Josue 2 - Biblia Dc en Mixe de Quetzaltepec

Josué tkexy yë ja'ay ijxpë tuunpë jam Jericó

¹ Jam ënety yajpaatë Sitim ko ojts yë Josué tkexy nimäjtsk yë ja'ay jam Jericó ets nëjkx y'ixtë tyuntë ma ja naax kajpnën, jëtu'un t'ënëmaay: Nëjkxtë ixtë tuntë tääpë it naaxwiinyëtë ets xykyëwentëpëktëty wi'ix yajpaatyën yë Jericó kajpn. Ënet ojts nyëjkxtë ets jyajtë jam ma tu'uk ja to'oxytyëjk ja tyëjkën mëti'ipë ja jyot nyini'kx nyimeenypyijkpyën, jä'ä txëëwaty Rahab, jam ojts ja tsuu tyajnaxtë.

² E ojts ja ja'ay y'ixëtë ets tuk'ëwa'anëtë ja yajkutujkpë jampë yajpaatyën Jericó ets y'ënantë: Tëë yë Israel ja'ayëty nimäjtsk jya'të ya'atë xëëw ets t'ixa'an tuna'antë yë naax kajpn.

³ Ënet ja yajkutujkpë ojts nikäjpxykyäxë ja Rahab ets t'ënëmaay: Yajpëtsëm tääpë nimäjtskpë ja'ayëty mëti'ipë të mniminyën, jä'ä ko je'eyë nëkoo myintë ijxpë tuunpë ma naax kajpnën.

⁴ Ko yë Rahab jëtu'unpë aaw ayuk nyimiinë, ënät ojts poj'am tyu'utsy ja nimäjtskpë ja Israel ja'ayëty jam tëjkëjxm ets yaj'ëtsoowtë ja ja'ayëty mëti'ipë ënety ja aaw ayuk myëmiintëpën: Tëyajtën, tëëjës yë ja'ay xyjyänty nyimintë ya'atë xëëw, ëjts tiijës n'ëktuknijawëp maa tsyoontë.

⁵ Jää të nyëjkxnëtë ko të kyootsënyë, jä'ä ko jää yë tëjk'aaw y'ëtuky ma yajnitëkën yë kajpn, e ëjts ka'apës të nyajtëy maatsow të nyëjkxtë. E pën mpanëjkxtëpts ënätyë wä'än xynyajtspaatëtëty.

⁶ E ja to'oxytyëjk nëkoopë ojts je'eyë wyin'ëëny, jä'ä ko ja nimäjtskpë ja Israel ja'ayëty jap ënety tëjkëjxy të tyu'utsy ets të tnipe'eny mëët yë ujtstë'ëts mëti'ipë ja'ay yajwitkojpyën.

⁷ Ënet ja yajkutujkpë ja tyuunpë pëyi'ikyë tsyo'ontë jam kajpntum ets ojts tpanëjkxtë ja tu'u mëti'ipë nëjkxpën ma ja Jordán mëjnëëjën, tyimja'ajtë jam nëë'ëkë'ëm. Je'eyë tsyo'ontë ja tsiptuunpëtëjkëty tääts ojts ja tëjk'aaw ënätyë y'ëtuky ma ja kajpn yajnitëkën.

⁸ Ka'anëm ënety myaanaxtënëm mëti'ipë të nyëjkxtën ijxpë tuunpë, ko ja Rahab jap tëjkëjxy nyipäjtëtë ets y'ënëmaayëtë.

⁹ Ëjts wa'atsës nijawë ko ya'atë naax kajpn tëë yë Wintsën mo'ojëtë, paatykyëjxm yë naax kajpn tëë tsë'ëkë tyuktëjkëtya'ajëtë mëët miitsëty. Tëkokyë jënu'un yaa yajpaatën yajxon tsyë'kënëtë mëët miitskyëjxmëty.

¹⁰ Ëëtsëty wa'atsës nnijawëtë ko jap mtso'ontë Egiptë ets ko xytyuknaxantë ja Tsapts mëjnëëmejy. Ko Dios tyajtëtsy tääpë mëjnëëmejy poj'am ets të'ëts wa'ats xytyuknajxtë. Nija'awëtyëpës näjyëtu'un ko ojts xyajkutëkoytyë yë yajkutujkpë Sihón ets yajkutujkpë Og mëti'ipë ënety jam ënä'ämtëpën ma Amor ja'ayëtyën mëti'ipë yajpatëpën jam nëëwinnaxy ma Jordán mëjnëë jyënäkyën.

¹¹ Ko yajmëtoy'äty ko miitsëty ni pën mkawinkuwa'akëja'anëtë, ni'ikyë ja'ay tsyë'ëkëtë. Jä'ä ko Dios mëti'ipë mTiosajtëpën, jëtu'un Tyios'aty yaa naaxwiiny tä jam tsajpjotmën.

