Jonás 3 - Biblia Dc en Mixe de Quetzaltepec

Ma ja Nínive ja'ay jyotwinpitën

¹ Ënet ja Wintsën ojts jatëkok tmëkäjpxy ja Jonás ets t'ënëmaay:

² Nëjkx jatëkok jam ma Nínive kajpnën ets xynyimëtya'akëty mëti'ipë yam ntuk'ëwaanëjäämpyën.

^3-4 Ënet ja Jonás tsyo'ony ets ojts nyijkxy jam Nínive, jëtu'un tä ënety ja Wintsën të tyuk'ëne'emyën. Yë Nínive kajpn, mëj kajpn ijty, tëkëëk xëëw yajtukye'eynyäxy. Ënet ja Jonás jam jyä'äjty ma ja kajpnën, tu'kxëëw tukjëtijtëy ets yä'äxy jyoky: Ja wëxtyikxy xyëëw ya'atë Nínive kajpn kyutëkoyä'äny.

⁵ Ja ja'ay mëti'ipë jam tsënaaytyëpën ma tääpë kajpnën, mëj mutsk ojts myëpëjkta'atë ma Tiosën ets tkäjpxy'ajtë ko y'ayuu'ata'antë ets nyätyukxoxa'anëtë ja wit mëti'ipë kuump u'kxpën, tyaj'ixa'anëtë ko ënety jyotmaypyaatë.

⁶ Ko ja Nínive yajkutujkpë tnija'awëy ojts ënätyë tsyoony ma ja kyutujktaknën ets nyätyuknijääntutë ja wyit mëti'ipë myë''ëne'emypyën ets tuktëjkëy ja wit mëti'ipë kuumpën u'kxpën ets nyaaxwe'tsy naaxkëjxy.

⁷ Ënätyë ja yajkutujkpë mëët ja wyintsëntëjk ja ënä'ämën tpëjktaktë ets y'ënantë: Ka'ap pën kyäyëty y'uukëty. Yë jëyujk tsajpkaa ka'ap yajmo'otëty yë jyi'kxy ets nyëë.

⁸ Ni'ikyë mëpaat miitsëty mnäxyoxëtë mëët ja wit tujkxy mëti'ipë kuumpën u'kxpën ets xyaj'ixëtëty ko mjotmaypyaatë. Amëjaaw yë Dios mënu'kxta'aktë, ëxmatstë ja m'ëxëëk juukyajtënëty ets ja jëën tsip wä'än jääyë tkexy tnaxy;

⁹ wä'änxyëp yë Dios xynyijoowinpijtmëty ets xyäämëty yë tsyip y'äkë ets jëtu'un ka'ap n'o'kmëty.

¹⁰ Ojts yë Dios t'ixy ko ja Nínive ja'ay jyotwinpijtë ets t'ëxmajtstë ja ëxëëktu'un ëxëëk kajpxën ets ojts y'ënä'äny ko ka'ap tyajkutëkoyanëpë ja Nínive kajpn jëtu'un tä ënety të tnikäjpxyën.