Josue 10 - Biblia Dc en Mixe de Quetzaltepec

Wi'ix ojts ka'ap myëta'aktën yë Amor ja'ayëty

^1-2 Yë Adonisédec mëti'ipë ënety jam ënä'ämpën Jerusalén, ko tnija'awëy ko yë Josué tëë tyajkutëkoy yë Aí kajpn mëët ja nyiyajkutujkpë, ijxtëm ja Jericó kajpn tyajkutëkooyën mëët ja nyiyajkutujkpë ets ko yë Gabaón ja'ayëty tëë mëët nyäpyëkëtë yë Israel ja'ayëty ets tyam tu'ukyë yajpatnëtë. Ko tnija'awëy ko yë Gabaón ja'ayëty tëë mëët nyäpyëkëtë yë Israel ja'ayëty, ni'ikyë ojts tsyë'ëkëtë, jä'ä ko nyija'awëtëp ënety yë Gabaón ja'ayëty ko jotmëk ijtyëty ets kyajpnëty mëj'äämpy yajpaaty këtiinëm jyëtu'un'atë yë Aí kajpn.

³ Paatykyëjxm ojts yë Adonisédec kanaak yë noky tyaj'oyë ets tuknikejxy ja yajkutujkpë Hoham mëti'ipë jam ënä'ämpën Hebrón, ja Piream mëti'ipë ënä'ämpën Jarmut, ja Jafía mëti'ipë jam ënä'ämpën Laquis ets ja Debir mëti'ipë jam ënä'ämpën Eglón, ets t'ënëmaay:

⁴ Mintë putëjkëtëkës maas yam ntsippaatyën mëët yë Gabaón ja'ayëty, yë'ëjëty tëë yë käjpxytyu'unën tuntë mëët yë Josué ets tëkokyë yë Israel ja'ayëty.

⁵ Ënet ojts jyänty tyu'ukmuktë yë nimëkoxkpë yajkutujkpë mëti'ipë Amor ja'ayëtyën, jä'ä ja yajkutujkpëtëjk mëti'ipë jam yajpatëpën Jerusalén, Hebrón, Jarmut, Laquis ets Eglón, tu'ukyë ojts tsyoontë aakmëët yë tsiptuunpëtëjkëty ets tninëjkxtë ja Gabaón kajpn.

⁶ E ko ja Gabaón ja'ayëty jëtu'un t'ijxtë ënätyë ojts tkäjpxynyikäxtë ja Josué jam Guilgal ma ënety jam yajpaatyën ets t'ënëmaaytyë: Wintsën këtii ëëts jëtu'unyë xynya'ixtë. Min poj'am putëjkëtëkës, tun yë mëyajtën ets niwaantutëkës, tëë yë yajkutujkpëtëjk mëti'ipë Amor ja'ayëtyën tu'ukyë nyäpyëkëtë jampë kopkjotm yajpaatën etsës xynyitëkëja'antë.

⁷ Ko Josué jëtu'un ja ayuk pyatë ënätyë ojts tsyoony jam Guilgal mëët tu'kë'ëyë yë tsyiptuunpëtëjkëty mëti'ipë jotmëkëtyën,

⁸ ets ja Wintsën y'ënëmaayë: Këtii ninu'un mtimtsyë'ëkëty, ëjts tëëjës yë nkë'ëyäky tääpë ja'ayëty ma mijtsën ets ni pën tkajëkyepy ënät ëxëëk m'ëk tuunënëtëty.

⁹ Yë Josué ko jam tsyo'ony Guilgal, koots ojts ye'ey ets jëtu'un tukja'ajty ja Amor ja'ayëty ajotkumonë.

¹⁰ Wintsën ojts kë'ëm tuknipëjktaakë ets nëkooyë yajtsë'ëkëtëty ja Israel ja'ayëty, e jëtu'un'äämpy ja Josué may ja ja'ay tyaj'o'ky jam Gabaón. Ojts ja Amor ja'ayëty jyakäknëtë, e ja Josué ojts ënätyë tpatsoony, jampaat tpaja'ajty Bet-horón ets jënu'un tim pyäätyën aak yaj'o'k, tyimpanëjkx jampaat ma ja it naaxwiinyëtë txëëwatyën Azecá ets Maquedá.

¹¹ Ko jam jyënajkë'ktë yë Amor ja'ayëty ma ja it naaxwiinyëtë txëëwatyën Bet-horón ets jä'ä tkukä'äktë ja Israel ja'ayëty. Ënet yë Wintsën jam tyajkutëjkëy yë mëktëtsn tuu tsajpjotm ets may yë Amor ja'ayëty y'o'ktë mëët ja tëtsn tuu këtiinëm jyëtu'unëty tä ënety ja Israel ja'ayëty të tyaj'ooktën mëët ja tyiypyujxnëty.

¹² Ko yë Wintsën tkë'ëyäjky yë Amor ja'ayëty ma Israel ja'ayëtyën, ojts yë Josué yë Wintsën tmëkäjpxy jam ma ja mayjyä'äy yajpaatën ets t'ënëmaay: Yë xëëw wä'än twë'ëmy jam Gabaón; Yë po'o wä'än twë'ëmy jam Aialón.

