Job 24 - Biblia Dc en Mixe de Quetzaltepec

¹ ¿Wi'ix ko yë Wintsën ka'ap tnikäjpxy jëna'a winë tuna'any? ets jeexyë yë myëku'uktëjk tnijawëtë mëti'ipë mëët oy nyämyäyën.

² Yë ëxëëkja'aytyëjk yajtëkatstëp yë tsëpa'an ma kam tu'ujën, myä'tstëp yë kupixyny ets jyä'ä tyajnimayëtë,

³ pyëjkëtyëp yë kyupixyny yë ku'ooky u'unk ets ku'ookytyo'oxy.

⁴ Jyëkäjxtëp yë ëyoopëja'ay në'ë'aay tu'u'aay ets ja'ay mëti'ipë yu'unk naxym ja'ay'ajtëpën nyäyu'tsta'ajëtë.

⁵ Yë ëyoopëja'aytyëjk, oy wi'ix tjanty nyipëtsëmtë jyi'kxy pyiky, jam të'ëts'itjotm jam nëjkx tyajtsoontë yë y'u'unk y'ëna'k yë jyi'kxy pyikyëty tä yë kruktsën.

⁶ Jam nëjkx muum ja'ay kyamjotm tpëjkmuktë oynu'un yë tsajpmok, ëkë tsatym nyaska'ajë ma ëxëëkja'aytyëjk kyam tyu'ujëtyën.

⁷ Jëtu'un yë tsuu tyajnaxtë, ka'ap tii tmëët'atë tii nätyuknimu'uxëtëp, ka'ap tii mëti'ipë jeexyë nätyuk yu'tsëtëpën ko tyëpooktë.

⁸ Ko nyitu'utë jam tunkëjxm jëtu'unyë wyit xyo'kta'atë ets jap muum tsaajutjoty kyäktso'oktë.

⁹ Pyëjkëtyëp näjyëtu'un yë ku'ookytyo'oxy yë y'u'unk myääy mëti'ipë je'eyë tim mëxu'unk'ajtpën ets ëyoowpëja'aytyëjk ni'ikyë winë t'amëtowtë ko tii tuknu'kxtsowtë.

¹⁰ Yë ëyoowpëja'aytyëjk je'eyëp ko niwa'ats ëxwa'ats kyajëtitë, yë'ë oy yuu'ooktëty nëkoo ko wiink ja'ay yë tsyajpmok tsëëmjëtijtëtë.

¹¹ Tyijëtijtëp ja mëjtsaa mëti'ipë mëët ja on tukwintääntën; yajxon yë tsatym tjanty wintääntë ma tsatym nyëë tyajpëtsëmtën, e yë'ëjëty oy yë tyëëtsë'ooktëty.

¹² Jam muum kajpnpë'am jyë'ëtë ya'axtë ets myontë tyuktë, e yë Dios jëtu'un nyäpyëjktä'äkyë ka'ap yowë tmëtoy.

¹³ Tää ja'ayëty mëti'ipë y'ëxëëk ijxtëpën yë të'kxën jajën ets ma nyë'ë tyu'ujëtyën ka'ap ninu'un yë të'kxën jajën jam yajpaaty.

¹⁴ Yë yaja'ay o'kpë tsojk pyëtë'kojy ets tyaj'ooka'any yë ëyoopëja'ay, e ko kyootsë mä'tspë y'awinpity.

¹⁵ Yë ja'ay mëti'ipë yë nyiye'etyëjk ëkë tyo'oxytyëjk ka'ap twinkutsë'ëkën yë'ë y'ëwxijtyp jëna'a kyootsë ets je'eyë wyiin jyëjp t'aju'uxtuky, këtiipë pën y'ixëtëty.

¹⁶ Yë mä'tspë koots tyëjktëkë. Tëkokyë yë'ëjëty aak näyajku'ëtujkëtëp ko xyiiny'äty; ëxëëk yë të'kxën jajën t'ixtë.

¹⁷ Yë xëënyajtën koots tyajnaxtë; yë'ë tsyojktëp yë kootsajtën.

Ma Sofar kyäjpxyën

¹⁸ Yë ëxëëkja'aytyëjk nëëkom yajwinpajë'tëp. Poky yë nyaax kyam wyë'ëmtë ets ka'ap pën nijëna'a jam y'ëk'tuunëty ma tmëët'atën yë tsatymkyam.

¹⁹ Yë tip jëëywya'kxp ko y'aantä'äky, näjyëtu'un yë pokyjyä'äy tëkooynyëp ko nyaaxtëjkënë.

²⁰ Yë'ëpaat yë tyaak jyä'äytyëkooyënë; yë tënë'k tsu'tstaayëp ets ka'ap pën y'ëkja'amyäjtsënë. Yë ëxëëk ja'ay jëtu'un jyata'any tä yë kepy kyëtäyën ko yajpujxë'ëky.

²¹ Ëxëëk ojts tuny yë to'oxytyëjk mëti'ipë ijty ka'ap yë y'u'unk y'ëna'kën ets mëti'ipë ku'ookyën, ka'ap nijëna'a tputëjkëy yë ku'ookytyo'oxy.

²² Yë Dios, yë'ë yajkutëkoopy mëti'ipë kuttujkën mëëtën; ko yë'ë jyoot'anpëky ka'ap ni pën tnime'kxy.

²³ Dios yë'ë yajjuuky'ajtëtëp akujk jotkujk, je'eyëp ko ijxëtëp wi'ix nyë'ëye'ey tyu'uye'eytyën.

²⁴ Wäänë yë ëxëëk ja'ay y'ëtëtskojy y'ënaankojy ets poj'am y'ooky. Jëtu'un xyootsy poj'am tä ujtsën wijxë'ëkpyë, ëkë tä yë tsajpmokën mëti'ipë yajku'ä'kxpën.

²⁵ E pën ya'atë ka'ap jyëtu'unëty, ¿pënës xywyinkukajpxëjaanp ets pën ëna'anaanp ko ëjts tëkatsyës yam winë nnimëtyä'äky?