Josue 1 - Biblia Dc en Mixe de Quetzaltepec

Tios tmëkäjpxy yë Josué

¹ Ko yë Moisés y'o'ky mëti'ipë yë Wintsën oy myëtuunën, ënät yë Wintsën ojts tmëkäjpxy yë Josué, Nun yë myaank, Moisés yë pyutëjkëpë ets t'ënëmaay:

² Jä'ä ko tëëjës ja ntuunpë Moisés y'o'knë, tyam mijts ënät mpatëp xytyuknaxëty yë Jordán mëjnëë ets xywyoownaxëty ja naax kajpn ets mja'tëty ma ja it naaxwiinyëtën mëti'ipë nmo'ojantëpën.

³ Jëtu'un tääjës ntukwinwa'anëyën ja Moisés, ko miits nmo'oja'antë ja it naaxwiinyëtë maajaty ënety xynyitsiptuntën ets xynyitëkëtën.

⁴ Miits nmo'ojantëp yë it naaxwiinyëtë jampë tsyo'ontä'äkyën ma të'ëts'itjotmën, nyäxy jam Líbano ets jyä'ty jam Éufrates, miits nëjkx xyjyä'ä'ajta'atë yë nyaaxjotëty yë Hit ja'ayëty ets jampaat ma Mejyën naax akujkpyë.

⁵ Mapaat mjuuky'ätyën ni pën mkamayëtëty, ëjtsës xëmë yajpaataanp ma mijtsën tä ojts nyajpaatyënës mëët yë Moisés, nijëna'a nka'ëxmatsa'any ets nkamajtstu'uta'any.

⁶ Jotkujk ets jotmëk mtimnyäyjyawëtëty, jä'ä ko mijts nëjkx xyajwä'kxy ja it naaxwiinyëtë ma ya'atë naax kajpnën, yë'ëjës ntukwinwa'anëy ja m'ap m'okëty koos n'ënëmaaytyë ko ja kyuma'ayën nmo'oja'antës.

⁷ Mëti'ipë mijts npëjktsoopyën, yë'ë ko jotkujk xëmë mnäjyawëtëty ets amëk jotmëk mtimy'itëty ets mjuuky'atëty tä ja ënä'ämën tëyajtën y'ënä'änyën mëti'ipë yë ntuunpës Moisés të nmo'oyën. Kopkpëky ko xyajwinkëxë'ëkëty ma mjuukyajtënën tä myinyën këxja'ay ets oy winë mwinpëtsë'ëm mjëjpëtsë'ëmxëtëty.

⁸ Xëmë xymyëmay xymyëtajëty mëti'ipë ja Dios ja y'ënä'ämën tyiyajtën nyikäjpxypën, yë'ë xëmë mja'amyätsëp xëëny koots ets xytyunëty mëti'ipë nyikäjpxypën. Aak oy nëjkx tii mwinpëtsë'ëmxëty ko tii xytyunëty.

⁹ Ëjts yam mijts n'ëne'empy ets akujk jotkujk mtimnyäyjyawëtëty, amëk jotmëk xëmë m'itëty. Këtii mtsë'ëkëty ni mkakumay mkakutajëty, jä'ä ko ëjts maas nWintsën'atyën mëti'ipë mijts mTios'ajtypyën, xëmës nyajpaata'any mëët mijts, oy maa mtimnyëjkxëty.

Josué tuknipëjktaakë wi'ix ja it naaxwiinyëtë tniwa'aka'anyën

¹⁰ Ënet ja Josué t'ënëmaay ja ja'ayëty mëti'ipë nyikopk'ajtëpën ja naax kajpn.

¹¹ Tukjëtijtëtya'atë yë it naaxwiinyëtë maajëty tsyëënëtën yë Israel ja'ayëty ets xy'ënëëmëtëty wä'än tnäjyëjp'ixëtë mëët ja jyi'kxy pyikyëty tääts wëxtëjkm ja tso'onk y'itëty ets yajtuknaxëty ja Jordán mëjnëë ma ja it naaxwiinyëtë niwa'aka'anëmën mëti'ipë ja Wintsën të xymyo'oyëmën.

¹² Ënet ja Josué ojts tmëmëtyä'äky ja jyä'äyëty ja Gad, Rubén ets kujkwä'kxy ja jyä'äy ja Manasés ets t'ënëmaay.

¹³ Miitsëty mja'amyäjtstëp wa'ats wi'ix ojts ja Moisés m'ënë'ëmxëtën, ja Dios ja tyuunpë; ko mnëmaayëtë, ko yë Wintsën miits mooyëtëp ya'atë it naaxwiinyëtë ma jotkujk mpo'kxtëty mpëktëtyën.

¹⁴ Yajwë'ëmtë yaa yë mto'oxytyëjkëty, m'u'unk m'ëna'këty mjëyujk mtsajpkaajëty ma ya'atë it naaxwiinyëtën mëti'ipë yë Moisés mooyëtën ma ka'ap yë Jordán mëjnëë yajtuknaxynyëmën. E tëkokyë yë ye'etyëjkëty wä'än tso'onta'atë ets myëku'uk twinye'eytyëty,

¹⁵ koonëm tpaatëty ja y'it nyaaxwiinyëtë ma jotkujk tsyëënëtëty jyuuky'atëtyën, tä miitsëty ja m'it mnaaxwiinyëtë të xypyaatën; ko ënety yë'ëjëty ja nyaax të tjä'äpëktë tääts nëjkx miits mwinpijnëtë ets ya'atë it naaxwiinyëtë tu'ukyë xyjyä'äpëjknëtëty mëti'ipë ja Moisés, ja Dios ja tyuunpë, të mo'ojëtën.

¹⁶ Ënet y'ëtsoowtë: Oy'atëp, ëëts ntunantëpës yam mëti'ipës xytyuk'ënä'ämtëpën, oyës maa xytyim käxtëty nëjkxtëpës jam.

¹⁷ Tyam ëëts ntuntëty mëti'ipë mijts mni'ënä'ämëpën jëtu'un tä të nmëmëtowtënës yë Moisés. Yi'iyë tëy ntsojktëpës ets mWintsën näjyëtu'un xëmë mputëkëtëty tä ojts yë Moisés tputëkën.

¹⁸ Pën ka'ap mëmëtoyë mëti'ipë ënety mjatuk'ëne'empyën, nëjkxëp tku'ookë. Yi'iyë yajtsojkp ko mijts jotmëk mja'ay'atëty ets këtii nijënu'un mtsë'ëkëty.