Josue 22 - Biblia Dc en Mixe de Quetzaltepec

Ma ja Rubén, Gad ets kujkwä'kxy ja Manasés ja jyä'äy wyimpitën

¹ Koo jëtu'un tyuuntaay jyajtaayë, ënät ojts ja Josué tmëkäjpxy ja Rubén ja jyä'äy, ja Gad ja jyä'äy ets ja nikujkwä'kxypyë ja Manasés ja jyä'äy,

² ets t'ënëmaay: Miitsëty tëë xyjyänty tyuntë tä ojts ja Moisés mtuk'ënä'ämëtën, ja Wintsën ja tyuunpë, miitsëty janty'oy janty tsujës të xy'ëëwmëtow të xykyäjpxymyëtowtë.

³ Tsyampaat yaj'ixy ets jëtu'un të tyu'uye'ey ja xëëw jëmëjt; nijëna'a ja mëku'uktëjk të xykya'ëxmatstë ets tëë oy tsuj xy'ëëwmëtow xykyäjpxymyëtowtë ja Dios ja y'ënä'ämën tyiyajtën.

⁴ E Tyam tëë tjanty tyuunta'ay tä ojts tnikäjpxyën ets akujk jotkujk yajpatnëtë ja mjëëky mëku'ukëty, tyam jyëkyäjpnëp mwinpitëty ma ja mjëën mtëjkëtyën, ma ja m'u'unk mto'oxytyëjkëtyën ets ma ja mnaax mkajpnëtyën mëti'ipë ja Moisés mooyëtën Jordán mëjnëë awinaxy.

⁵ Mëti'ipë tëy miits n'amëtoowtëpën ets xytyuntëty, yë'ë ko xypyatuntëty xëmë ja ënä'ämën tëyajtën mëti'ipë ja Moisés yajmooyën, yë Dios yë myëtuunpë. Mtsoktëp mjawëtëp xëmë ja mWintsën Tiosëty ets yë'ë ja nyëë'aaw tyu'u'aaw mtimpyanëjkxëtëp, mëtowtëp ets mkäjpxyjyä'äkyukëtëp; yë'ë mka'ëxmatstëp ets winë aaw winëjot xymyëtuntëty ets tu'ukyë winma'any tu'ukyë winma'any.

⁶ Ko jëtu'un kyajpxtaay, tä ojts je'eyë t'ëkjaakënu'kxnë ets nyäy'ëxmajtsënëtë, tääts ojts tsyo'onëtë ets nyëjkxnëtë ma jyëën tyëjkëtyën.

⁷ Yë Moisés tëë ënety ëka'any tmo'oy ja nyaaxëty ja nikujkwä'kxypyë ja Manasés ja jyä'äy jam ma tu'uk ja it naaxwiinyëtë txëëwatyën Basán. E ja nikujkwä'kxy ja Manasés ja jyä'äy, jam ënety ja nyaax të myo'ojëtë ja Josué a'oytsyow ma ja Jordán mëjnëëjën; e ja mëjëyëjpë yë'ë ja Josué ojts tkënu'kxy ets ojts tkäjxwinpijnë nyëjkxtëty ma ja jyëën tyëjkëtyën.

⁸ Ets t'ënëmaay: tyam oy mwinpijnëtëty, mënëjkxtë ja mwit mmeenyëty, ja pu'ts pujxnën, poop pujxnën, tsuxkpujxnën ets ja juunpujxnëty; näjyëtu'un ja maywyit maytyujkxy mënëjkxta'atë ets yajwa'kxtë jam ma ja mjëëky mëku'ukëtyën mëti'ipë ja mëtsip të xypyëjkëtën.

⁹ Jëtu'un'äämpy ja Gad, ja Rubén ets nikujkwä'kxy ja Manasés ja jyä'äy ojts tpuwa'ktutnëtë ja myëku'ukëty Israel ja'ayëty jam Siló, ma ja Canaán itjotmën ets ojts wyimpijnëtë ma txëëwatyën Galaad, ma ënety ja Moisés ja nyaax kyam të myo'ojëtën mëti'ipë ojts yë Wintsën tim nyi'ënä'ämën.

Ja wintsë'këntyakn jampë ma ja Jordán mëjnëëjën

¹⁰ Ko ja Rubén, ja Gad ets nikujkwä'kxy ja Manasés ja jyä'äy jam jyajtë ma ja Jordán mëjnëëjën, Canaán y'itjotm; ënät ojts jam tyajpëtë'ëktë tu'uk yë wintsë'këntyakn.

¹¹ Ko ja wiinkëtypë ja Israel ja'ayëty tnija'awëtyë ko yë Rubén, Gad ets nikujkwä'kxy ja Manasés ja jyä'äyëty tëë tyajpëtë'ëktë tu'uk ja wintsë'këntyakn jam ma mëët nyäpyaatëtën ja Canaán it, winkon ma ja Jordán mëjnëëjën, ma ja Israel ja'ayëty ënety tnitënaaynyëtën.

