Josue 17 - Biblia Dc en Mixe de Quetzaltepec

Ja Manasés ja jyä'äyëty ja y'itjot nyaaxjotëty

¹ Ya'atë jëtu'un ja itjot naaxjot mëti'ipë ojts tyuka'ajëtën ja Manasés ja jyä'äy, mëti'ipë kyä'äxkopk'ajtypyën yë José. Mëjëyëjp ja Maquir mëti'ipë kyä'äxkopk'ajtypyën yë Manasés, yë Galaad yë tyeety. Tsip'ixy ijty yajxon, yë'ë ojts tyuka'ayë ja Galaad ja y'itjot nyaaxjot jampë yajpaatyën Galaad ets Basán, a'oytsyow wyi'imy ma ja Jordán mëjnëëjën.

² Ojts näjyëtu'un t'ijxpëtsëmtë mëti'ipë naax ënety nitu'ukjaty tukka'ajëtëp ja y'u'unk y'ëna'k yë Manasés: Ojts tyuka'ayë ja nyaax ja Abiézer, Hélec, Asriel, Siquem, Héfer ets ja Semidá mëti'ipë ja Manasés y'u'unk'ajt y'ok'ajtën, jä'ä jëtu'un ja y'ok'u'unk y'ok'ëna'k ja José.

³ E ja Selófhad, Héfer yë myaank, yë Galaad y'ok'u'unk; e yë Galaad, Maquir yë myaank, yë Manasés y'ok'u'unk. Yë Selófhad ka'ap ijty myaank, yi'iyë nyëëx nimëkoxk mëti'ipë xyëëwajtëpën Mahlá, Noá, Hoglá, Milcá ets Tirsá.

⁴ Ënet ojts tääpë to'oxy'ëna'këty tninëjkxtë ja teety Eleazar, Josué, mëjja'aytyëjkëty ets t'ënëmaaytyë: Yë Wintsën ojts t'ënëëmë yë Moisés etsës näjyëtu'un xymyo'otëty yë naaxëtyës, tä ja nmëku'uktëjkëtyës ja nyaax të tpëktën. Ënet ja Josué ojts tjantymyo'oy ja nyaaxëty ya'atë to'oxy'ëna'këty jëtu'un tä ënety të yajmo'otën ja myëku'uktëjkëty.

⁵ Jëtu'un'äämpy ojts ja Manasés majkpëky ja naax tjä'äpëky, ëpëky ja jampë Galaad ets Basán mëti'ipë a'oytsyow yajpatpën ma ja Jordán mëjnëëjën.

⁶ Jä'ä ko ja Manasés ja nyëëxëty jëtu'un ojts ja nyaaxëty yajmo'otë tä ja ye'etyëjktëjkëtyën. Ja it naaxwiinyëtë ma txëëwatyën Galaad, yë'ë ojts tmo'otë ja wiinkëtypë ja y'u'unk y'ok ja Manasés.

⁷ Ja it naaxwiinyëtë mëti'ipë yë Manasés jyä'äy'ajtën jä'ä ënety myëjwiinëty: jampaat tsyo'ontä'äky ma txëëwatyën Aser ets jyä'ty jam Micmetat, yë'ë mëët nyäwyinku'ixëty yë Siquem ets tyimnëjkxy jëtu'un ëpa'tkë'ëmtsow, jyä'ty ma ja nëëwookyën jam Tapúah.

⁸ Oy ënety ja Tapúah itjot yë'ë ja Manasés tjajä'ä'aty, ja Tapúah kajpn yë'ë jyä'äniwantëp yë Efraín ja'ayëty.

⁹ Jam ja tsëpa'an tsyoony ets kyuye'eynyäxy, tyimja'ty jam Caná wokjotm, tääts yajja'akyukë ko yë Efraín kyajpnëty jam ënety yajpaatë ma Manasés yë kyajpnëtyën, oy ja tsëpa'an ënety jam jyanaxy anëkëjxmtsow mëti'ipë ja Manasés jyä'äniwäämpyën, mëët ja mëti'ipë jam tso'onpën ets jyä'ty ma ja Mejyën Naax'akujkpyë.

