Josue 20 - Biblia Dc en Mixe de Quetzaltepec

1 Ja kajpn mëti'ipë tsoktakn waanpën mëti'ipë ja Israel ja'ay wyin'ijxtën

¹ Ënet ojts ja Wintsën tmëkäjpxy ja Josué ets t'ënëmaay:

² Ënëëmë yë Israel ja'ayëty wä'än twin'ixtë yë kajpn mëti'ipë tsoktakn wa'anëpën, jëtu'un tääjës ojts ntuk'ëne'emyën yë Moisés

³ Jam kyäktso'oktëty yë ja'ay mëti'ipë ja myëku'uk ka'ap tsyokyëty tyaj'ookyën, jëtu'un tkukä'äkëty ja ja'ay ja myëku'uk mëti'ipë ënety të y'ookyën.

⁴ Pën ënety käktso'okaanp jam jëyëjp jya'tëty ma ja kajpn yajnitëkën ets tnikajpxëty ma ja mëjja'aytyëjkëtyën tiikyëjxm ko kyäktso'oka'any. Täänëm tyajtëkëtëty ma ja kajpnën ets tmo'otëty tu'uk ja naax kam ma y'itëtyën.

⁵ Pën ja o'kpë ja myëku'uk pyaja'ajtyp jam ja yaja'ay'o'kpë ets näjyëtu'un tyaj'ooka'any, ja mëjja'aytyëjkëty ka'ap tkë'ëyaktëty ja ja'ay mëti'ipë ënety jam të kyäktso'okyën, jä'ä ko ka'ap tsyipkëjxmëty ja myëku'uk të tyaj'ooky.

⁶ Ja ja'ay mëti'ipë ënety käktsokpën kopkpëky ko tnikajpxëty pën janty tëy jëtu'un mëti'ipë ënety të tyuny të jyätyën ets nëjkxëp ja ja'ay myuktë ets tmëtoow'itëty. Jam nëjkx wyi'imy koonëm ja teety y'ookëty mëti'ipë ënety jä'ä xëëw tuunpën. Täänëm nëjkxy wyimpity jatëkok ma ja nyaax kyajpnën.

⁷ Ënet ja Israel ja'ayëty ojts tjantywyin'ixtë ja kajpn mëti'ipë tsoktakn wa'anëpën ma ja ja'ay kyäktso'oktëtyën, yë'ë ojts twin'ixtë ja Quedes kajpn. Jampë Galilea kopkjotm yajpaatyën mëti'ipë ja Neftalí nyitënääpyën; ja Siquem jampë kopkjotmën mëti'ipë Efraín nyitënääpyën; ja Quiriat-arbá mëti'ipë näjyëtu'un yajtijpën Hebrón ma ja kopkjotmën mëti'ipë yë Judá nyitënääpyën.

⁸ Ets näjyëtu'un jamtsow nëë'awinaxy ma ja Jordán mëjnëë jyënäkyën, ma ja nijoyën jampë wyi'imyën të'ëts'itjotm, a'oytsyow wyi'imy ma ja Jericó kajpnën. Yë'ë ojts twin'ixtë Béser mëti'ipë nyitënääpyën ja Rubén ja jyä'äy; e jam ma ja Galaad itjotmën yë'ë ojts twin'ixtë ja Ramot mëti'ipë ja Gad ja jyä'äy nyitënaaytyëpën, e ma ja Basán itjotmën yë'ë ojts twin'ixtë ja Golán mëti'ipë nyitënaaytyëpën ja Manasés ja jyä'äy.

⁹ Ya'atë kajpn mëti'ipë tsoktaknën paaty ojts twin'ixtë yë Israel ja'ayëty ets jam oypyënëty kyäktso'oktëty, wä'än yë'ë'atë jaaypyaat jaaypyo'kxyëty mëti'ipë kutsëna'ayëtëpën. Ja ja'ay mëti'ipë ka'ap ja myëku'uk tsoky tyaj'ookyën jam nëjkx kyäktso'oky, këtiipë ja o'kpë ja myëku'uk näjyëtu'un tyuuntëkoyën ets ënätyë tyaj'ooka'anëty ja mëti'ipë ënety të yaja'ay'ookyën ets ka'anëm yajxon yajnipaye'ey.