¹² Ko ja Israel ja'ayëty tnija'awëtë, ënät ojts jam tyu'ukmuktë ma ja Siló kajpnën ets tnitsoona'antë ja myëku'ukëty ets nëjkx mëët tsyiptuna'antë.

¹³ Yë'ë ojts jëyëjp tkäxtë yë Finees, yë teety Eleazar yë myaank, jam Galaad ma ënety jam yajpaatën yë Rubén, Gad ets je nikujkwä'kxypyë ja Manasés ja jyä'äy.

¹⁴ Ojts näjyëtu'un ëpëky pyanëjkxëtë nimajk yë mëjja'aytyëjkëty mëti'ipë kyutënaaytyëpën ja myëku'uktëjk.

¹⁵ Tä ojts tyu'upëktë ets jam jyajtë Galaad ma ënety jam yajpaatën ja Rubén, Gad ets nikujkwä'kxy ja Manasés ja jyä'äy, tääts t'ënëmaaytyë:

¹⁶ Ëëtsëty yë'ë Dios yë nyaax kyajpn yam yë y'aaw y'ayuk nmëmiinëtëpës; ¿Tii ko yë wiink winma'any xypyaatë ets ja Wintsën xymyëtëkoytyë, mëti'ipë yë Israel ja'ayëty Tyios'ajtëpën? ¿Wi'ix ko ya'atë wintsë'këntyakn të xykyojtë ets xykyäjpxy kumëtoownaxtë ja Wintsën?

¹⁷ ¿Wi'ix, namaa natiijën xyjyawëtë yë nëë poky mëti'ipë tyuuntën ja Peor kajpn mëti'ipë tyampaat ka'ap yajja'atyëkoynyëm ets ko ja ja'ay may tku'o'këyë?

¹⁸ ¿Këtiijën mjotkëta'aktë mëët tääpë nëë pokyë? Paaty wiinkpë xytyuun'ëtë'ëtstë ets Wintsën ni'ikyë xymyëjëkämkä'äktë. Pën miitsëty mkäjpxykyumëtoownajxtëp yë Wintsën, jëpom tëë ënety tnatukjoot'anpëjktaaynyë tëkokyë yë Israel ja'ayëty.

¹⁹ Pën miitsëty m'ënantëp ko ya'atë naaxwiinyëtë ka'ap y'oyëty ets Wintsën yaa yaj'ëwtatëty, mintë yaa ma ja Wintsën ja y'it nyaaxwiinyëtën, ma yajpaatyën ja wyittëjk ets xyjyä'äpëktë yë mnaaxëty ma ëëtsëtyën. Je'eyëp ko këtii nëkoo xykyäjpxy kumëtoownaxtë yë Wintsën ets ëëtsëty, ko wiinkpë wintsë'këntyakn xyajkojtë.

²⁰ Ja'amyätstë ko yë Acán yë Zara myaank ojts yë Dios tmëtëkoy ko ojts tyu'utsy mëti'ipë ënety ja Wintsën yë'ë të yajtuknipëjktaakën ets mëët yë'ëkyëjxm tëkokyë ja Israel kajpn y'ëyo'onpataay. Tääts yajja'akyukë ko yë Acán ka'ap y'atu'ukëty je'eyë ja pyoky tku'o'këy.

²¹ Ënet ja Rubén, Gad ets ja Manasés ja jyä'äy nikujkwä'kxy y'ëtsoowtë:

²² Yë Wintsën, mëti'ipë nyiTios'ajtypyën wiinkëtypë tiosëty, wa'ats tnijawë ko ëëtsëty ka'apës ya'atë wintsë'këntyakn të nyajpëtë'ëktë mëët ko nkäjpxykyumëtoownaxtës ëkë ko n'ëxmatstës. Yë'ë nyija'ap wa'ats ets tyam miits ntuknijawëtë; e pën kajts jyëtu'unëty, yaj'o'ktëkës.

²³ Pën ya'atë wintsë'këntyakn yë'ëkyëjmës të nyajkojtë ets Wintsën n'ëxmatsa'antës, ëkë ets ntukwintsë'ëkëja'antës yë wyintsë'kën nino'okpyë ets aaytyëëm ujtstëëm, ëkë ets ja nay'ëëw'oy näykyajpx'oyë ntuna'antës mëët yë'ë, wä'än kë'ëm tpaye'ey yë Wintsën pën tëëjës nmëtëkoytyë.

²⁴ Mëti'ipë tëy, tyam yajxon ntuk'ëwaanëtëty, ëëtsëty paatyës ya'atë wintsë'këntyakn të nyajpëtë'ëktë këtiipë jëna'a miitsëty ja m'u'unk m'ëna'këty t'ënëëmëtëty ëëts ja n'u'unk n'ëna'këty: ¿Miitsëty wi'ix ko yë Wintsën xy'ëwtajtëpë?, kajts miitsëty xyTios'atë.

