaty ja Wintsën tyuunën.

Ma ja José ojts ja wyääy pyajk yajnitajyën

³² Ja José ja wyääy pyajk, mëti'ipë ënety yë Israel ja'ayëty jap Egiptë kajpnjoty të tmëtsoontën, jam ojts tnitajtë ma ja Jacob ja nyaaxën mëti'ipë jyuuyën. Yë'ë ojts tyukmëtookyë yë Hamor, Siquem yë tyeety ets ojts tsyoowpatxëty mëko'px yë poop pujxn meeny, kom'ok yë'ë yajtukumaaytyë yë José y'u'unk y'ok.

Ma ja Eleazar ojts y'o'knën

³³ Ko y'o'ky yë Eleazar, Aarón yë y'u'unk, jam tyajnaaxtëjkëtë tunkëjxm ma ja nyaaxjotmën yë myaank Finees, mëti'ipë yajmooyën, jampë tunjotm kopkjotm yajpaatyën mëti'ipë yë Efraín nyitënääpyën.