Job 42 - Biblia Dc en Mixe de Quetzaltepec

Ma Job kyäjpxyën

^1-2 Ëjts nija'apës ko mijts mmaaytyääyëp winë ets ka'ap maa tii mëti'ipë ka'ap mmayëtëtyën.

³ ¿Ëjts pënës yë'ë, etsës n'ëna'anëty ko mijts ka'ap mmëjajtën xymyëëtëty ets nyajkëxë'ëkëtyës yë ntsuuwinma'anyës? Ëjts tëëjës winë nyajtëy mëti'ipës ka'ap oy të nja'akyukën, jä'ä ko jää yë winma'any mëj këjääpë mëti'ipë tsip yaja'akyukën.

⁴ Mijts ojtsës xy'ënëëmë: Mëtoowit, tyam nmëmëtya'aka'any; yë'ë m'ëtsoowinpitëp ya'atë yajtë'ëwën.

⁵ Ëjts je'eyës të nmëtoy ko mijts mjääjëty, tyamnëm ënät n'ixy mëëtës yë nwiin.

⁶ Paaty yam ntukjootwinpity, maas yam n'u'unyën kuyjaamjoty ets naaxwayjoty.

Ma Tios tyajtso'okyën ja Job

⁷ Ko yë Dios jëtu'un tmëkajpxtaay yë Job, ojts t'ënëëmë yë Elifaz: Tëës mijts xyajjoot'anpëky, tëëjës ntukjoot'anpëjkta'ay yë mëku'uktëjk mëti'ipë mëët oy mnämyäyën, jä'ä ko ka'ap tii tëy të xynyimëtya'aktë tääjës yë ntuunpën Job.

⁸ Tyam yë'ë mënëjkxtë yë tsajpkaa, wëxtujk xymyënëjkxtëty ets wëxtujk yë kupixyny ayääkë jam ma Job yajpaatyën ets jam xyaktëty nino'oky nixämy tä tu'uk wintsë'kënën mëti'ipë mnatyukunaxëtëpën. Yë ntuunpës Job yë'ë mkënu'kxta'akanëtëp, nmëtoow'itäämpyës tä ënety y'ënä'änyën ets ka'ap wi'ix ntuntëty; oy jëtää ka'ap mjanitëkëtë myajpokmyä'kxtëty jä'ä ko miitsëty ka'apës mëtëy të xynyimëtya'aktë, jëtu'un tä yë ntuunpënës Job.

⁹ Ënet yë Elifaz, Bildad ets Sofar ojts jëtu'un tuntë tä ënety yë Wintsën të tyuk'ënä'ämëtën, ja Wintsën ojts tmëtoow'ity wi'ix ja Job ojts Dios tmëkäjpxyën.

¹⁰ Ko ja Job tkënu'kxtaay ja myëku'uktëjk mëti'ipë mëët oy nyämyäyën, ojts ja Dios myooywyimpijta'ayë ja jyotkujk'ajtën, ni'ik ojts myo'oyë, tëkëëkjëtu'un tä ja mëti'ipë ënety të nmëët'atyën ko pya'tkë'p'ajty.

¹¹ Ënet ja myëkä'äxtëjk, ye'etyëjkpë to'oxytyëjkpë, myëjëën myëtëjk ets mëti'ipë mëët nyäwyin'ixy'ätyën ojts nyimiinta'ajëtë, tu'uk ja xëëw tyaj'apatëtyë jam ma ja Job ja tyëjkën. Ojts myëmëtya'akëtë ets wyinxoon wyin'ijtëtë ko ënety o'ktëy të jyäty të kyëpety, ko ënety ja Wintsën ja ëyo'on jotmay të tyuknikexyë, tu'ukjaty ojts tmo'otë ja wit meeny ets pu'ts pujxnkë'ëjiits.

¹² Dios, ojts yë Job may winë tmo'oy ko jyaak jyuuky'äjty, ni'ik may këtiinëm tä ënety të tmëët'atyën më''ëka'any. Majkmajkts mil ojts yë kupixyny tmëët'aty, tëtujk mil yë jëyujk jëku'ux, tu'uk mil yë tsajpkaa ets tu'uk mil yë krukts.

¹³ Majkmajkts näjyëtu'un yë myaank y'ijty ets tëkëëk yë nyëëx.

¹⁴ Ja mëjpë ja nyëëx Jemimá ijty xyëëwajtyp, ja mëmäjtskpë Quesiá ets ja mëtëkëëkpë Queren-hapuk.

¹⁵ Yë Job janty'oy janty tsuj yë nyëëx kyëxë'ktë, kamaa ënety jëtu'unpë to'oxytyëjk naaxwiinyëtë apëtsëmy y'oyëty tä yë'ëjëtyën. Yë tyeetyëty tu'knax ojts kyumayëtë tä ja yä'äy'ëna'këtyën.

^16-17 Jä'ä ojts yë Job ok jyaakjuuky'äty; mëko'px ja wëxtyikxy jyëmëjt ets ko ojts y'o'knë tëë ënety yajxon myëjja'ayënë, ojts tjaak'ixy yë y'u'unk y'ëna'k, y'o'k u'unk y'ok'ëna'k ets ja y'u'unk y'ok.