¹³ Ja xëëw ets ja po'o ojts jyänty wyë'ëmtë koonëm ja Israel ja'ayëty tyaj'o'ktaaytyë ja myëtsipëty. Ya'atë nyikäjpxyp ja nyoky ja Wintsën ko y'ënä'äny: Ojts tëkok yë xëëw wyi'imy tsajp'itkujky, ets jä'ä ojts pyo'oxy tu'kxëëwën.

¹⁴ Tyampaat ka'ap maa yajmëtoy'äty yë xëëw y'ëkwë'ëmnë, tä ojts wyi'imyën tëëyëp ma ja Dios tmëtoow'ijtyën tu'uk ja ja'ay mëti'ipë mëkajpxën, jä'äkyëjxm ko ja Wintsën tputëjkëy ja Israel kajpn.

¹⁵ Ënet ja Josué ojts wyimpijnë jam Guilgal ma y'ijta'aktën mëët tëkokyë yë Israel ja'ayëty.

¹⁶ Ja nimëkoxkpë ja yajkutujkpë ojts jyajaakä'äktë ets jyanäyyu'tsëtë ma tu'uk ja aankën jam Maquedá.

¹⁷ Ok ojts yajpaatë ets yajtuk'ëwa'anëy ja Josué.

¹⁸ Ja Josué ojts tuk'ëne'emy ja ja'ayëty ets t'ënëmaay: Yajkëpiptë tsaa ets xyaj'ëtuktëty tääpë aank, ets jam wyë'ëmtëty mëti'ipë kyëwent'atëpën.

¹⁹ E miitsëty këtii nëkoo mpo'oxtë, panëjkxtë yë mëtsipëty ets jëxkë'ptsow xytyu'u'ëtuktëty. Këtii ni pën xy'ëkyajwinpijnëtëty ma kyajpnën. Jä'ä ko yë Wintsën mëti'ipë miits mTiosajtëpën tëë kyë'ëyakëtë ma miitsëtyën.

²⁰ Ok ojts ja Josué mëët tëkokyë yë Israel ja'ayëty tjaakyaj'o'kta'atë ja Amor ja'ayëty, e mëti'ipë juuky wë'ëmtën jam ojts jyaak käktso'oktën ma kyajpnëtyën.

²¹ Ja Israel ja'ayëty oy mëk ojts wyimpitë jam Maquedá ma ja y'ijtakn yajpaatën, e jam ja Josué ënety yajpaaty. Ja Israel ja'ayëty ni pën wiink kyanimëtyä'äkyë ets ëxaty kya'ënë'ëmxëtë.

²² Ok ojts ja Josué tni'ënä'ämë ets y'ënäny: Nëjkx akëëytyu'utë ja aank ets jap xyjyuutëty ja nimëkoxkpë ja yajkutujkpë.

²³ Ja Israel ja'ayëty ojts tjantyyajku'ëwa'atstë ja aank ets tju'të ja yajkutujkpë mëti'ipë ënä'ämtëpën jam Jerusalén, Hebrón, Jarmut, Laquis ets Eglón.

²⁴ Ko jam twoowmiintë ma Josuéjën, tä ojts twoowmujkta'ay ja ja'ayëty, mëti'ipë jam yajpatëpën ma Israel kajpnën ets t'ënëmaay ja tsiptuunpë wintsënëty: Mëjwa'aktë ets xyo'kmëtäänëtëty tyaapë yajkutujkpëtëjk, yë'ëjëty ojts jëtu'un tuntë,

²⁵ ets ja Josué y'ënëmaayëtë: Këtii mtsë'ëkëtëty ets këtii nëkoo mmaytyë mtajtë. Ni'ikyëmës amëk jotmëk mtimyyajpaatëty. Jä'ä ko Wintsën aakjëtu'un tuna'any yë mëtsiptëjk.

²⁶ Yë Josué ojts tyaj'ooky ja nimëkoxkpë ja yajkutujkpëty ets tkutëëy ma tu'uk yë kepyën, tu'ukjaty jam ojts tyajxëëwnaxy.

²⁷ Ko tsyu'ujënë tä ja Josué tni'ënä'ämëy ets tyajjënaktëty ja o'kpë ets nëjkx jap tpëjkta'aktë aankjoty ma ënety të nyäyu'utsëtën. Ta'tspëk ojts yajxon t'akë'ëtë mëët yë tsaa. Tsyampaat këxë'kp jam jëtu'un ja aank.

Wiinkëtypë kajpn mëti'ipë yajkutëkooytyën

²⁸ Jä'ä xëëw ojts ja Moisés tukja'ty ja Maquedá kajpn ets tyajkutëkooy, wa'ats tyaj'o'ktaay ja ja'ayëty mëti'ipë ënety jam tsënaaytyëpën. Ni pën ojts kyawë'ëmy juuky. Ja yajkutujkpë mëti'ipë ënety jam ënä'ämpën jëtu'un tyaj'o'ky tä tyaj'o'kyën ja Jericó yajkutujkpën.

