Job 34 - Biblia Dc en Mixe de Quetzaltepec

Ma mëmäjtsknipëtë'ëk kyë'ë'ëmayën yë Elihú

^1-2 Miitsëty, ixpëky jyä'äytyëjkëty ets wijyjyä'äytyëjkëty, mëtoow'ijtëkës yë n'aaw n'ayuk.

³ Yë tatsk myëtoow'ijtyp wi'ixjaty yë ayuk yajkäjpxyën, jëtu'un tä yë pa'kxwiin jya'awëy'ijtyp wi'ixjaty tii jyawën.

⁴ Timjëtu'un tyam, tsojk n'ijxëm ntu'unëm ets nmëma'ay nmëtajëm yajxon mëti'ipë jotmay'ajtpën ets ënät nyajwintu'upëjkmëty ja winma'any mëti'ipë oy nja'akyujkëmën.

⁵ Yë Job jëtu'un y'ënä'äny: Ëjts ka'apës tii poky nmëëtëty, yë Dios ka'apës npoky xypyaye'eyë.

⁶ Tsipës nkupëkëty ets win'ëënëpës koos n'ëna'anëty ko ëjts pokymyëëtës; yë ntsëtyutës ka'ap tsyo'oky ets ka'apës tii poky të njatuny.

⁷ Ka'ap maa wiinkpë ja'ay jëtu'unpë tä Job jyä'äy'ätyën. Jëtu'un yë Dios tnëxi'iky tukxi'iky tä ja'ay nyëë uukyën;

⁸ ye'eymyujkp najxmujkp mëët yë ëxëëkja'aytyëjk ets yë'ë mëët ye'ey nyäxy mëti'ipë ja'ay ëxëëk ja jyot wyinma'anyën.

⁹ Jëtu'un y'ënä'äny ko ka'ap tii yajpaaty yaj'ixy ko nyätyijyë oy näyajnaxa'anëmëty Dios wintuuy.

¹⁰ E miitsëty, ixpëky jyä'äyëty, mëtowtë yajxon. Ka'ap mëpaat nma'ayëm ntajëm ko yë Dios, mëti'ipë maaytyääyëpën winë tuuntëkoopy kajpxtëkoopy ets ka'ap tii oy tnipaye'ey.

¹¹ Yë'ë jëtu'un yë ja'ay winë tmo'oy ijxtëm yë ja'ay winë tunyën; yë'ë myoopy yë ja'ay winë ijxtëm pyaatëtën nitu'ukjaty.

¹² Ëjts tëy'ajtënës n'ëna'any, ko yë Dios, mëti'ipë maaytyääyëpën winë, ka'ap tii tëkatsy tuny ets ka'ap yë pyokymyëëtëty;

¹³ ka'ap pën myo'oyë kuttujkën ets y'ënä'ämëty ma tëkokyë naaxwiinyëtën.

^14-15 Ko y'ëkyajpëjkëty yë naaxwiinyëtë ja'ay yë xyejy, tëkokyë yë'ëjëty poj'am y'o'kta'atëty ets jatëkok y'awinpitëty naaxway.

¹⁶ Pën mijts jap xymyëëtëty yë winma'any, mëtoow'it yë n'aaw n'ayukës ets mëtoow'it mëti'ipës yam nkajpxäämpy nmëtya'akäämpyën.

¹⁷ Kooxyëp yë Dios t'ëk'ëxëëk'ixy yë tëyajtën, kajxyëp yë naaxwiinyëtë t'ëne'emy. ¿Wi'ix xyajnitukëty mëti'ipë mëj këjää wa'atsën?

¹⁸ Pën yë yajkutujkpëtëjk ets wintsëntëjkëty ëxëëk jyä'äy'atë, kopkpëky ko yë Dios tyukumëtowëtëty.

¹⁹ Yë'ë ka'ap tpukajpxë yë yajkutujkpëtëjk ets ka'ap yë kumeenyjyä'äytyëjk ni'ik tputëkë këtiinëm yë ëyoowpëja'aytyëjk, jä'ä ko yë'ë yajkojtaay wä'än tpënëty.

