Job 31 - Biblia Dc en Mixe de Quetzaltepec

¹ Ëjts tëëjës kë'ëm njot nwinma'any npëjktä'äky ko ka'apës n'atsoka'any yë to'oxytyëjk mëti'ipë nätyu'uk'ajtpën.

² ¿Yë Wintsën, mëti'ipë maaytyääyëpën winë, tsajpkëjxmëpë yajpaatyën, mëti'ipë kuma'ayën myoopy yë naaxwiinyëtë ja'ay?

³ ¿Ti këtiijën yë'ëjëty ja ëxëëkja'aytyëjk ets ja pokyjyä'äytyëjk pyaat'atëtë ja ëyo'on jotmayë?

⁴ ¿Ëkë jä'ä ko ka'ap yë Dios t'oy'ixy mëti'ipës ntuunpyën ets ka'ap t'ijxpaaty wi'ixës nye'ey nnaxyënë?

⁵ Ëjts tyamës nikajpxpety, ko ka'apës nijëna'a tii ëxëëk ntuny ets ka'apës nijëna'a pën të nwin'ëëny.

⁶ Wä'än yë Dios xy'akijpxnaxyës ma kyijpxnën ets tmëpëkëty ko ëjts ka'apës tii poky të ntuuntëkoy.

⁷ Pën tëëjës njëjpye'eytyu'uty ja tëytyu'u, pën tëëjës winë n'atsoky, pën tëë yajpaaty winë maas ntëjkën mëti'ipës ka'ap njä'äjëtyën,

⁸ jyëkyejpy yë wiink ja'ay tjë'kxëty mëti'ipës të ni'ipy të nkojyën ets jyëkyejpy twijxë'ëktëty mëti'ipës të nkojy të nmä'kxyën.

⁹ Pën tëëjës yë to'oxytyëjk nätyukmëmëtä'äkyë ëkë pën tëëjës yë nmëjëën nmëtëjk yë tyo'oxytyëjk n'ix'ijx npa'ijxë,

¹⁰ jyëkyejpy yë nto'oxytyëjkës wiink ja'ay tmëtunëty ets jyëkyejpy yë wiink ja'ay myëëtko'knëtëty.

¹¹ Jä'ä ko pën jëtu'unës të ntuuntëkoy ka'ap yë y'oytyuunkëty; jëtu'unpë ja tu'unën kajpxën jyëkyejpy ja yajkumëtowëty.

¹² Jëtu'un nyäxy tä tu'uk yë patoyë jëënën mëti'ipë nyo'ktëkoopyën winë, mëti'ipë yajkutëkooytyääpyën mëti'ipës nmëët'ajtypyën.

¹³ Koos ijty yë ntuunpëtëjk tii xy'amëtowtë, nmoopyës ijty.

¹⁴ ¿Wi'ixës tëkatsy yë Dios nwinkuwa'akëty? ¿Wi'ixës n'ëtsowëty koos tii xyajtëwëty?

¹⁵ Tu'ukyë Dios mëti'ipë ojts xyajkojta'ayëmën taak jootjoty, yë'ëjëty ets ëëts'ajtëmë tu'ukyë ojts xymyooytyä'äyëmë yë juukyajtën.

¹⁶ Ëjts xëmës yë ëyoopëja'ay të nputëkë ma winë të tyajmëyätyën, ka'apës të nkupëky ets ku'ookytyo'oxy wyë'ëmëty jaaykyäy.

¹⁷ Ka'apës ëjts nijëna'a tii nätyu'uk të nkay të një'kxy, xëmës të nyajwä'kxy yë nka'ayën n'ukën mëët yë ku'ooky u'unk.

¹⁸ Jëtu'un tä tu'uk teetyën, jëtu'unës të njawë yë ku'ooky u'unk, tëëjës xëmë nkuwa'any yë ku'ookytyo'oxy.

¹⁹ Koos ijty n'ixy tu'uk yë ja'ay o'ktëy jyäty kyëpety ko ja wyit tyujkxy kya'ity, ëkë ko tu'uk yë ëyoopëja'ay tkamëët'aty tii nätyukxoxëtëpën,

²⁰ yë'ëjës ntukxojxyp ja pixyny mëti'ipës ja nkupixyny kë'ëm të ntuknikä'ptu'utyën etsës nmu'uxy ja ëyoopëja'ay, e yë'ë kyukajpxëp jya'awëkyëtäkpy mëjwiin këjää.