²⁹ Jam ojts tsyoontë yë Josué ets nyëjkxtë Libná mëët tëkokyë yë Israel ja'ayëty ets tnitëjkëtyë.

³⁰ Yë Wintsën ojts kë'ëm tim kyë'ëyäky ya'atë naax kajpn mëët yë nyiyajkutujkpë ma Israel ja'ayëtyën. Ni pën ojts jam kyawë'ëmy juuky, wa'ats y'o'ktaaytyë. Ja yajkutujkpë jampë ijty y'ëne'emyën, jëtu'un ojts tyaj'ooktë tä tyaj'o'ktën ja Jericó yajkutujkpë.

³¹ Ënet ojts tsyoontë yë Josué jam Libná mëët tëkokyë Israel ja'ayëty ets tyajnatujktë yë Laquis kajpn.

³² E komjëpom tääts tnitëjkëtyë ja kajpn, yë Wintsën ojts kë'ëm timkyë'ëyaky ya'atë kajpn ma Israel ja'ayëtyën, e yë'ëjëty ojts wa'ats tyaj'o'kta'atë ja ja'ayëty ets ja jëyujk tsajpkaajëty mëti'ipë ënety jam yajpatëpën.

³³ Horam mëti'ipë yajkutujkpën Guézer ojts tsyoony mëët tëkokyë yë tsyiptuunpëtëjk ets tniwaantu'uta'any yë Laquis, e ka'ap myëtäky mëët ja Josué, Josué wa'ats tyaj'o'ktaay ja ja'ay, ni pën ojts juuky tkayajwë'ëmy.

³⁴ Ko yë Josué mëët tëkokyë yë Israel ja'ayëty jam tsyo'ontë Laquis, jam ojts nyëjkxtë ma Eglón kajpnën, jëyëjp ojts tyajnatuktë ets tnitëjkëtyë.

³⁵ Jä'ä xëëw nimay yë ja'ay tyaj'o'ktë, mëti'ipë ënety jam tsënaaytyëpën; ojts tyajkutëkooytya'atë tëkokyë winë jampë yajpaatën kajpnjotm, timjëtu'un tä y'ëtëtstën jam Laquis.

³⁶ Ko jam Eglón tsyo'ontë, jam ojts nyëjkxtë Hebrón ets tnitëjkëtyë.

³⁷ Ko tnitëjkëtyë, yajxon tim yajkutëkooytyë ja kajpn ets ja nyiyajkutujkpë tkupujxtë mëët ja tyiypyujxnëty ets tëkokyë ja ja'ayëty ets ja jëyujk tsajpkaajëty mëti'ipë ënety jam yajpatëpën ets ma ja kajpnëtyën mëti'ipë mëët nyämyëwinkon'atëtën; näjyëtu'un o'ktëy tuuntë tä ojts tuntën ja Eglón kajpn.

³⁸ Jam yë Josué tsyo'ony mëët tëkokyë yë Israel ja'ayëty ets ojts nyëjkxtë Debir, ojts näjyëtu'un tnitëkëtë.

³⁹ Ojts tkupuxtë ja yajkutujkpë mëti'ipë ënety jam ënä'ämpën ets ja ja'ayëty mëti'ipë jam tsënaaytyëpën, yë'ëpaat ja kajpn tyajtëkooytyë mëti'ipë mëwinkon'ajtëpën. Ma Debir kajpnën ka'ap ojts ni pën juuky wyi'imy, wa'ats ja ja'ayëty y'o'ktaaytyë, jëtu'un tä jam jyä'äjty ma Hebrón kajpnën ets Libná mëët ja yajkutujkpëtëjk.

⁴⁰ Jëtu'un'äämpy yë Josué ojts tniwa'kta'ay tampë ja it naaxwiinyëtë. Ojts tyaj'o'kta'ay ja yajkutujkpëtëjk jampë yajpaatën ma ja kopkjotmën, ma ja Négueb tnitänën, jam joyjyotm ma ja winjënakën. Yajkutëkooytyääy winë ets ojts tyaj'o'kta'ay ja ja'ay jampë tsyëënëtën. Ni pën ojts juuky tkayajwë'ëmy, jëtu'un tuuny tä ënety ja Wintsën mëti'ipë Tyios'ajtypyën yë Israel ja'ayëty të tyuk'ëne'emyën.

^41-42 Tu'ktonyë tmëmëtaktaay ja yajkutujkpëtëjk ets tniwa'ktaay ja naaxwiinyëtë jampë yajpaatyën itkujkm ma Cades-barnea mëët yë Gaza nyäpyäätyë; näjyëtu'un ma ja Gosen it tnitänën ets jampaat jyä'ty Gabaón. E tiikyëjxmën ko myëtaktë, jä'ä ko yë Wintsën yë'ë ënety mëët yajpaatë.

⁴³ Ko jëtu'un kyijxy nyäjxy, ënät ja Josué ojts wyimpijnë jatëkok jam Guilgal mëët tëkokyë ja Israel ja'ayëty.