²⁰ Yë ja'ayëty poj'am y'ooktë ko kyootsë; ëtëtstëp ënantëp yë ja'ay ets y'atëkoytyë; yë yajkutujkpë atëkoopy ets ka'ap yë'ëjëty naaxwiinyëtë ja'ay yaj'atëkoyë.

²¹ Dios wa'ats t'ixy tuny wi'ixjaty ja'ay nyë'ëye'ey tyu'uye'eyën ets nyija'ap wi'ix nyäxy tyëkën.

²² Ka'ap maa kootsajtën mëti'ipë yu'utsëpën yë tuuntëkoopyë kajpxtëkoopyë.

²³ Dios ka'ap ja'ay t'ënëmaay jëna'a nyäwya'këxë'ëkëtëty ma yë'ëjën ets yajpaye'eyëty yë nyëë pyoky.

²⁴ Ka'ap tsyokyë jeky t'ixëty tunëty ets tpaye'eyëty ja nëë poky ets tyajkutëkoyëty mëti'ipë mëj'äämpy ijtpën ets tmo'ojëty yë wiink ja'ay ma yajkutukyën.

²⁵ Dios wa'ats tnija'awëtyä'äy tii tyuuntëpën, koots yë jyä'ty tääts tyajma'ta'ay winë.

²⁶ Jëtu'un tukwop tuka'atsë tä yajja'ay'o'kpën ma mayjyä'äy t'ixtëtyën,

²⁷ jä'ä ko ka'ap të tmëmëtowtë ets ka'ap të tpatuntë ijxtëm ja y'ënä'ämën tyiyajtën jyaminyën.

²⁸ Koonëm yë ëyoopëja'aytyëjk ojts ya'axtë jyoktë ets mëti'ipë ënety yajtëytyuuntëpën ets Dios tmëtooy.

²⁹ E ko Dios näjyëtu'un y'ëmoonpëty, ¿pën tëytyunëp? Pën yë'ë näyu'tsëp ¿pën winë y'ixëp? Yë'ë y'ijx'ijtyp Kyëwent'ajtyp yë naax kajpn ets ja'ay

³⁰ këtiipë yë'ë y'ënä'ämtëty yë ëxëëkja'aytyëjkëty yë ja'ay mëti'ipë ëxëëk ja jyot wyinma'anyën ets nëkoo wyin'ëënëty.

³¹ ¿Ëkë tëë yë Dios xy'ënëëmë: Dios, tëëjës kë'ëm näwyin'ëënyë, ka'apës n'ëkpokytyunanë,

³² tuk'ijxkës ja npoky mëti'ipës ka'ap n'ixyën. Pën ëjts tëëjës winë tëkatsy ntuny ka'apës jëtu'un n'ëk'ëtë'ëtsanë?

³³ ¿Ëkë mtsojkpy ets Dios mkumayëtëty ijxtëm kë'ëm xytsyokyënë, oy të xy'ixtijyë? Pën mijts winë myajkutujkpy ets ka'ap y'ëjtsëty, tukmëmëtyaktëk ëëtsëty mëti'ipë mnija'apën.

³⁴ Yë ixpëkyjyä'äytyëjk mëti'ipës yam xymyëtoow'ijtëpën ets wijyjyä'ätyëjkëty, yë'ë ëna'anantëp:

³⁵ Job ka'ap t'ëknija'awënë tii kyajpxëp; yë kyäjpxy myëtyä'äky ka'ap y'ëkyajwinja'awënë.

³⁶ Wä'än yajxon tyajnijawë tii Job wyinma'any'äjtyp, jä'ä ko yë y'aaw y'ayuk jëtu'un yajmëtoy tä ëxëëkja'aytyëjk kyajpxtën myëtya'aktën.

³⁷ Job ka'ap je'eyë pyokyjyä'äyëty, käjpxy kumëtoownajxp näjyëtu'un; ëëts nwintuuy'ajtëmë yë Dios tnëxi'iky tukxi'iky ets je'eyë mëët nyäkyäjpxytsyiikyë.