²¹ Ka'apës nijëna'a yë ku'ooky u'unk të n'ëtsu'ux yä'äxy, mëët yë'ë koos mëj'äämpy n'ity ma kutuunktëjkën.

²² Pën ya'atë ka'ap myëtëyëty, jyëkyejpy yë nkë'ëtsomës y'atëjtukëty; jyëkyejpy tyimnëka'ajëty nkejkykyijxyës.

²³ Ëjts tëëjës ntsë'ëkë Dios yë tyiytyu'unën; ka'apës ijty nmëmëta'aka'any yë myëj'ajt y'oyajtën.

²⁴ Ëjts ka'apës yë'ë pu'ts pujxn të njä'ä'aty ets ka'ap jyamëty yë nwinma'anyës të npëjktä'äky ets yë'ë të ntukjotkujk'atyës.

²⁵ Ka'apës të n'ëna'any ko yë wit meeny yë'ëjës ntukjotkujk'ajtyp ëkë të n'ëna'anyës ko may yë wit meeny nmëët'atëtyës.

²⁶ Tëës n'ixy yë xëëw po'o wi'ix tyi'kxy jyäjyën,

²⁷ je'eyëp ko ka'apës nijëna'a të n'ëwtaty ame'tsyë, ka'apës yë nkë'ë të nastijë ma yë'ëjën etsës të ntsu'kxy.

²⁸ Yë'ë jyëkyejpy jeexyë nkumëtoyës; jä'ä ko Tiosës ënety të nwinaxy mëti'ipë tsajpjotm ijtpën.

²⁹ Ka'apës nijëna'a yë nmëtsip të ntukxoontä'äky ko ëxëëk të jyäty të kyëpety ets oy tii ëyo'on jeexyë të nyimiinëtë.

³⁰ Ka'apës ojts nijëna'a npoky ets ka'apës ojts nijëna'a o'kën tëko'oyën ntuknikäjpxy.

³¹ Ko ijty tu'uk yë ja'ay, mëti'ipë tsënääpyën maas yë ntëjkën nëkoo ëxaty tuna'any yë jaaypyo'kxy,

³² ëjts ka'apës ijty jap tëja'p nyajwë'ëmy koots tääpë jaaypyo'kxy. Xëmës të ntëjkmo'oy yë në'ëye'epyë tu'uye'epyë.

³³ Ka'apës yë npoky nijëna'a të nyu'utsy, jëtu'un tä wiinkpë y'ëtë'ëtstën ets ka'apës nijëna'a yu'utsy të nmëët'aty

³⁴ jä'ä ko yë'ëjës ja'ay ntsë'këp. Ka'apës nijëna'a ku'ëtuky të näpyëjktä'äkyë ëkë amonyë, mëët yë'ë koos ntsë'ëkë ko wi'ix y'ëna'antëty yë njëëky nmëku'ukës.

³⁵ Jääpëk jeexyë pën t'ëkmëtoy yë n'aaw n'ayukës. Tyamës nwinkäätsëty yë ayuk mëti'ipës mëtëy nkajpxpëtsëëmpyën; tyam wä'än xy'ëtsoowinpityës yë mëti'ipë maaytyääyëpën winë. Ja aaw ayuk mëti'ipës ënety xytyuknipëtsëëmtëpën maas xynyi'ëënëtën këxja'ay,

³⁶ nmënëjkxäämpyës mëët jot winma'any wa'atspë, etsës npëjkta'aka'any jam nkëpajkëjxmës tä kujänën.

³⁷ Ntuk'ëwaanëjäämpyës yë Dios wi'ixjatyës winë të ntunyën, mëët ja mëk'ajtën nwinkuwa'akëja'anyës.

³⁸ Yë nnaax nkamës ka'apës tëkatsy xynyimëtyä'äky ets nyëëtu'u ka'ap mon tuk jyë'ëtë ya'axtë.

³⁹ Pën tëë tii pën nmä'tsës mëti'ipë myëët'ajtypyën, ëkë pën tëë nëkoo nayajnatëkëtunyës yë naaxtuunpë ja'ay,

⁴⁰ jyëkyejpy yë nnaaxës wyinyo'onëtya'ajëty mëët yë äpny jëtu'un tä jeexyë jam yonyën yë tsajpmok, jyëkyejpy yë ëxëëk ujts jam yontëty tä jeexyë yë cebadë jam yonyën. Jëtu'un ja Job tyajkëjxy ja y'aaw y'ayuk ma nyäkyukäjpxyën mëk'äämpy.