Job 39 - Biblia Dc en Mixe de Quetzaltepec

¹ ¿Mnija'ap jëna'a yë tsajppax y'u'unk'ixy mëti'ipë kopk këjxy tsënääpyënë? ¿Tëë xy'ëk'ijxpë wi'ix yë jëtyu'uto'oxy y'u'unk ixyënë?

² ¿Mnija'ap jënaak po'o yë y'u'unk tsëëm'ity jap jyootjotyë?

³ Ko y'u'unk tyajminy naaxwiiny näyu'tsëp je'eyë ets myëxu'unk'aty yë y'u'unk.

⁴ Tääts myëkpëktë, yääktë pyätë jam aayjyotm ujtsjotm, ko yä'kpätë tääts tsyo'onëtë ets ka'ap y'ëkwinpijnëtë.

⁵ ¿Pën jëtää ëwaatsëtuuy yë krukts të tpëjktä'äky mëti'ipë tunkëjxm kopkkëjxm ijtpën? ¿Pën jëtää yajëtijtëp najtspëkë?

⁶ Ëjts ojts ntukni''ixë maa y'itëtyën jyuuky'atëtyën, jam të'ëts'itjotm ets jam joyjotm ma naax tya'amtsëtyën.

⁷ Ka'ap tme'kxy yë nä'ämpë jampë kajpnjotmën ets ka'ap tkupëky myëya'ax myëjokëtëty yë ja'ay mëti'ipë jëyujk këwent'ajtpën.

⁸ Tyukjëtijtëtyääpy yë tun kopk ma jyi'kxy t'ixta'ayën, yë'ë y'ixtääpy maa t'ëkpaaty yë tsuxk ujts mëti'ipë jyë'kxëpën.

⁹ ¿Mijts m'ënaanp jëtää ets tsajpkaa mëtunëtëty mëti'ipë aayjyotm ujtsjotm juuky'ajtpën ets m'ënaanp jëtää jam jyë'kxëty ma mtsajpkaa xyajtänën?

¹⁰ ¿Jä'ä jëtää m'ëna'any; näjyëtu'un xyajyu'ujaanpë, ëkë mpanëjkxëtëty ma mnaax mkam xytyäjy xyjyeepyën?

¹¹ ¿Mtuk'ijxpätäämpyën ko myëkëty ets m'ënaanpën mmëtunëtëty oyë?

¹² ¿M'ënaanpën mputëkëtëty ma ënety yë mpëjktä'äky xyajmukyën ets ma ënety xyajpajk'atyën yë mtsajp mokë?

¹³ Jyëkyejpy xyjyä'ä'atëty yë mëj paatutk, mëti'ipë käkn mëpojpën ko xyoontä'äky, jëtu'un tä jeexyë yë'ë wojnykyäkn tmëët'atyën,

¹⁴ ets tsyu'utsy jinjoty ets xëëw'an yajyukëtëty yë tyaa.

¹⁵ Ka'ap tmëmay tmëtajy ko pën tyuktä'änxëtëty yë tsyaa, ëkë jëyujk mëti'ipë jam najxpën.

¹⁶ Ëxëëk t'ixy yë kyë'ëm u'unk, jëtu'un tä jeexyë ka'ap t'u'unkëtyën, ka'ap tmëmay tmëtajy oy nyatëkoyëty yë jyot myëjaaw.

¹⁷ Jä'ä ko ka'apës yë wijyajtën kujk'ajtën të nmo'oy; ojtsës ntukwintuk'ooky ma yë'ëjën yë oypyë jot winma'any.

¹⁸ Je'eyëp tëy ko pyëti'iky ets ko kye'eky wyinajxtääpy yë kwaay ets ja'ay.

¹⁹ ¿Ëkë mijts ojts yë kwaay xymyëjaawmo'oy ets ojts xyaj'oytyëjkëyë yo'knë?

²⁰ ¿Mijts myajpujtë'kpy tä pujtpën, ëkë ko kyujuun'ooky mëpaatëp xy'ëtsë'këmë?

²¹ Je'eyë tyëkë naax tajpë ko ka'ap myëtowa'any ets ka'ap tsyë'ëkë ko tyëkë tsiptuunpë.

²² Je'eyë tukxi'iky atsë'ëk ajawëpë ets ka'ap tsyë'ëkë oy tëypyujxn jënu'un ya'axëty jyokëty, ka'ap ninu'un tsyë'ëkë,

²³ oy jënu'un yë tyeky tyaj'ëna'anëty yë ja'ay mëti'ipë kwaay tyuk'u'unyääpyën, oy jënu'un jëënpixk tyajpëtë'ëkëty yë ku'umën ets pujxn mëti'ipë tsiptuunpëtëjk myëtsiptuuntëpën.

²⁴ Yë'ë nëkooyë pyëyë'knë këjääpaat ko tyëkë tsiptuunpë; ko yë xuxn xyu'uxy ka'ap ninu'un y'ëwxita'any.

²⁵ Je'eyë y'ëjëjy ko yë xuxn yajtukxu'uxy mëti'ipë tsip nyikäjpxypën, jëkämnëm tmëtoowpaaty ko yë tsip tyuna'anyë ets myëtoopy wi'ix yë ja'ay ënä'ämën tyäkyën ets wi'ix yya'axtën jyoktën.

²⁶ ¿Ni'ik jëtää mwijyëty ets xytyukni''ixëty wi'ix yë witsn kyääkjëtitëty, ëkë wi'ix jam ëpa'tkë'ëmtsow kyäknëjkxëtyë?

²⁷ ¿Mijtsën të xy'ëne'emy yë witsn ets pyä'än tëkoykyëjxm tpëjkta'akëtyë?

²⁸ Tsu'um koots jyuuky'äty, tsaatunkëjxm ets jam tyaj'ixtä'äky yë y'ijtakn ma tsaatun jëjpën.

²⁹ Jam këjxm tku'ijxnaxy ets tyajwinkony yë jëyujk mëti'ipë myatsäämpyën.

³⁰ Yë y'u'unk yë'ë nyiyä'ktëp yë ne'pny, ma muum yë jëyujk ooky yajpaatën.