Job 40 - Biblia Dc en Mixe de Quetzaltepec

^1-2 Mijts jëtu'un të m'ëna'any ko mnäwyintänëja'anyë mëët ëjts, mëti'ipë maaytyääyëpën winë, ¿wi'ix, je'eyëm m'ëtsoowinpita'anyë?

Ma Job kyäjpxyën

^3-4 ¿Wi'ixës n'ëk'ëtsoowinpitëty? Ëjts ka'apës tii nkëjxmëty. Nikë oyës amonyë ntimy y'itëty.

⁵ Ëjts tëëjës yë n'aaw n'ayuk nkajpxta'ay, ka'apës tii winma'any n'ëkpatnë mëti'ipës nkajpxëpën.

Ma ja Tios t'ënëmaayën jatëkok ja Job ets tnikajpxëty ja y'ayuk

⁶ Ënet jatëkok ja Dios ojts tmëkäjpxy ja Job jap tuupojjoty.

Ma Wintsën kyäjpxyën

⁷ Tuk'ijxkës tyam ja mjotmëk'ajtën ets ëtsoowinpijtkës ma yam nyajtëyën:

⁸ ¿Mnikäjpxyp ko ëjts pokymyëëtës ets ka'apës tii oy nipaye'ey ets ko mijts mwa'atsëtyë?

⁹ ¿Ni'ik jëtää mijts mëkëty këtiinëm ëjtsë? ¿Jëtu'un yë m'aaw myo'kn y'ënä'äny ënääwën tääjës ëjts yë njä'äjënë?

¹⁰ Pën jëtu'un, oy mnäyajnaxëtëty mëj'äämpy ets mëj këjxm, yaj'ixët ja mëj'ajt m'oyajtën ets ja mtë'kxën mjajën.

¹¹ Ixta'a yë ja'ay mëti'ipë amëj akëjxm yajpatëpën; yajkëta'ak jam yë mtsip m'äkë ets naaxkutij naaxkumatsë.

¹² Ëxëëk yajjat yajkëpät mëët ja mwiin mjëjp, yajkutëkooytya'a yë ëxëëkja'aytyëjk maajaty yajpaatën.

¹³ Naaxnitajta'a, jap tsuumta'a majtsta'a ma o'kpëtëjk tsumy matsy y'itën.

¹⁴ Ënätës ëjts nijawëty ko mijts yë mkutujkën të myëtä'äky.

¹⁵ Ix yë mëj jëyujk Behemot, ëjts të nyajkojy ijxtëm mijts ojts nyajkoyën; jëtu'un y'ujts jë'kxy tsajpkaajën;

¹⁶ ix, wi'ix myëjëtyën yë jyëxk ets wi'ix myëkëtyën yë tyekpyoonty.

¹⁷ Juun yajxon yë pyi'ixy, tä yë ajë kepyën ets ta'tspëky yajxon yë tyeky tsyom.

¹⁸ Jëtu'un yë wyääy pyajk jyuunëty tsuxkpujxnën, tä yenypyujxnën.

¹⁹ Ëjts të nyajkojy mëët yë winma'any; ëjts jëtu'unpë xymyääpy ets jyëkyejpy nyajkutëkoyëtyës.

²⁰ Jam tunkëjxm ma kaa yajpaatën, jam myëtso'onxëty yë jyi'kxy ets jyë'kxëty.

²¹ Jam kepypya'tkë'ëm nyämyëkäjxtä'äkyë ets nyäyu'utsyë tsajpkäpynyjoty, mo'ontsjotypë yontën.

²² Yë kepypya'tk yë'ë ninikëyëp, yë aay ujts mëti'ipë wok pë'aay yajpatpën yë'ë napikëyëp.

²³ Oy yë nëë jyakomy ka'ap y'ëtsë'ëkëty; oy yë nëë jyaku'ty jyëjpkëjxy yë'ë akujk jotkujk yajpaaty.

²⁴ ¿Pën ëkmayëtëp tmatsëty ets wyiin tju'tëty ëkë tjëjp tsumëty?