Job 32 - Biblia Dc en Mixe de Quetzaltepec

Ma Elihú kyäjpxyën

¹ Ko tyaapë nitëkëëkpë ja'ayëty t'ijxtë ko yë Job ni'ikyë y'ënaan'ëtë'ëtsy ko ka'ap tii poky të tuny, ënät ojts t'ëxmajtsnëtë.

² E jam tu'uk ja ja'ay mëti'ipë xyëëwajtypyën Elihú, yë Baraquel yë myaank, Buz ja'ay, yë'ë y'u'unk y'ok yë Ram; ënät ojts kyajpxë'ëky, tëë ënety jeky y'ity amonyë oy jënu'un ja Job tjatuk joot'anpëky ko ni'ikyë y'ënaan'ëtë'ëtsy ko ka'ap tii poky tmëëtëty ets yë'ë pyoky'ijxyp ja Dios.

³ Ojts näjyëtu'un tukjoot'anpëky ja nitëkëëkpë ja ja'ayëty mëti'ipë mëët ja Job oy nyämyayëtën, jä'ä ko yë'ëjëty ka'ap ënety të tukjatë oy t'ëtsowtëty yë Job ets yë'ë Dios yajpokytyëjkëtyëp.

⁴ Yë Elihú, mëët ko ënety myutsk ëna'këty paaty ojts y'ëwxity koonëm myëtyaktaaytyë ja nitëkëëkpë ja ja'ayëty mëët ja Job;

⁵ e ko ja nitëkëëkpë ka'ap t'ëknija'awënëtë wi'ix y'ëtsowtëtyën, paaty ojts yë Elihú tyëkë kajpxpë

⁶ ets y'ënäny: E jä'ä ko ëjts ëna'kës e miits mëjja'ayëty, paatyës amonyë të n'ity.

Ma më''ëka'any kyäjpxyën ja Elihú Elihú kajpxp

⁷ Ets të nmay të ntajyës: Wä'än tkajpxtë ja jot winma'any mëti'ipë myëët'ajtëpën ja ja'ayëty tëëpë jyuuky'atën; wä'än tyajnikëxë'ëktë ko tëë kanaak jëmëjt jyuuky'atë.

⁸ Oy jyayajnijawë ko tu'kë'ëyë ja'ay aak myëët'ajtyp ja jot winma'any, jä'ä ko yë mëti'ipë maaytyääyëpën winë tëë tmo'oy nitu'ukjaty yë ja'ay wi'ixjaty myäyëty tyajëtyën.

⁹ Ka'ap yë'ëjëty yajwinma'anytyëkë ko ja'ay jeky jyuuky'äty, ets ka'ap yë'ëkyëjxmëty ja'ay tii winë oy tja'akyukë ko tëë yë y'awaay pyo'ojënë.

¹⁰ Paatyës të n'ëna'any: Tyam mëtoow'ijtëkës ënät, jä'ä ko nmëët'ajtypyës tu'uk mäjtsk yë aaw ayuk mëti'ipës nikajpxäämpyën.

¹¹ Tëës nmëtoow'ity ko tu'uk ja aaw ayuk të xykyäjpxy. Tëës n'ixy wi'ix nitu'ukjaty ja aaw ayuk mëk të xymyëmay të xymyëtajtën ko të xykyajpxpëtsëmtë,

¹² ets tëëjës näjyëtu'un n'ixy wi'ix nitu'ukjaty miitsëty oy ja kajpx ëtso'owën të xyaktën ma ja Job tii tjayajtëyën.

¹³ Këtiipë miitsëty janty ixpëky mnäyajnaxëtëty ets janty kuwinma'any, yë Dios yë'ë yakäämpy ja ëtsoowinpijtën ets ka'ap nyaaxwiinyëtë ja'ayëty.

¹⁴ Yë Job ka'apës ëjts tii xyajtëy ets ka'apës yë'ëjëty yam n'ëtsoowinpita'any tä miitsëty të xy'ëtsoowinpitën.

¹⁵ Job, yë'ë yam mijts ntuk'ënëëmëjäämpy ko tyaapë nitëkëëkpë ja'ayëty tëë wyinma'anytyëkoytyë ets ka'ap të tnijawëtë wi'ix m'ëtsoowinpitëtëty;

¹⁶ e kajts m'ëna'anëty ko ëjts amonyës yam nwë'ëma'any mëët ko yë'ëjëty tëë y'ëmontë, ëkë ko ka'ap t'ëkjajnëtë wi'ix m'ëtsowëtëtyën.

¹⁷ Ëjts tyamës näjyëtu'un ntukajpxëja'any ya'atë aaw ayuk ets nmëëtës tu'uk mäjtsk ja aaw ayuk mëti'ipës nimëtya'akäämpyën.

¹⁸ Ëjts janty nëkooyës näjyawëty n'ujts'ajnë mëët ja aaw ayuk mëti'ipës nimëtya'akäämpyën, paaty ka'ap tjëkyepy ëjts amonyë nwë'ëmëtyës;

¹⁹ mëpaatëpës npëjwa'kxnë, jëtu'un tä yë po'o akën ma y'ityën yë tsatym nyëë jemypyë yajpëkyën.

²⁰ Ëjts kopkpëkyës ko nkäjpxy ënätës oy näjyawëtëty, kopkpëky mijts nmo'ojëty ja ëtsoowinpijtën.

²¹ Ka'apës win'ixy wiinkexy ja'ay nimëtya'aka'any, tu'knaxës yam nimëtya'aka'any.

²² Ëjts ka'apës jëtu'un nwinjawë ets win'ixy wiinkexy yë ja'ay nimëtya'akëtyës, koos jëtu'un n'ëtë'ëtsëty tsojkës yë Dios xytyuktëytyunëty poj'am, mëti'ipë winë të tyajkojyën.