Josue 14 - Biblia Dc en Mixe de QuetzaltepecJosué tyajwä'kxy ja it naaxwiinyëtë jam Canaán 1 Ya'atë ja it naaxwiinyëtë mëti'ipë yajmooytyën ja Israel ja'ayëty tä tu'uk ja kuma'ayënën mëti'ipë ojts tyajwa'kxtën ja teety Eleazar, Josué, yë myaank yë Nun ets ja mëjja'aytyëjkëty mëti'ipë nyikopk'ajtëpën ja Israel ja'ayëty. 2 Ojts ja it naaxwiinyëtë tyajwa'kxtë ijxpëtsëmy, ja taxtujk ja kujkmëpë ja naax kajpn, jëtu'un tä ënety Wintsën të tuk'ëne'emyën ja Moisés. 3 E ja nimäjtsk ja kujkmëpë ja naax kajpn ja Moisés tëë ënety ja nyaax tmo'otë jamtsow nëë'awinm, jä'ä ja jyä'äyëty ja Rubén, ja Gad ets nikujkwä'kxy ja Manasés ja jyä'äy. 4 Yë José yë y'u'unk y'ok mäjtskpëky ënety nyäwyä'kxyë, tu'kpëky mëti'ipë ja Manasés jyä'äy'äjtypyën ets tu'kpëky mëti'ipë ja Efraín jyä'äy'äjtypyën, e jä'äts ja Leví ja'ayëty ka'ap ojts nitu'knu'un yajmo'otë ja nyaaxëty; yi'iyë yajmooytyë ja kajpn ma tsyëënëtëtyën ets wäänë ja naax ma tyajtänëtyën ja jyëyujk tsyajpkaajëty. 5 Jëtu'un ojts ja Israel ja'ayëty ja it naaxwiinyëtë tyajwa'kxtë jam Canaán naaxjotm jëtu'un tä ënety ja Wintsën të tuk'ëne'emyën ja Moisés. Ja nyaax ja Caleb 6 Ënet ja Judá ja y'u'unk y'ok ojts nyëjkxtë jam Guilgal ets myëtya'aka'antë mëët ja Josué. Ojts yë Caleb näjyëtu'un nyijkxy mëti'ipë Quenéz ja'ayën, Jefuné yë myaank ets t'ënëmaay ja Josué: Ja'amyäts wi'ix yë Wintsën ojts t'ënëëmën yë Moisés jam Cades-barnea ko ojts ëëtsajtëm nyajnimëtyakëmë. 7 Ëjts wëxtyikxyës ënety yë njëmëjt koos ojts jam Cades-barnea nyajkäjxtsoony, etsës ojts nëjkx jam Canaán naaxjotm, etsës ja it naaxwiinyëtë n'ixa'any ntuna'any, koos ojts nwinpijnë oypyës ojts ja aaw ayuk nmëwinpity jëtu'un tääjës ënety të njanty'ixyën. 8 Mëti'ipës ojts mëët nwinpijnëtën je'eyë ojts nëkoo ja naax kajpn t'ëtsë'ëkëtë, e ëjts tu'ukyës ja njot nwinma'any npëjktäky ma Wintsënën. 9 Ënätës yë Moisés xy'ënëmaay: Ja naaxwiinyëtë maajaty të mnaxyën mijts nëjkx xyjyä'ä'aty ets ja m'u'unk m'ok, mëët ko tu'ukyë yë mjot mwinma'any jam të xypyëjktä'äky ma Wintsën Tiosën. 10 E ix jëna'ajëp jä'änë, tëë wëxtyikxy jyëmëjt nyajxnë ma ja Wintsën t'ënëmaayën ja Moisés, ma ënety jam yajpaatën të'ëts'itjotm, e tëë jëtu'un jyänty tyuny jyänty jyätyë tä ojts tnikäjpxyën; ix ëjts tyampaat juuky'ajtpnëmës, tyam jä'äs yë njëmëjtnë majkta'px ja mëkoxk. 11 E tyam oy mëknëmës nyajpaaty timjëtu'un tääjës ënätyën ko ja Moisés xykyejxyës jam ma ja Canaán itën, ëjts je'eyëmës mëk nye'ey nnaxy ets jyëkyejpynyëm ntsiptunëtyës. 12 Paaty yam mijts n'ënëëmë, etsës xymyo'ojëty ja kopkjot mëti'ipës ja Wintsën ojts xytyukwinwanën. Mijts mnija'ap wa'ats ko yë'ë jam tsënaaytyëp yë Anac pajkyeny yë y'u'unk y'ok ets nyaax kyajpnëty ta'tspëky nyapotsy'atë. Yë Wintsën yë'ëtsës xypyutëkëp etsës jam ntëkëty, etsës n'ëxwojpta'ajëty yë ja'ay jampë tsyëënëtën, jëtu'un tä yë'ë të y'ëne'emyën. 13 Jëtu'un'äämpy ojts yë Josué tkënu'kxy yë Caleb ets tmooy ja Hebrón it ets yë'ë tjä'ä'atëty mëët ja y'u'unk y'ok. 14 Jëtu'un ojts yë Caleb yë'ë tniwä'äky tampë it naaxwiinyëtë ma ja Hebrón y'itjotmën ets yë'ë tjä'ä'ajty mëët ja y'u'unk y'ok, yë'ëkyëjxm ko ojts oy yë Wintsën tmëtuny, mëti'ipë yë Israel Tyios'ajtypyën. 15 Yë Hebrón jä'ä ijty tëëyëp yajtijy Quiriat-arbá, paatykyëjxm jëtu'un yajtijy, jä'ä ko jam ojts yë Arbá tsyëënë, tu'uk yë y'u'unk y'ok yë Anac ja'ay pajkyenypë. Ko ya'atë jëtu'un kyijxy nyäjxy ka'ap ojtx ma tsip y'ëk'ijnë. |
Biblia Dc en Mixe de Quetzaltepec, Oaxaca México © Sociedad Bíblica de México, A.C.
Bible Society of Mexico