²⁵ Yë Dios yë'ë të tpëjktä'äky ya'atë mëjnëë ets yë'ë tsyëpa'an'atëty ets Rubén, Gad ëpëky wyë'ëmtëty. Miitsëty ka'ap ninu'un mpaatëtë ets Wintsën xy'ëwtatëty. Jëtu'un'äämpy ënety miits ja m'u'unk m'ëna'këty je'eyë tyajjotma'atë ëëts ja n'u'unk n'ëna'këty ets ka'ap ja Wintsën t'ëkmëjpëjktaknëtëty.

²⁶ Paaty ëëts wiinkpë yë wintsë'këntyakn të nyajkojtë, e ka'ap yë'ëkyëjxmëty ko ëëts ja Wintsën ja wyintsë'kën nmo'oja'antë ja nino'okpyë ets ja wiinkëtypë ja wintsë'kën.

²⁷ Ëëtsëty tyaajës të nmay të ntajtë ko tääpë wintsë'këntyakn të nyajkojtës yë'ë wa'anëp ijxpät ma ëëtsajtëmën ets ma n'u'unk'ajt n'ok'ajtëmën; jëtu'un tjëkyäpëty ëëts ja Wintsën näjyëtu'un ntuknimintëtyës ja wyintsë'kën ets mëët ntuntëtyës ja nay'ëëw'oy näykyajpx'oyë. Jëtu'unkyëjxm ka'ap miits ja m'u'unk m'ok jëna'a y'ëna'antëty: Miitsëty ka'ap mpaatëtë xy'ëwtatëty näjyëtu'un yë Dios.

²⁸ Ëëtsëty jëtu'un të nmay të ntajtës, ko ënety pën jëna'a xy'ënëëmëtës ko ëëtsëty ets n'u'unk n'okëtyës, nëjkxëpës n'ëtsowtë: Ix, yë n'ap n'okëtyës yë'ë ojts ya'atë wintsë'këntyakn tkojtë, e kajts ojts yë'ë tuknikojëtë ets jam ja wintsë'kën yajyakëty, paatykyëjxm ojts yajkojy ets yë'ë ijxpät wya'anëty ma ëëtsajtëmën.

²⁹ Dios ëëts xypyutëkëtëp ets ka'ap yajkäjpxykyumëtoownaxëty ets ka'ap yaj'ëxmatsëty; ka'ap mëpaat yajkojy wiinkpë wintsë'këntyakn ma yajyakëtyën ja nino'okpyë wintsë'kën ëkë maa yajyakëtyën yë aaypyajk ujtspajk ëkë wiinkëtypë wintsë'kën ets wiink tios yajmoopyëty, yaj'ixtijëty ja nWintsën'ajtëm Dios, jampë yajpaatyën ma ja wit tëjkën ma näpyaatë y'ityën.

³⁰ Ko ja teety Finees, ja mëjja'aytyëjkëty ets ja ja'ayëty mëti'ipë kyutënaaytyëpën ja jyiiky myëku'ukëty, mëti'ipë ënety jyämyëët'ajtëpën ja teety Finees, tmëtoowtë wi'ix y'ëna'antën ja Rubén, ja Gad ets nikujkwä'kxy ja Manasés ja jyä'äyëty, ojts oy tja'akyukëtë.

³¹ Ënet ja Finees, ja teety Eleazar ja myaank, y'ënëmaayëtë: Tyam yajnijawë ko yë Wintsën tää yajpaaty mëët ëëts'ajtëmë, jä'ä ko miitsëty ka'ap yë'ëjëty yë Wintsën të xyjyakäjpxykyumëtoownaxa'antë, jëtu'un'äämpy ëëtsajtëm të nitsokëmë ma ja Wintsën yë tyiytyu'unënën.

³² Ënet ja Finees mëët ja myëku'uktëjkëty ojts nyäjyëkajpxënëtë ets wyimpijnëtë, nyëjkxnëtë jatëkok jam Galaad ma ja Canaán y'itjotmën ma ënety ja nimaypyë ja Israel ja'ayëty jam yajpaatën. Ko yajtukmëmëtyaktë ja Israel ja'ayëty wi'ix ënety të y'ëtsowtën ja myëku'uktëjkëty.

³³ Oy ojts tmëtowtë ets mëj këjää ja Wintsën tja'awëkyëtaktë. Jëtu'un ojts ka'ap mëët tsyiptuunëtëpë ja Rubén, Gad ets ja nikujkwä'kxypyë ja Manasés ja jyä'äyëty.

³⁴ Yë Rubén ets Gad yë jyä'äyëty jä'ä ojts txëëwmo'otë ja wintsë'këntyakn Ijxpät, jä'ä ko y'ënantë: Ya'atë wintsë'këntyakn ijxpät wya'anëty ma ëëtsajtëmën jä'ä ko yë Wintsën yë'ë Tios'ajtp.