Job 9 - Biblia Dc en Mixe de Quetzaltepec

Ma Job kyäjpxyën

^1-2 Ëjts wa'atsës nijawë ko jëtu'un y'ixë'aty, jam Dios wintum ni pën tkajëkyepy y'ëna'anëty ko wya'atsëty.

³ Ko pën mëët yë Dios jyanäy'oja'anëtëty, ka'ap yë naaxwiinyëtë ja'ay myëta'akëty oy jënu'un ja jot winma'any tjamëëtëty.

⁴ Yë Dios mëj këjää tmëët'aty yë mëk'ajtën kuttujkën ets wijyajtën, ¿pën nëkoo ëkmëmayëtëp ets ka'ap yajmëta'akëtëty?

⁵ Yë Dios ko jyoot'anpëky yajyu'kxyp yë tun kopk; yë'ë yajjijtyp ets ni pën tkanijawë.

⁶ Yë'ë yaj'yu'kxyp yë naaxwiinyëtë ets yë'ë yajtsëtyuupy ma naaxwiinyëtë kyëxmëtä'äkyën.

⁷ Yë'ë y'ëne'empy yë xëëw këtiipë oy jëna'a pyëtsëmëty ets mëtsa'a këtiipë tyë'kxëty.

⁸ Ko yë tsajp twijtstëëy, ka'ap ojts pën pyutëkëty ets ko tyajkutëkooy yë mëjëtypë jëyujk, näy ka'ap pën pyutëjkëyë.

⁹ Yë'ë ojts tyajkojy maymyëtsa'a mëti'ipë yajtijpën mëtsa'ayä'ämn, mëtsa'akë'ëk ets mëti'ipë këxë'kpën tä kuyjyaamën jam tsajpjotm; yë'ë ojts näjyëtu'un tyajkojy yë jaayxyëëw jam ëpa'tkë'ëmtsow.

¹⁰ Yë'ë mëj'äämpy winë tuny ets may winë tyaj'apaatë, ka'ap nja'akyujkëtyä'ämyëty wi'ixën tii tuny.

¹¹ Ko yë Dios muum xywyinnaxëtyës, ka'ap tjëkyepy n'ixëtyës; oy muum jyanaxëty, ëjts ka'apës nëjkx n'ixy.

¹² Ko tii tjä'äniwa'anëty, ¿pën tuk'ojëtëp? ¿Pën ëkyajtëwëtëp tiijaty tyuunpy?

¹³ Ko yë Dios jyoot'anpëky, tsip ets jyoot'an xyäämëty; ko yë Rahab yë jyä'äy tii tjatuna'any jam ma Tiosën, jëtu'unyë nyaaxkëtakta'atë.

¹⁴ ¿E wi'ixtsën ko ënät n'ëknikajpx n'ëknimëtyakpëty wiinkjaty ja Dios?

¹⁵ Ëjts oyës njanäjyawëty janty wa'ats, ka'ap tjëkyepy wi'ixës yë Dios n'ëtsoowinpitëty; mëjkutujkën yë'ë, ëjts je'eyës mëpaat n'amëtoy etsës xypya'ëyow xynyajts'ëyowëty.

¹⁶ Koos ëjts nja'ëna'anëty wä'än tyajnipaye'ey ets wä'än yë Dios tyaj'ixta'ay yë pyoky, ëjts ka'apës n'a'ixë tmëjpëjkta'akëty mëti'ipës nkäjpxypën.

¹⁷ Je'eyës nëkoo o'ktëy njaakjatëty jëtu'un tääjës jeexyë nwinpapojyën ets ni'ikyë npu'utsës myëjta'akëty;

¹⁸ je'eyës nëjkx ni'ikyë ntëkë moonpë tujkpë ets ka'apës n'ëk'xajnëty.

¹⁹ Ko atsip ninëjkxmëty, ka'ap xyajmëtakmëty. Ko nja'ëna'anmëty ni'ëënëja'anmëty, ¿maa n'ëkni'ë'ënëmëty?

²⁰ Ëjts oyës njanäjyawëty mëtëy yowë ntu'uye'eyës ets ka'apës yowë tii poky nmëëtëty, yë'ë poj'amës yë xyajpoky kya'ajëty ets poj'amës nëjkx ëxëëk njaty.

²¹ Ëjts oyës nja'ëna'any ko ka'apës tii poky nmëëtëty, ka'ap jëtu'unpë tyuny; ëjts tëëjës n'ënu'kxë mëët yë juuky'ajtk.

²² Aakjëtu'un winë y'ixëty. Jëtu'unës ëjts nmay ntajy; yë'ë je'eyëm tyaj'ooky ja'ay, wä'än tpokyjyä'äyëty ets wä'än twa'atsja'ayëty.

²³ Ko ëyo'on tyunyë jyätyë ets wa'ats ja'ay y'ooktë, je'eyë Dios tukxi'iky ko yë wa'ats ja'aytyëjk ka'ap yajnipaye'eytyë.

²⁴ Yë naaxwiinyëtë, yë'ë ëxëëkja'aytyëjk tyukmëwë'ëmpy, yë yajkutujkpë ni'ikyë twinkumats tjotkumatsë. Pën ka'ap Tyiosëty, ¿pën?

²⁵ Jëtu'unës yë nxëëw njëmëjt pyëyi'iky pe'tym tä pën pyëyi'ikyën ets ka'ap ja jotkujk'ajtën tpaaty.

²⁶ Jëtu'un nyëjkxtë tä kepy nëëwinye'epyën to'tykpyë, jëtu'un tä witsn tpakääk'ëwtityën yë joon mëti'ipë myatsäämpyën.

²⁷ Koos njaja'atyëkoyä'äny yë npëjkënës n'ijxënës etsës jotkujk njanäjyawëja'anyë,

²⁸ je'eyës kë'ëm ntsë'kënë koos mëk npëkyë n'ixyë, jä'ä ko nija'apës ko yë Dios ka'apës xy'ixy ëjts nwa'atsja'ayëty.

²⁹ Pën yë'ë ënaanp koos ëjts npokymyëëtëty, tii nyawa'anëty oyës yë njot njamëktuny.

³⁰ Oyës njakë'ëpujy mëët yë xëts etsës yë tsiin xëts njakë'ëpuj'aty,

³¹ japës yë Dios je'eyëm xykyukäjxnaxa'any jutjoty, yë'ëpaat yë nwit ntujkxyës xy'ëxëëk'ijxnës.

³² Ka'ap tjëkyepy yë Dios mëët nnäy'ojëtëtyës jëtu'un tä yë ja'ay nyäy'ojyën ets ka'ap tjëkyepy mëët nnäwyintänëtëtyës ma kutuunkën.

³³ Oy ko jeexyë jyää'aty tu'uk yajkutujkpë ma Dios mëët yë naaxwiinyëtë ja'ay nyäwyintänëtëty,

³⁴ mëti'ipë jeexyë y'akajpxtujkpyën këtiipës nëkoo xytyiytyunëty ets këtiipës nëkoo xyaj'ëyowëty.

³⁵ Jyëkyejpy jeexyë amëk jotmëk nwinmëkajpxës, jä'ä ko ëjts ka'apës maa njawë tii poky të ntuny.