Josue 16 - Biblia Dc en Mixe de Quetzaltepec

Ja nyaaxëty ja Efraín ets ja Manasés, José y'u'unk y'ok

¹ Ja it naaxwiinyëtë mëti'ipë ojts tyuka'ajëtën ja José ja y'u'unk y'ok, jam ojts tsyo'ontä'äky a'oytsyow ma ja Jordán mëjnëëjën, jamtsow yajpaatë ma ja nëëwookyën mëti'ipë yë Jericó jyä'ä'ajtypyën; jampaat y'ëwtity ma të'ëts'itjotmën ets tuknaxy ja kopkjot ma ja Jericó ets Betel kajpn yajpaatën.

² Tyimtso'ontä'äky jam Betel mëti'ipë yajtijpën Luz ets tuknaxy ja Arquit ja'ayëty ja y'itjot ets jyä'ty jam Atarot.

³ Ënet jam nyajxë'ëky anajnytsyow'äämpy, tuknaxy ja Jaflet ja'ayëty ja y'itjot, tyimja'ty ma mëët nyämyëtsëpa'an'atëtën ja Bet-horón ëpa'tkë'ëmtsowpë ets jyä'ty jam Guézer. E jamts ja wiinkpë ja tsëpa'an tsyoony ets jyä'ty ma Mejyën Naax'akujkpyë.

⁴ Ya'atë naaxwiinyëtë ojts yajmo'otë yë Manasés yë jyä'äy ets Efraín yë jyä'äy, ja José ja y'u'unk y'ok.

Ja y'it nyaaxwiinyëtë ja Efraín

⁵ Ja tsëpa'an mëti'ipë tsyëpa'an'ajtëpën ja Efraín ja'ayëty jam tsyo'ontä'äky a'oytsyow ma txëëwatyën Atarot-adar ets jyä'ty jam Bet-horón, anëkëjxmtsow.

⁶ Jamts tsyoony yë wiinkpë ets jyä'ty ma Mejyën Naax'akujkpyë. Ja it naaxwiinyëtë jampë yajpaatyën anëkëjxmtsow jä'ä tu'k'it yajtijy Micmetat, jam tsyoony ja tsëpa'an ets nyijkxy a'oytsyow ma txëëwatyën Taanat-siló ets tuknaxy ja it naaxwiinyëtë mëti'ipë xyëëwajtypyën Janóah,

⁷ ets kyuye'eynyäxy jam Atarot ets Naará, tyimja'ty jam Jericó, jamts tsyoony ets nyijkxy ma ja Jordán mëjnëëjën.

⁸ Jam wiinkpë tso'ontä'äky Tapúah mëti'ipë najxë'kpën anajnytsyow ets jyä'ty ma ja Caná wokën ma mëët nyäpyäätyë ja Mejy Naax'akujkpë. Ya'atë ojts tyuka'ajëtë ja Efraín ja'ay mëti'ipë yajwa'kxtën tä ënety tyu'kmëku'uk'atën.

⁹ Ma tääpë it naaxwiinyëtën ojts näjyëtu'un jyam'atë kajpn mëjëtypë ets mutskëtypë ma ja Manasés ja jyä'äyëty tnitänëtën ets ojts yë'ë tjä'ä'atë yë Efraín yë jyä'äyëty.

¹⁰ Yë Efraín yë jyä'äyëty ka'ap ojts myäyëtë t'ëxwoptëty yë Canaán ja'ayëty jampë tsyëënëtën Guézer, ojts tyajwë'ëmtë ets mëët tsyënaamyujktë, je'eyëp ko ojts tuk'atsip'atë ets xëmë nyäkyukëpätëtëty. Paaty tyampaat yë Canaán ja'ayëty tämyëm yajpaatë ma tääpë it naaxwiinyëtën.