Job 3 - Biblia Dc en Mixe de Quetzaltepec

Ma Job tpokyën ja xëëw ma myëxu'unk'ajtyën

^1-2 Tëë ënety kanaak xëëw amonyë y'ënyääynyëtë ko ja Job ojts tpoky ja xëëw ma myiinyën naaxwiiny.

Job

³ Npojkpyës ja kootsajtën tsu'um'ajtën maas nmëxu'unk'ajtyën. Npojkpyës ja xëëw maas nmiinyën naaxwiiny.

⁴ Ojts jeexyë ja xëënypë y'awinpity koots ets ka'ap jeexyë Dios nëkoo ojts tmëjpëjktä'äky, ka'ap jeexyë tyim xëënyëy.

⁵ Nikë oy'ajt ko jeexyë tyimkootsëy, ëkë ko jeexyë ojts tyimwintujkta'ay, ëkë ko jeexyë ojts jää xëëw y'ooky ets tsyë'këtyääytyë ja ja'ay.

⁶ Nikë oy'ajt ko jeexyë tyimtëkooy ja kootsajtën jä'ä tsu'umpë ets jeexyë ka'ap yajmëtyooy tääpë xëëw ma ja xëëw jëmëjt tyu'uye'eyën.

⁷ Nikë oy'ajt ko jeexyë jä'ä xëëw, ka'ap pën myëxu'unk'ajty, nikë oy jeexyë jää pën kyaxoontäky.

⁸ Nikë ojts jeexyë yë xëëwmääpyëtëjk timpyoktë tääpë xëëw, mëti'ipë myëët'ajtëpën yë mëk'ajtën ma mëj jëyujkën nëëjotypë tsyëënën, mëti'ipë yajtijpën leviatán.

⁹ Ka'ap jeexyë ojts tyimtë'kxy yë xëëw jä'ä jopyë, ka'ap jeexyë tyimja'ajty ja të'kxën jajën mëti'ipë mëk yaj'ëwxijtpën, ka'ap jeexyë ojts tyimtsajp'okpu'uy.

¹⁰ Npojkpyës yam tääpë kootsajtën mëti'ipë ojts t'ëwa'atsyën etsës nmëxu'unk'atëty, mëti'ipë ojts t'ëwa'atsyën etsës yi'iyë n'ixëty ëyo'on jotmay.

¹¹ ¿Wi'ixës ko ojts nkatimy'ooky ntaakës jyootjoty, ëkë maas ënety jam ntimmyinyën naaxwiiny?

¹² ¿Wi'ix ko jyam'ajty ja tekykyox mëti'ipës xy'ëxajëyën ets wi'ix ko jyam'ajty ja tsi'tsk mëti'ipës xyajtsi'tsën?

¹³ Koos jeexyë ntimy'o'ky, nikë ojts jeexyë tyim'oyë. Tyam maap po'kxpës jeexyë akujk jotkujk

¹⁴ mëët yë yajkutujkpëtëjk, wintsëntëjkëty, mëti'ipë mëjjëty yë kyutujkëntëjk ojts tkojtën,

¹⁵ ëkë mëët yë ënä'ämpëtëjk mëti'ipë yaj'ujtstën yë kyëmoontëjk mëët yë pu'ts pujxn ets poop pujxn.

¹⁶ ¿Wi'ix ko ojts xykyatimyajnaaxtëkëtës tä nyaaxtëkën yë mëxu'unk o'kpë, tä nyaaxtëkëtën mëti'ipë ooky miintëpën naaxwiiny?

¹⁷ Jap naaxjoty jap kyukëxë tëkokyë yë ëxëëkja'aytyëjk, yë y'ëxëëktu'un y'ëxëëk kajpxënëty, e mëti'ipë të y'ënu'kxën jap tpaaty yë po'kxtakn;

¹⁸ jap yë tsumjyä'äy jyotkujkë ets ka'ap jap t'ëkmëtoownë wi'ix yyä'äxy jyokyën yë ënä'ämpë;

¹⁹ jap naaxpa'tkë'p tu'knax ja'ay jap yajpaaty, wä'än tmëjëty tmutskëty. Yë mëtuunpë mëti'ipë ëxëëk yë wyintsën të tyunyën jap tpaaty yë jotkujk'ajtën mëti'ipë ka'ap të tpaatyën ma të jyuuky'ätyën.

²⁰ ¿Wi'ix ko Dios t'a'ixë ets ja'ay jyuuky'atëty mëët yë ëyo'on jotmay? ¿Wi'ix ko ni'ikyë tyajjuuky'ajt'ëtë'ëtsy mëti'ipë pëjkëpën ijxëpën,

²¹ mëti'ipë jyajëjp'ijxypyën yë o'kën ets ka'ap nyäky'ooky, mëti'ipë jëtu'un yë o'kën jya'ixtääpyën tä jeexyë tii muum ka'ap tpaatyën mëti'ipë yu'utsy'ijtpën?

²² Tääpë jëtu'unpë ja'ay jäänëm jotkujk'ajtën tpaatëty ko yajnaaxnitajnëty.

²³ Jëtu'un yë Dios yajtu'uye'eyë tä jeexyë wyiintsëtyën, xiitsow yaatsow muum t'awa'ktuky.

²⁴ N'ëjënës ntu'kënës një'kxyp; npëjkënës n'ijxënës n'ukpy.

²⁵ Tëkokyë mëti'ipës ënety ntsë'këpën, mëti'ipës ënety ni'ik ntsë'këpën, aak yë'ëjës të npata'ay.

²⁶ Ka'apës nijëna'a npo'kxy ets ka'apës nijëna'a nxajwinpity; ka'apës njotkujk'aty, ëxëëkëmës näjyawëty.