Job 29 - Biblia Dc en Mixe de Quetzaltepec

Ma Job nyäkyukäjpxyën Ma Job kyäjpxyën

^1-2 Jëtu'unpëk jeexyë jatëkok njuuky'ajtwinpityës maas ijty yë Dios xykyuwa'anyën.

³ Koos ijty yë'ë xykyutë'kxy xykyujajy ets jyëkyejpy nye'ey nnaxëtyës akootstuuy;

⁴ maas ënety ëjts oy mëk nyajpaatyën ets ma ënety yë Dios yë'ë tkëwent'atyën yë njëën ntëjkës;

⁵ ma ënety jyaak yajpaatynyëmën mëti'ipë maaytyääyëpën winë mëët ëjts ets ma ënety ja n'u'unk n'ëna'kës xymyëët'atënëmës;

⁶ ma ënety ja jë'kxy pëky ka'ap y'ëmaaytyä'äkynyëmën ets ma ënety jëtu'un pyëyi'ikyën tä jeexyë yë on ets tsi'tsknëë pyëyi'ikyën naaxjoty ëkë tsaajoty;

⁷ koos ijty n'u'unyë npo'kxy ko yë ja'ay ye'eymyuktë ma naax kajpnën.

⁸ Koos ijty yë ëna'ktëjk xy'ixtë, poj'am ijty wyä'ätsë'ëktë etsës xymyo'otë y'ënyääypyäjn ets mëjja'aytyëjk wyinkutsë'këtyëp ijty.

⁹ Yë'ëpaat yë ja'ay mëti'ipë mëj'äämpy ijtëpën ëmoontaaytyëp ijty ets mëët yë kyë'ë nikajpxtë këtiipë pën nyä'ämëty.

¹⁰ Yë'ëpaat yë ja'ay mëti'ipë ënä'ämtëpën yu'unk ijty kyajpxtë; ets yä'än jyä'änëtya'atë ma pya'kxwiinëtyën.

¹¹ Ko ijty yë ja'ay tmëtoow'itë mëti'ipës nkäjpxypën, ënät ijty xymyëkajpxtës ets oy xynyimëtya'aktës,

¹² jä'ä ko nputëjkëpës ijty yë ku'ooky u'unk ets ëyoopëja'ay, ja ja'ay mëti'ipë ijty ka'ap pën pyutëkëtyën.

¹³ Mëti'ipë winë yajmëyäjtypyën xykyukajpxëpës ijty; koos yë ku'ookytyo'oxy ijty nputëkë mëk ijty xyoonta'aktë.

¹⁴ Ja tëyajtënpë ets mëtëypyë ja tu'unën kajpxën kë'ëmës ijty ntuunkojy; jëtu'unës ijty ntimy jyawë ijxtëmës jeexyë nätyukxoxyën yë wit.

¹⁵ Ëjts ijty xywyiin'ajtp yë ja'ay mëti'ipë wiintsën, ëjts xytyeky'ajtp ja'ay mëti'ipë tekymya'atën,

¹⁶ teetyën ijty xyjyawëtës ja'ay mëti'ipë winë yajmëyajtëpën, kuwaanpë ijty xyjyawëtës yë jaaypyaat jaaypyo'kxy.

¹⁷ Ntuk'akojxtutypyës ijty yë ëxëëkja'aytyëjk winë mëti'ipë pyëjkëtyëpën yë ëyoopëja'aytyëjk.

¹⁸ Etsës ijty nmay ntajy: Ëjts, jekyës njuuky'ata'any, jëtu'unës yë nxëëw njëmëjt myäyëja'any tä nëë ajinën; mëj ja'ayës nëjkx n'ooky ets jam n'ookëtyës maas njëën ntëjkën.

¹⁹ Jëtu'unës ëjts tä tu'uk yë kepyën nëë ëkë'ëypyë tyänën, mëti'ipë tu'ktsu'um yajxo'këpën yë maanik.

²⁰ Yë nmëj'ajtënës xëmë y'ajämëja'any ets nmëjaawës ka'ap nijëna'a kyukëxëja'any.

²¹ Aak myëtoow'ijtyp ijty yë ja'ay yë n'aaw n'ayukës ets aakyë'ë y'ëwxijtëp jëna'a ja ëëwij kajpxwijën nmo'otës.

²² Koos nkajpxta'ay ni pën ijty xykyajëjpmëkajpxës. Jëtu'un ja n'aaw n'ayukës pyata'ajëtë tä nëë tu'ktsunyjyäty kyä'äyën ma yë'ëjëtyën,

²³ ets jëtu'un ijty t'ëwxitë tä yë nëë tuu yaj'ëwxityën ko xyëkopk'aty.

²⁴ Koos ijty nmëëtxi'iktë ka'ap tmëpëktë jä'ä ko mëj këjääjës ijty xypyëjkta'aktë ets tu'ukyë xyääntywyintë'kxtës akujk jotkujk.

²⁵ Ëjts ijty tim ënä'ämp ma yë'ëjëtyën ets ëjts ijty winë ntuknipëjktakëp tii tyuntëpën, tä tu'uk yë yajkutujkpë ma tsyiptuunpëtëjkëtyën. Ko ijty pën myony tyuky, ëjts ijty nyajjotkujkëp.