Job 23 - Biblia Dc en Mixe de Quetzaltepec

Ma Job kyäjpxyën

^1-2 Ëjts yë n'ëjjën ntu'kën ta'amën jya'awëkyëtä'äky jä'ä ko Dios yë'ëjës xytyuk'ëwa'anxä'ämp.

³ Jääpëk jeexyë nijawës maas npaatëty wi'ixës jam nja'tëty ma y'ityën.

⁴ Yë'ëjës jeexyë ntuk'ëwa'anëtyääpy wi'ixjatyës ja njotmayën, ëjts mayës ja aaw ayuk nmëëtëty.

⁵ Ëjts nija'apës wi'ixës jeexyë n'ëtsoyën koos jeexyë tii xy'ëkyajtëy.

⁶ Yë'ë ka'ap jeexyë atsip tii tkäjpxy, jëyëjp jeexyë tmëtoow'ity wi'ixës n'ëna'anyën

⁷ jyä'äkyujkëp jeexyë wi'ixës n'ëna'anyën; wa'atsës ja xypyëjkta'akëty, xy'ëxmajtspës jeexyë ëwaatsëtuuy xëmëkyëjxm.

⁸ Ëjts tëëjës yë Dios jam nja'ixta'ay ma xëëw pyëtsimyën, ka'apës jam pën të npaaty; tëëjës nja'ixta'ay ma xëëw kyëtä'äkyën näy ka'apës jam të npaaty.

⁹ Tëës njanëjkxy anëkëjxytsyow ets ka'apës të npaaty; ëpa'tkë'ëytsyow të njawinpity ets ka'apës pën të n'ixy.

¹⁰ Yë'ë wa'ats tnijawë nye'eyënës nnajxënës; koos xy'ëk'ixa'anëty, wa'atsës xypyaatëty tä pu'ts pujxnën.

¹¹ Ëjts xëmës oy të nnë'ëye'ey të ntu'uye'ey ma ja në'ë tu'ujën mëti'ipës të xytyukni''ixën.

¹² Xëmës të npatuny yë y'ënä'ämën, tyiyajtën, kyutujkën ets ka'ap kë'ëmwinma'any tii të ntunyës.

¹³ Ko yë'ë tuknipëjktaakë tii tuna'any, tyuunpy yë'ë; ka'ap pën tjëkyepy wyinma'anytyuktëkëtëty.

¹⁴ Ijxtëm të tuknipëjktaakën xytyuna'anyës, jëtu'un xytyuna'anyës ets näjyëtu'un tuna'any wiinkëtypë.

¹⁵ Paaty ntsë'këpës yë'ë, je'eyëpës njamëmay njamëtajy täätsës yë tsë'ëkë xytyuktëkë.

¹⁶ Dios, mëti'ipë maaytyääyëpën winë, yë'ëjës të xyajtsë'ëkëtëkë.

¹⁷ Jääpëk jeexyë kootsajtën yë'ë xyaj'atëkoyës ets jeexyë tsu'um'ajtën jëtu'unyë xywyimpijtmukyës.