Job 19 - Biblia Dc en Mixe de Quetzaltepec

Ma Job kyäjpxyën

^1-2 ¿Jëna'apaat mkajpxa'antë maas je'eyë xyajjotma'atën ets xyajjotkëxtën?

³ Janaam jatsojkës je'eyë xy'ojtë xya'axtë; ¿këtii mtsëtyuntë koos jëtu'un xytyuntë?

⁴ Oyës jeexyë njatimpyokmyëët'ajtpë, ëjts jeexyë nätyu'uk nkumëtoopy.

⁵ Miitsëty jä'ä mnäyjyawëtë ni'ik yowë mtimwya'ats'atë ets yi'iyës xëmë xytyukwinmëtoowtëp koos npëkyë n'ixyë.

⁶ Yë'ë yajxon nijawëtë ko yë Dios yë'ëjës të xyajkëtay, yë'ëjës jam të xyajkuka'ajë ma o'ktaknën yu'utsypë.

⁷ Ëjts jayaxp jajojkpës: tyamës yë ja'ay xyaj'ooka'any ets ni pënës xykya'ëtsoy; tëëjës n'amëtoy yë näypyutëkë, ni pënës të xykyapaye'ey.

⁸ Tiosës të xynyë'ë'ëtuky të xytyu'u'ëtuky këtiipës naxëty; tëë tyajkootsë maa ja në'ë tu'ujën.

⁹ Tëës xypyëjkë ja nmëjaawës; tëëjës xypyëjkë ja nkujänës mëti'ipës nmëkutujkpë'ajtypyën.

¹⁰ Xit ko'owës të xytyuunta'ay; wa'ats të tnujkë'kta'ay ja tyikts y'aats mëti'ipës ënety n'a'ijxyp njëjp'ijtypyën.

¹¹ Jam ja tsyip y'äkë të tyajnaxy ma ëjtsën ets jëtu'unës ëxëëk të xytyuny tääjës jeexyë xymyëtsip'atyën.

¹² Tëës xytyukniwoowpäjta'ay yë tsyiptuunpëtëjk; tëë tyajnatuktë yë njëën ntëjkës ets tëë tnipëjktaakëtë wi'ixës xymyëmëta'aka'antën.

¹³ Dios të tuknipëjktaakë ets nmëku'uktëjkës mëti'ipës ënety mëët oy nämyäyën xy'ëxmatstëtyës ets xymyëjëkämkä'äktëtyës etsës jëtu'un xy'ixtëty jaaypyaat jaaypyo'kxyën.

^14-15 Yë njëëky nmëku'ukës ets ja'ayëty mëti'ipës mëët oy nämyäyën tëëjës xy'ëxmajtsta'atë; mëti'ipë ijty tsënaaytyëpën maas yë njëën ntëjkën tëëjës xyjyä'äytyëkooynyëtë. Yë ntuunpës jëtu'unës xy'ijxnëtë tä oy pën ja'ayën; ka'apës xy'ëk'ixkajpnëtë.

¹⁶ Oyës yë ntuunpë njamëkäjpxy ka'apës xy'ëtsoy, oyës njamënu'kxtä'äky ka'apës xynyi''ijxë'ëky.

¹⁷ Koos yë nto'oxytyëjk njamëwinkony, poj'am jyëwä'äky; yë'ëpaat yë n'u'unk n'ëna'kës ka'apës xy'ëk'ixanëtë.

¹⁸ Yë'ëpaat yë pi'k ëna'këty ka'apës xymyä'kxtë; je'eyës njawä'ätsë'ëky täätsës ëxëëkjaty xynyi'ëw xynyikajpxtë.

¹⁹ Yë'ëpaat yë ja'ayëty mëti'ipës ënety mëët oy të nämyäyën ëxëëkës xy'ijxnëtë; mëti'ipës ënety ntsojkpy nja'apën tëëjës ja xymyëtsiptso'onëtë.

²⁰ Jëtu'unës yë nxixy kyëx'o'tsnë npajkwiinyës, oyës wi'ix njaakjuuky'äty.

²¹ Pa'ëyoowtëkës miitsëty mëku'uktëjkëty, mëti'ipës mëët oy të nämyäyën, jä'ä ko yë Dios yë'ëjës ëxëëk xytyuunp.

²² ¿Wi'ix ko miitsëty xy'ixjëtit xypyajëtitës tä jeexyë mTios'atën? ¿Ti këtiijën mku'uxëtë mëët ëjtsë?

²³ Jääpëk pën tkëxja'ay yë n'aaw n'ayukës pujxnkëjxy.

²⁴ Jääpëk jeexyë pën tkëxpajy muum tsaakëjxy ëkë muum yu'unk pujxnkëjxy ets jeexyë jam xëmëkyëjxm wyi'imy këxpajy.

²⁵ Ëjts nija'apës ko juuky yajpaaty mëti'ipës xypyukajpxëjaanpën ets yë'ëjës xynyikajpxtu'utaanp yaa naaxwiiny naaxkëjxy.

²⁶ Oyës jeexyë njot nini'kx jyatim nyëka'atääpyë wäänjaty, ëjts koonëmës yë Dios n'ixa'any wiinxë jëjpxë.

²⁷ Kë'ëmës mëët yë nwiin ntimy'ixa'any, ëjts kë'ëm n'ixäämpy ka'ap wyiinkja'ayëty. Ëjts ka'apës tii nmëjaawnë

²⁸ koos të nmëtoy ko miits m'ëna'antë: ¿Wi'ix tsoky, wi'ix mëpaat nyëë pyoky n'ixta'ayëmë? Yë y'ëxëëkjot y'ëxëëk winma'any jap yajpaaty ma jyot mwinma'anyën.

²⁹ Je'eyëp ko yë'ë mtsë'ëkëtëp ja tëypyujxn, ja tëypyujxn mëti'ipë Dios tyuktëytyuunpyën ja ëxëëkpë. Nijawëtë yajxon ko tää tu'uk yajpaaty mëti'ipë winë nyipaye'epyën.