Job 26 - Biblia Dc en Mixe de Quetzaltepec

Ma Job kyäjpxyën

^1-2 Wi'ixën ja ja'ay xypyutëkë mëti'ipë të myëjaawkëxyën, wi'ix ja ja'ay xyajtso'oka'any mëti'ipë tëë y'ënu'kxën.

³ Nëkoo oy m'ëk ëëwij m'ëk kajpxwijnë ets xy'ëkwinma'anymyooynyë ja ja'ay mëti'ipë tsuujën.

⁴ ¿Pën mputëjkëyëp ko jëtu'un m'ëy mkäjpxy? ¿Pën të mmo'oyë jëtu'unpë jot winma'any?

Ma Bildad kyäjpxyën

⁵ Yë ja'ay mëti'ipë të y'ooktën këkmejyjoty, yë'ëpaat jap tsyë'ëkëtë nëë'itkujky.

⁶ Yë o'ktakn, ma o'kën yajkutukyën, ka'ap jap tii yu'utsy'ity mëët yë Dios.

⁷ Dios të twijtstëy yë tsajp ma ka'ap tiijën ets të tkëxjeny yë naaxwiinyëtë ma ka'ap tii yajpaatyën.

⁸ Yë'ë yajku'ëtujkpy yë nëë yootsjoty ets ka'ap yë yoots kyë'ëtswä'kxy;

⁹ wyinkuwijtsëp yë po'o mëët yë yoots;

¹⁰ yë'ë të tpëjktä'äky yë nëë ets tsyëpa'an'atëty, ma jya'tëtyën yë xëëw'an, ets tsyo'onta'akëty yë kootsajtën.

¹¹ Ko yë Dios tsyipwinkajpxë, tsëyuuytyääpy yë tun kopk ma tsajp nyäkyumatsyën.

¹² Mëët yë jyot myëjaaw të tmëmëtä'äky yë mëjmejy; mëët yë pye'tym'ajtën të tyajkutëkoy yë Rahab, mëti'ipë jëtu'unën tä mëj jëyujkën.

¹³ Mëët yë xyejy të tyajwaatsë'ëky; yë kyë'ë y'aaw mëët të tyaj'ooky ja mëj tsa'any.

¹⁴ Ets tyaapë wäänë yë'ë mëti'ipë të tunyën; mëti'ipë të nmëto'owëmën yi'iyë mëti'ipë je'eyë yajnikajpx yajkukajpxpën. ¿Pën y'ëkja'akyukëp yë y'ënaaw mëti'ipë maaytyääyëpën winë?