¹⁰ Yë Efraín nyaax jam wyi'imy ëpa'tkë'ëmtsow ma ja wokën, e ja Manasés ja jyä'äy jam anëkëjxmtsow; yë'ë tsyëpa'an'ajtëp ja Mejy Naax'akujkpyë ets mëët nyäpyaatëtë ja Aser ja nyaaxëty anëkëjxytsyow; e a'oytsyow yë'ë mëët nyäpyaatëtë ja Isacar ja nyaaxëty.

¹¹ Ojts näjyëtu'un yë Manasés tjä'ä'aty ya'atë naax kajpn jampë yajpaatën ma nyaaxjotëtyën yë Aser ets Isacar, tu'ukjaty ja mëj kajpn aakmëët ja myutsk kajpnëty ets ja pya'a nyuxëty. E ja kajpn mëti'ipë yajtijtëpën: Bet-sean, Ibleam ets ja mëtëkëëkpë, mëti'ipë yajtijtëpën Dor, ëpëky ja Endor, Taanac ets Meguido.

¹² Ja Manasés ja jyä'äyëty ka'ap ojts myäyëtë tniwa'aktëty ya'atë kajpn kanaakpëkpyë, jä'ä ko ja Canaán ja'ayëty mëk ojts nyäpyëjkta'akëtë, paatykyëjxm ojts jam wyë'ëmtë.

¹³ E ko ja Israel ja'ayëty myëktaktë, ënät tuk'atsip'ajtë ja Canaán ja'ayëty ets nyäkyuyakëtëty, je'eyëp tëy ko ka'ap ojts timy'ëxwoptë.

Ja José ja jyä'äy tniwa'aktë ja yukjot

¹⁴ Ja José y'u'unk y'ok ojts tninëjkxtë ja Josué ets t'ënëmaaytyë: ¿Wi'ix ko ëëtsëty janty wäänë yë naaxëty të xytyimmooynyëtë? Ets mnija'ap wa'ats koos nimay'atë, tëëjës yë Wintsën xykyënu'kxtë mëët nimay yë u'unk ëna'k.

¹⁵ Ënet ja Josué y'ëtsoowëtë: Jä'ä ko miitsëty mnimay'atë ets ka'ap jam mtëjkëtya'atë ma ja Efraín ja nyaaxjotmën, nëjkxtë jam yukjotm, ma Refa ja'ayëty ets Ferez ja'ayëty tnitänëtën ets xyajwa'atstëty ets jam mtsënaaytyaknpëktëty.

¹⁶ Tääts y'ëtsoowtë: Tääpë kopkjot ka'ap yë myëta'akëty etsës nyajtuntëty. Yë Canaán ja'ayëty jampë jyuuky'atën joyjyotm myëët'ajtëp yë pujxnwintëkäämpë mëti'ipë myëtsiptuuntëpën, näjyëtu'un mëti'ipë tsënaaytyëpën Bet-sean ets ma tëkokyë ja myutsk kajpnëtyën ets jampë yajpaatën ma Jezreel joyjyotmën.

¹⁷ Ënet ja Josué t'ëtsooy ja José ja y'u'unk y'ok, jä'ä jëtu'un ja Manasés ets Efraín ja jyä'äyëty: Miitsëty jä'ä ko mnimay oyëty ets näjyëtu'un ja mëk'ajtën xymyëët'atë; paatykyëjxm ja it naaxwiinyëtë mëti'ipë mjä'ä'atantëpën ka'ap je'eyë tu'kpëky xyjyä'ä'ata'antë.

¹⁸ Tëkokyë jënu'un xy'ixtën tääpë yuk'it miits nëjkx xyjyä'ä'atë ets ja aay kepy jampë yajpaatën, miits nëjkx xytyuk'oy'atë. E ja Canaán ja'ayëty nëjkxëp xy'ijxwojpta'atë oy ënety xyjya'ixtë ja pyujxnwintëkäämpë mëti'ipë myëtsiptuuntëpën.