Job 6 - Biblia Dc en Mixe de Quetzaltepec

Ma Job kyäjpxyën

^1-2 Ko jeexyë yë npa'amës y'ëk'yaj'akijpxnaxy ma tu'uk yë kijpxnën,

³ ni'ik je'emty jeexyë pyëtsimy këtiinëm yë nëë ajin paatykyëjxmës nkäjpxy nmëtyä'äky mëët yë yu'unk'ajt naxym'ajtën.

⁴ Mëti'ipë maaytyääyëpën winë, jëtu'unës të xytyuny ijxtëm jeexyë të xytyukmoxmëkumën yë xyëwät ets të tukye'eyëtyä'äy yë njot nini'kxës. Tëës yë Dios xytyuktu'u'ëtujkta'ay yë ëyo'on jotmay.

⁵ ¿Wä'än jëtää yë krukts yä'äxy ko jyi'kxy yajmo'oyë? ¿ëkë wä'än jëtää tii një'kxmëty mëti'ipë ka'ap xyu'kxëtyë?

⁶ ¿Wä'än jëtää tsäk tii nxu'kxja'awëmëtyë? ¿ëkë wä'än jëtää tii një'kxmëty mëti'ipë ka'ap xyu'kxëtyënë?

⁷ Mëti'ipës ënety ka'ap nijëna'a një'kxa'anyën, yë'ëjës tyam një'kxyp.

⁸ Jääpëk jeexyë yë Dios xymyo'oyës mëti'ipës n'amëtoopyën; jääpëk jeexyë xymyo'oyës mëti'ipës të npëjktsoyën.

⁹ Jääpëk yë Dios tuknipëjktaakë ets jeexyë xytyimyajnakës ets njuukyajtënës xypyëjkëty.

¹⁰ Oy jeexyë jënu'un yë pëjkën ijxën xytyimtëytyuunpës. Ëjts je'eyëmës jotkujk näjyawëja'anyë, jä'ä ko xëmës yë Wintsën wa'atspë të npatuunë y'ënä'ämën tyiyajtën.

¹¹ Ëjts ka'apës nëkoo jot mëjaaw n'ëkmëët'ajnë, ka'apës n'ëkja'akyujkënë tiikyëjxm ko njuuky'ätyës.

¹² Ëjts ka'apës jëtu'un njuunëty tä tsaajën ets ka'apës jëtu'un nta'tspëkyëty tä pujxnën.

¹³ Ëjts ka'apës tii mëk'ajtën nmëët'aty ets ka'apës tiiputëjkën npaaty.

¹⁴ Yë mëku'uk mëti'ipë mëët oy nämyä'äyëmën, je'eyëm yajtsoky oy ënety ka'ap tii oy të tuny.

¹⁵ E miitsëty mëku'uktëjkëty, nimaajës xykyaputëkëtë. Jëtu'un miitsëty myajpatnëtë tä nëëwokën mëti'ipë tëë tyëtsnën.

¹⁶ Ki'ixkëm je'eyë nëë jyënajknë ets ujts mëët yë nëë o'pky ets tip;

¹⁷ e ko yë nëë o'pky tyëkooytyä'äy ets pyëtë'kta'ay yë tip, tim natëtsp.

¹⁸ Yë'ë yajtu'utëkajtstëp yë tu'uye'epyëtëjkëty ets jamtsow nyëjkxtëty të'ëts'itjotm ma ka'ap yë nëëjën ets jam y'ooktëty.

¹⁹ Yë tu'uye'epyëtëjkëty mëti'ipë jamën Temá ets Sabá, yajxon nëë tjanty'ixta'atë ma tääpë wokjotmën,

²⁰ e ko jam t'ixtë ka'ap tii nëë, nëkooyë ëxëëk nyäjya'awënëtë ets tim tëkooytyääytyëp yë jyotkujk'ajtënëty.

²¹ Jëtu'un miitsëty njawëtë: koos xy'ixtë o'ktëy njatyës, ni'ikyë mtsë'ëkëtë.

²² Ëjts ka'ap yam mijts tii n'amëtowtë, ka'ap yë wit meeny yam n'amëtowtë etsës ntso'okëty;

²³ ka'ap yam n'amëtowtë etsës xynyiwaantu'utëty maas yë nmëtsipën etsës xyajpëtsëmtëty maas tsumy matsy xyaj'itën yë mä'tspë.

²⁴ Ëkë tuk'ëwa'anëtyëkës tiis mëpaat ntuny etsës amonyës nwë'ëmëty; tuk'ënëmaaytyëkës maas të ntëkoy.

²⁵ Mëtëypyë aaw ayuk ka'ap tjëkyepy pën t'ëtukëty; miitsëty nanëkookyëjxm je'eyë xy'ojtë xya'axtës.

²⁶ Miitsëty wiink xytyijwinpitë ja aaw ayuk mëti'ipës oy të nkäjpxy të nmëtyä'äkyën. Jëtu'un m'ëna'antë ko tsuuwinma'anyës nmëët'ajtyp.

²⁷ Miitsëty kajtëm xypya'ëyowtëty yë ku'ooky u'unk ets tsojktëm xynyanitooktëty yë ja'ay mëti'ipë mëët oy mnämyäyëtën.

²⁸ Ijxtëkës nwiinkëjxm njëjpkëjxm ets nikajpxtë pën antakpës.

²⁹ Ëna'antë ko miitsëty nëkoopë wi'ixjaty mkajpxtë mmëtya'aktë, këtii nëkoo mnäyaj'ëxëëktëkëtë. Ja'aykyukëtë ko ëjts mëtëypyës nikäjpxyp.

³⁰ ¿Ëkë miitsëty jä'ä m'ëna'antë ko ëjts win'ë'ënpës, ko ka'apës nijawë tiijës nkäjpxypyë?