Job 33 - Biblia Dc en Mixe de Quetzaltepec

¹ Paaty yam n'ënëëmë mijts Job, ko xymyëtoow'itëty yë n'aaw n'ayukës; mëtoow'itëty yajxon mëti'ipës yam nimëtya'akäämpyën.

² Ëjts nmëët'ajtypyës ja ëtsoowinpijtën n'aawkëjxmës;

³ mëtëyës yam nkajpxa'any ets yë'ëjës yam nimëtya'akäämpy mëti'ipës nmääpy ntäjpyën.

⁴ Dios, mëti'ipë maaytyääyëpën winë, yë'ëjës të xyajkojy etsës të xymyo'oy yë jot mëjaaw.

⁵ Ëtsoowinpijtkës pën maayëp xy'ëtsoowinpitëty; nänyi''ixët etsës xywinkuwa'akëty.

⁶ Mijts ets ëjts tu'knax'ajtëm Dios wyintum; ëjts naaxës ojts nyajtukpotsy.

⁷ Paatykyëjxm ka'ap tjëkyepy xytsyë'ëkëtyës, ka'ap yam tiikutujkën nmëminyës.

⁸ Jëtu'unës të nmëtoy m'ëna'any, ya'atë aaw ya'atë ayuk të nmëtoyës xykyäjpxy:

⁹ Ëjts wa'atsës, ka'apës tii poky nmëëtëty, ka'apës maa ntëkoy ets ka'apës maa npokytyuny.

¹⁰ Je'eyëp ko yë Dios yë'ëjës xypyoky ixtääpy ets jëtu'unës xy'ijxnë myëtsipën;

¹¹ jëtu'unës näjyawëty tëëjës yowë xy'atsumy xytyekytsyumy mëët yë pujxntejpxy ets xypya'ixy xypyawoonyës wi'ixës nnaxy ntëkë.

¹² Tääpë aaw ayuk ka'ap myëtëyëty, jä'ä ko yë Dios ni'ik yë myëjëty këtiinëm jyëtu'unëty yë naaxwiinyëtë ja'ay.

¹³ ¿Wi'ix ko xytyukwinmëtoy ko yë'ë ka'ap yë m'aaw m'ayuk nitu'uk t'ëtsoowinpity?

¹⁴ Yë'ë kanaakjëjp y'ëtsoowinpity, je'eyëp tëy ko ka'ap nwinja'awëmë.

¹⁵ Jëna'ajëty koots y'ëtsoowinpity, kuma'ayjoty ëkë ko ijxën myä'äty, ko mya'atë ja ja'ay, ko ja tsuu wyiintëkëtë.

¹⁶ Ame'tsyë Dios ja'ay tatskmëkajpxë; y'ojpy ets y'ëtsë'këp,

¹⁷ ets tukmëjëkämkä'äka'any ëxëëktu'un ëxëëk kajpxën, këtiipë mëj jaanty nyäyajnaxëtëty.

¹⁸ Jëtu'un tyajtso'oky o'kpëjutjoty, jëtu'un tyajtso'oky o'kënjëjp'am.

¹⁹ Jëna'ajëty yë Dios ja'ay t'awijtsë'ëky mëët yë yuu pa'am, ma mëk pyikyën y'ixyën jyotkëjxy nyini'kxkëjxy.

²⁰ E ko ënät tjajë'kxy oymyëti'ipë jë'kxyëty, ka'ap txu'kxjawë, ka'ap ninu'un tjë'kxa'any.

²¹ Wäänjaty yë xyixy jyënajknë, yaj'ijxnëp yë pyajk.

²² Tim ookanëp yaj'ijxnë, o'kpë ëkë'ëm y'ijnë.

²³ E pën jam yajpaaty winkon ma yë'ëjën tu'uk yë tsajpjotmëtë kukäjpxy, tu'uk mëti'ipë pëtsëmëpën ma nimaypyë ja myëku'uktëjkën ets yë'ë nyikajpxtu'utëtëty ma y'ëna'anëtyën ko janty wa'ats yajpaaty,

²⁴ wä'än pya'ëyoyë ets wä'än Dios t'ënëëmë: Yajpëtsëm o'këntujp, jä'ä ko tëëjës npatë mëti'ipë yajpëtsëmëtëpën ëyo'ontum,

²⁵ ënät jatëkok tsyo'okëty y'akëta'akëty ets je'eyëm y'awinpitëty tä jeexyë y'ëna'k'atyën.

²⁶ Myëpëjktsowëp ja Dios ets mëto'owxëtëp ja pyëjktso'owën; akujk jotkujk nëjkx ja Dios t'ixy wiinxë jëjpxë ets tkuuy'ëw tkuuya'axëty tsyojkën jya'awën.

²⁷ Ets y'ëna'ana'any: Tiijës ko të n'ëktuunpë ja ka'apë myëtëyëtyën, e Dios ka'ap të xytyiytyunyës;

²⁸ ni'ikyës të xyjyuuty jap o'këntujp ets jyaak jëkyejpy njaak'ixëtyës ja të'kxën jajën.

²⁹ Jëtu'un yë Dios tyajjuuky'äty yë naaxwiinyëtë ja'ay janaam jatsojk;

³⁰ yajtsokpy o'këntujp ets tuk'ixy ja jajën të'kxën.

³¹ Mëtoow'ijtkës Job; amonyë it maas yam nkajpxa'anyën.

³² Pën mëët'ajtyp yë aaw ayuk mëti'ipë mnikajpxäämpyën jyëkyejpy xy'ëtsoowinpitëty; pën mëtëy mkäjpxy, nmëpëkëpës yë'ë;

³³ e pën kajts, yë'ë mëtoow'it amonyë mëti'ipës yam nikajpxäämpyën ets mijts ixpëkyjyä'äy nyaj'awinpitëty.