Jonás 1 - Biblia Dc en Mixe de Quetzaltepec

Ma Jonás tkuke'ekyën yë Tios

¹ Ënet ja Wintsën ojts tmëkäjpxy yë Jonás, yë Amitai myaank ets t'ënëmaay:

² Pëtë'ëk ets mnëjkxëty jam ma Nínive kajpnën ets xytyuk'ëwaanëty ko nyajkutëkoyä'änyës, tëëjës nijawë wi'ix yë nyëë pyoky kyëjääjëtyën.

³ E yë Jonás, kyäjpxykyumëtoownajx yë Wintsën ets ni'ikyë tkukeky, jam ojts nyijkxy Jope ma kepy nëëwinye'epyë tsyoontën jya'tën. Tam ënety tu'uk yë kepy nëëwinye'epyë tyimtsona'any mëti'ipë nëjkxpën Tarsis ko jam jyä'äjty, jä'ä tyuktëjkëy, jëyëjp t'ajuuytyujky ja y'ënyääytyakn ets ojts nyijkxy jam Tarsis.

⁴ E yë Wintsën yë'ë ojts tu'uk mëkpoj tyajminy ets jam nëë'itkujky tyëjkëy pojpë, mëk yajxon pyojy, jëtu'un yaj'ixy tim winpitaanp yowë ja kepy nëëwinye'epyë.

⁵ Ja ja'ayëty mëti'ipë yajye'eytyëpën ja kepy nëëwinye'epyë, yajxon tsyë'kënëtë, këëkjä'ä ja tios tjanty y'ëwtatë. Ënet tnëkupëjktaaytyë ja tsëmy kë'ëy ets ja kepy nëëwinye'epyë jeexyë tyo'tsykyë. E yë Jonás jap ënety të jyëjptä'äky ma winë pëjkë'ëky y'ityën ets jap myaanajxy.

⁶ Ënet ojts nyijëjptä'äkyë ja kepy nëëwinye'epyë wintsën ets y'ënëmaayë: Mijts ¿tiitën ko je'eyë mtimmyaanë? Pëtë'ëk ets xymyëkajpxëty yë mTios. Wä'än xyjyä'ämyäjtsëm ets xyajtsokmëty.

⁷ E ja ja'ayëty mëti'ipë yajye'eytyëpën ja kepy nëëwinye'epyë, jëtu'un nyäy'ënanëtë nixim niyam: Tsojk n'ijxpëtsë'ëmëmë suertëjoty ets nija'awëmëty pën yë poky myëët'ajtyp ko ya'atë ëyo'on tyunyë jyätyë. Ënet t'ijxpëtsëëmtë suertëjoty, Jonás ojts tyuka'ayë ja suertë, yë'ëtëm ënety pokymyëët.

⁸ Ënet yaj'ënëmaay: Tukmëmëtyaktëkës ¿tii ko ya'atë ëyo'on jotmay xytyukkëtakëmë? ¿Tiituunk myajjëtijtëp? ¿Maa mtsoony? ¿Maa mkukajpnëty? ¿Pën mtikts'ajtyp m'aats'ajtyp?

⁹ Tä Jonás y'ëtsooy: Hebreo ja'ayës ëjts, Wintsënës n'ëwtatyp, mëti'ipë nyiTios'ajtypyën yë juukymyejy ets naaxwiinyëtë.

^10-11 Ojts ja Jonás tuk'ëwaanë ja ja'ayëty ko ënety yë'ë tkuke'eky yë Wintsën, e ko jëtu'un tmëtoowtë ënät t'ijxtë ko ni'ikyë ja juukymyejy y'ëtëtstä'äky, tääts tsyë'këtyaktë ets tyajtëëwtë ja Jonás: ¿Tii ko jëtu'un m'ëtë'ëtsy? ¿Tiijës mëpaat ntuntë ma mijtsën ets ya'atë juukymyejy y'ëtëtsmonëty?

¹² Kujëpijpëtëkës nëëjoty ets juukymyejy y'ëtëtsmonëty, jëtu'un yë Jonás y'ëtsooy. Ëjts wa'atsës nijawë koos pokymyëët, paaty ya'atë mëktuupoj të myiny ma ëëtsajtëmën.

¹³ Ja ja'ayëty mëti'ipë yajye'eytyëpën ja kepy nëëwinye'epyë mëk tjajantykyaaptë ja kepy nëëwinye'epyë, je'eyëp ko ka'ap nyäkyye'eykye'eky, ja juukymyejy ni'ikyë mëk y'ëtëtstä'äky.

¹⁴ Ënet ja Wintsën ojts tmëkajpxtë ets t'ënëmaaytyë: Wintsën këtii xy'ëwa'atsëty etsës nku'ook nkutëkoytyëty ya'atë ja'ay nyëë pyoky. Pën yë'ë ka'ap tii poky tmëëtëty këtii ëëts xypyoky'ixtëty, mijts Wintsën jëtu'un winë xytyuny tä xytsyojkën'atyën.

¹⁵ Ko jëtu'un y'ënaantaaytyë, tä ja Jonás tnëëkujëpijptë ets yu'kxmoony ja juukymyejy.

¹⁶ Ko t'ijxtë ja ja'ayëty mëti'ipë ja kepy nëëwinye'epyë yajye'eytyëpën ko tëë ja nëë yu'kxmony ënät tmëjja'aw tkënu'kxyjya'awëtyë ja Wintsën ets tmooytyë wyintsë'kën ets tpëjktaktë ja waantakën.

¹⁷ E yë Wintsën tëë ënety jap nëëjoty tnipëjktaakë tu'uk mëjnëë jëyujk ets ja Jonás jyëënëtëty. E ja Jonás tëkëëk xëëw tëkëëk tsu'um jap y'ijty nëë jëyujk jootjoty.