Job 28 - Biblia Dc en Mixe de Quetzaltepec

Ma yajkuuy'iyën ja wijyajtën

¹ Tää yë it naaxwiinyëtë yajpaaty ma pyëtsimyën yë poop pujxn ets ma pyëtsimyën yë pu'ts pujxn.

² Yë juunpujxn naaxjoty yë pyëtsimy ets tsaa yë'ë, ko ja'ay jëënjoty tpëjktä'äky tääts pyëtsimy wa'ats pujxn.

³ Tëë yë naaxwiinyëtë ja'ay tpaaty yë winma'any wi'ix yë kootsajtën tmëmëta'akëty, tëjkëp jap naaxpa'tkë'p ets ma y'api'its y'akootsëtyën jap t'ixta'ay yë tsaa.

⁴ Yë'ë mëët yë tejpxy nyäkyutëëynyäxyë, mëjjëty muum jut tyaj'ëwa'atstë ma tpaata'antë yë oyëtypë tsaa mëti'ipë awinpijtpën pujxn, jap muum të jya'të ma ja'ay ka'ap kawintimpë tyëkën, ma tmëjëkäm'atyën yë naax kajpn.

⁵ Naaxwiinkëjxy, yë'ë yoonp ji'tsp yë tsajpmok ets jap naaxpa'tkë'p jëën jap ëwtijtp.

⁶ Jap yajpaatë tsaa oyjyätyëtypë mëti'ipë yajtijpën tsuxk uky tsyaa ets pu'ts pujxn mëti'ipë naaxmëxëpinën.

⁷ Yë'ëpaat yë me'ty ets jëyujk mëti'ipë kääkjëtijtëpën ka'ap nijëna'a jëtu'unpë ye'eytyakn najxtakn t'ixtënëm.

⁸ Yë jëyujk ka'ap jap tyëkëtë ets kaa tii jap tyunëp.

⁹ Yë naaxwiinyëtë ja'ay ko tuknipëjktaakë yë'ëpaat yë tsaatun tjity ets tyajkëtay yë tun kopk.

¹⁰ Yajjujtyp yë tsaakääts ets jap tnipu'utu'uty oyëtypë tsaa.

¹¹ Yë'ëpaat t'ixy tuny ma mëjnëë myuutyën ets tyajpëtsëmy ijxëntuuy mëti'ipë yu'utsy'ijtpën.

¹² ¿E maa ja wijyajtën tsyoony? ¿Ma ja ixpëkyajtën yajpaaty?

¹³ Yë naaxwiinyëtë ja'ay ka'ap tnijawë wi'ix tsyowpaatyën ets ka'ap tpaaty naaxwiiny naaxkëjxy.

¹⁴ Yë mëjmejy jëtu'un y'ënä'äny: Ka'ap yaajëty, e yë juukymyejy jëtu'un y'ënä'äny: Ka'apës y'ëjtsëty nmëëtëty.

¹⁵ Ka'ap tjëkyepy npatmëty mëët yë pu'ts pujxn ets ka'ap tjëkyepy nju'uymyëty mëët yë poop pujxn.

¹⁶ Ka'ap tjëkyepy ntukuju'uymyëty yë pu'ts pujxn oypyë yaj'ixyën ets ka'ap tjëkyepy yajtukjuyëty yë uky tsyapts tsaa ets tsuxk uky tsyaa.

¹⁷ Ni'ik yë tsyowpaaty këtiinëm yë pu'ts pujxn ets kiik; ka'ap tjëkyepy ntukwinkupëjkmëty yë pu'ts pujxn.

¹⁸ Yë wijyajtën ni'ik y'oyëty këtiinëm jyëtu'unëty yë nëëtsaa ets këtiinëm jyëtu'unëty yë kiik ëkë tsaa oyëtypë.

¹⁹ Yë të'kxy tsyaa mëti'ipë jap Etiopíë tso'onpën ka'ap tmëpaatëty ets ka'ap tjëkyepy yajtukjuyëty yë pu'ts pujxn wa'atspë.

²⁰ ¿Maaxën ënät tsyoony yë ixpëkyajtën? ¿Maaxën yajpaaty yë wijyajtën?

²¹ Jam yu'utsy yajpaaty ma jëyujk ëwa'anëtypë, ma joon ka'ap t'ijxpaatëtyën.

²² Yë'ëpaat o'kën tëko'oyën y'ëna'antë: Ëëtsëty je'eyës të nmëtowtë ko jyääjëty.

²³ Yë'ë tëy yë Dios nyija'ap yë nyë'ë tyu'u yë ixpëkyajtën; yë'ë tu'uk nyija'ap maa yajpaatyën,

²⁴ jä'ä ko yë'ë y'ijxtääpy winë naaxwiinyëtë apëtsëmy ets tu'kkë'ëyë mëti'ipë yajpatpën tsajppa'tkë'p.

²⁵ Ko yë Dios tmooy yë poj yë myëk'ajtën ets t'apëjktujky mapaat yë nëë nyaxëtyën,

²⁶ ko tmooy ja y'ënä'ämën ja nëë tuu ets tu'umooy ma nyaxëtyën yë tuupoj,

²⁷ ojts näjyëtu'un tyajtuunkpaaty yë ixpëkyajtën ets tyajtsoowtëjkëy, ojts tmëmay tmëtajy ets oy t'ijxy.

²⁸ Ets Dios t'ënëmaay yë naaxwiinyëtë ja'ay: Ko yë Dios oy yajmëtuny, yë'ë ënety yajmëët'ajtp yë ixpëkyajtën; ko yajmëjëkämke'eky yë ëxëëkpë, yë'ë ënety yajmëët'ajtp yë wijyajtën.