Job 21 - Biblia Dc en Mixe de Quetzaltepec

Ma Job kyäjpxyën

^1-2 Mëti'ipë mëpaat miitsëty xytyuntën etsës njotkujk'atëty, yë'ë ko xymyëtoow'itëty yë n'aaw n'ayukës.

³ Mä'kxtuktë koos nkäjpxy, ok mxi'iktëty pën mxi'ikantëp.

⁴ Ëjts ka'apës mëët yë ja'ay yë tsip nmëëtëty; paatykyëjxmës ka'ap ninu'un nmä'kxtuka'any.

⁵ Pën miitsëty mmëtoow'ijtëp mëti'ipës yam nkajpxäämpyën, uum mwë'ëmtëty.

⁶ Ëjtspaat ntsë'ëkë koos nmëmay nmëtajy mëti'ipës nikajpxäämpyën; yë njot nini'kxës je'eyë tsyëtyuuynyë mëët yë tsë'ëkë.

⁷ ¿Tii jëtää ko yë ëxëëkja'aytyëjk jeky jyuuky'ajtëpë, mëjja'ayëtëp ets oy mëk xëmë yajpaatë?

⁸ Y'ijxtëp wi'ix yë y'u'unk y'ëna'k yääktën pyatën ets y'ok'u'unk y'ok'ëna'k jotkujk yajpaatë pyë'aay.

⁹ Ni pën wi'ix kyatunëtë ma jyëën tyëjkëtyën, ma y'itën akujk jotkujk; Dios ka'ap tyiytyunëtë.

¹⁰ Yë jyëyujk tsyajpkaajëty xëmë y'u'unk'ixtë ets ka'ap y'u'unk ookëtë.

¹¹ Jëtu'un yë y'u'unk y'ëyë'ëktë kyëyätë tä kupixyny ayääkën

¹² ets y'ätstë tyëki'ixtë ko ja'ay y'ëwtë kyowtë, ko y'ënä'äny yë ak ets yajtukxu'uxy yë xuxn.

¹³ Jotkujk jyuuky'atë ets jotkujk nyaaxtëkëtë.

¹⁴ Jëtu'un yë Dios t'ënëmaaytyë: Jotkujk ëëts yajjuuky'ajtëk, ka'apës nijawëja'antë mëti'ipë m'ënä'ämën'ajtypyën.

¹⁵ ¿Pën maaytyääyëp winë ets yë'ë nmëtu'unmëty? ¿Tii npëjkmëp npatmëp ko yë'ë nmënu'kxtakmëty?

¹⁶ Je'eyëp ko yë ëxëëkja'aytyëjk ka'ap kë'ëm tii tpaatë t'ixtë ets ka'ap kë'ëm akujk jotkujk nyäyaj'itëtë. Ëjts nmëwinjëkäm'ajtypyës yë'ëjëty tä myäytyën tyajtën.

¹⁷ ¿Jëna'a yë ëxëëkja'aytyëjk të y'ëkupi'tsëtëpë? ¿Jëna'a të y'ëk'ëyo'onpatëpë? ¿Jëna'a yë Dios të y'ëktukjoot'anpëjkëtëpë ets të y'ëk'yaj'ëyoowëtëpë?

¹⁸ ¿Jëna'a të y'ëkwa'kxtëpë jëtu'un tä yë pu'uxm pyojwä'kxyën ko pojxujtyky nyäxy?

¹⁹ Jëtu'un yë käjpxy y'ënä'äny: ko u'unk ëna'k kyëpejtyp ko yë taak teety kyamëtä'äky. E yë ja'ay mëti'ipë pokytyuunpë yë'ë mëpaat tkëpety yë pyoky ets ëxëëk jyatëty kyëpätëty.

²⁰ Yë ja'ay mëti'ipë pokytyuunpën yë'ë mëpaat tyiytyunyë yë Wintsën mëti'ipë maaytyääyëpën winë.

²¹ ¿Wi'ix t'ëkmëmaay t'ëkmëtajnëty ja y'u'unk y'ëna'k ko ënety të y'o'knë?

²² Je'eyëp ko ¿pën yë Dios y'ëk'ëëwij y'ëkajpxwijëp, mëti'ipë y'ëne'empyën yë'ëpaat tsajpjotmëpë y'itën?

²³ Tä ja'ay mëti'ipë o'kpën amëk jotmëk, jotkujk ets nitii tkamay tkatajy,

²⁴ kuwit kumeeny ets oy mëk.

²⁵ Tää wiinkëtypë mëti'ipë je'eyë moontëp tujktëpën, pëjkëtëp atoonëtëp ets jëtu'un y'ooktë; ninu'un tka'ixtë ja jotkujk'ajtën.

²⁶ Jap naaxjoty kyëtakta'atë, jap aak tu'knax yajpaatë; aak tsu'tsëtëp yë tënë'k ets pijky.

²⁷ Ëjts wa'atsës nijawë wi'ix maytyën mtajtën mëët ëjts ets wi'ix m'ëna'antën ëxëëkjaty.

²⁸ Ets jëtu'un nyäyajtëwëtë: ¿Maa ënät ja tyëjk të wyi'imy xiipë ja'ay mëti'ipë të y'ityën kuwit kumeeny, mëti'ipë ëxëëk të jyä'äy'ätyën?

²⁹ ¿Këtii mëët të mëtya'aktë ja'ay mëti'ipë jëtijtëpën? ¿Këtii xymyëtowtënëm wi'ix kyajpxtën myëtya'aktënë:

³⁰ mëti'ipë ënantëpën ko yë Dios jyoot'anpëky, kyejxyp yë ëyo'on ets ëxëëkja'aytyëjk ka'ap wi'ix jyatë kyëpätë?

³¹ Ni pën tkatukwinmëtoy wi'ixjaty ja'ay y'ëti'itsy y'ënä'änyën, ni pën tkatukwinmëtoy yë pyoky.

^32-33 E ko ënät y'ooky ets nyaaxtëjkënë, aak panëjkxëp ja'ay, tam mëti'ipë jëwyiin ye'epyën, tam mëti'ipë ix'am ye'epyën ets tnapikëtë yë jyut, yë'ëpaat yë naax yu'unkënë ko yajnitajë.

³⁴ Nëkoopë mxëëw xyajtëkoytyë koos xyajjotkujkëja'antë. Jä'ä ko miitsëty je'eyë m'ëxëëk win'ëëntë.