¹² Paaty yam n'ënëëmëtë ets xynyikajpxtëty yaa Dios wintuuy ko ka'ap ëxëëk xytyuna'antë ja njëëky nmëku'ukës, ko jëtu'un xy'oyjyawëja'antë tä yam miitsëty n'oyjyawëtën. Tuknija'awëtyëkës ko miitsëty jaanty yam m'ëna'antë,

¹³ yajtsoktëkës mëët ja ntaak nteetyës njëëky nmëku'ukëtyës ets tëkokyë jënu'un winë tmëët'atën. Këtiis xyaj'ook xyajtëkoytyëty.

¹⁴ Ënet y'ëtsoowëtë: Ëëts nëjkx kë'ëm ntimkyuwa'antës yë mjuukyajtënëty, këtii ni pën xytyuk'ëwaanëty mëti'ipës yam të nkuminëtën, ko yë Wintsën ënety ya'atë it naaxwiinyëtë ëëts të xymyo'otë. Miitsëty oy nëjkx myajjawëtë ets myajmëët'atë.

¹⁵ Yë Rahab jam ënety yë tyëjk tmëëtëty winkon ma ja mëjpotsyën mëti'ipë kajpn yajnatujkpyën, paaty ojts oy tjëkyepy wi'ix ja ja'ayëty nimäjtskpë tyajkä'äkëtyën, yë'ë mëët tkutëëynyäjxy tu'uk yë tejpxy jap tëjk'ëjxy, kajpn jëxkë'p.

¹⁶ Ets t'ënëmaay: Jäätsow nëjkxtë kopkjoty këtiipë mpaatëtëty mëti'ipë m'ixtaayëtëpën. Jam yu'utsy mnäyaj'itëtëty, tëkëëk xëëw, koonëm yë'ë wyimpitëty kajpnjoty. Täänëm mtsoontëty ets mnëjkxtëty.

¹⁷ Tääts ojts yë'ë y'ëna'antë: Këtii mayëty mtajëty tyam ëëts njot'atëty mëti'ipë yam të xy'amëtoyën.

¹⁸ E ko ënety ëëts nitëkëtë ya'atë naax kajpn yë'ë mkutëyëp ya'atë tsaptswit ma mtëjk nyi'ëwa'atsëtyën maas tyam të xyajkä'äktën. Nëjkxëp xyajtu'ukmujkta'ay ma mtëjkën yë mtaak, mteety, mjëëky mëku'uk ets tëkokyë jënu'un mëët mtu'kja'ayëtyën.

¹⁹ Jä'ä tëy, ko pën ënety kë'ëm pyëtsimy ma mtëjkën, kë'ëm ënety nyätyunyë ets ka'apës npoky'atëty. E ko pën nëkoo ëxaty mtunëtëty ma mtëjkën ets wi'ix mjatëty mkëpätëty mëët ja mëti'ipë jap yajpatëpën, ëjts nëjkx mpoky'atës ets nku'ëtsowtës.

²⁰ E pën mijts mnikäjpxypts ets mtuk'ëwa'anëp oypyënëty, mëti'ipës tyam të nkuminëtën, ëëtsëty ka'ap tiijotmay n'ëkmëët'ajnëtëtyës ets ntuntëtyës tä yam ëëts të nikajpxtën.

²¹ Oy jyëtu'un'atëty, jëtu'un ja to'oxytyëjk y'ëtsooy: Tä ojts tjëëkajpxnë ja ja'ayëty. Ja tsaptswit ojts jam këxtsumy tyajwë'ëmy ma tyëjk nyi'ëwa'atsëtyën mëti'ipë ënety të tukutëëynyäxyën ja ja'ayëty.

²² Ja nimäjtskpë ja ja'ayëty mëti'ipë ënety të yajkäxtën ijxpë tuunpë jamtsow ojts nyëjkxtë kopkjotm ets jam nyäyu'tsëtë tëkëëk xëëw, tyam ja tsiptuunpëtëjkëty wiinktsow tyäty'ixtaayëtëpë, nikä'äpyëm pyatëtë. Ënet tyimwinpijnëtë jatëkok kajpntum jam Jericó.

²³ Ja ja'ayëty nimäjtskpëpë mëti'ipë ënety yu'utsy të y'itën jam, ënät pyëtsëëmtë ets tsyo'ontë, tuknajxtë ja mëjnëë, jyajtë ma ja Josué ënety yajpaatyën ets tukmëmëtyaktaaytyë wi'ix ënety të jyat të kyëpätën.

²⁴ Y'ënantë: tääpë it naaxwiinyëtë tëë Wintsën xymyo'oyëmë. Yë ja'ayëty jampë tsyëënëtën tëë tsë'ëkë tyuktëjkëtya'ajëtë mëët ëëts'ajtëmë.