Job 17 - Biblia Dc en Mixe de Quetzaltepec

¹ Tujkpës yë nxejy njawë; këjxpës yë njuukyajtën njawë; jëtu'unës näjyawëty xy'ëwxijnëpës yowë o'kpë jut.

² Maas ëjts nyajpaatyën aak yajpatp ja'ay mëti'ipë je'eyë nëëxikp tukxikpën; tsu'um koots aak je'eyës n'ixy tyäty wyinkajpxpätë.

³ E mijts Wintsën, jyëkyejpy xykyu'ëtsowëtyës; ¿mijtsyë mpatëp këtiijë?

⁴ mijts, mëti'ipë yajma'typën yë jot winma'any, këtii xyajkutukëty etsës xymyëmëta'aktëty.

⁵ Wä'än t'ayuu'atë yë y'u'unk y'ëna'këty yë ja'ayëty mëti'ipë nyimeenypyëjktëpën jyiiky myëku'uk.

⁶ Mijts m'ëwatsyp etsës wiinkjaty nyajni'ëw nyajnikajpxëty ets nyajwintsuj nyajëjptsujëtyës.

⁷ Moonëpës ja n'ijxën mëët ja pëjkën ato'onën; yë njot nnini'kxës jëtu'un je'eyë jyaak yaj'ixy tä äpkën.

⁸ Ko jëtu'un t'ixtë yë oyjyä'äytyëjkëty je'eyës xynyimon xynyituktë; je'eyës xytyukjoot'anpëktë ets ëxëëkës xytyijtë.

⁹ Yë'ë wa'ats nyäyajnaxëtë ets jëtu'un y'ëna'antë ko yë'ëjëty ka'ap nitii tuuntëkoytyë.

¹⁰ E mintë yaa miitsëty ni'ëmukë, ets xy'ixtëty ko ka'apës mpaata'any yë ja'ay wijypyë këpetypë ma miitsëtyën.

¹¹ Poj'am nyäxy ja xëëw jëmëjt ets ja mëti'ipës të nmay të ntajyën, mëti'ipës ënety të ntsojkën'atyën jëtu'unyë tyëkooytyääynyë.

¹² E miitsëty mëpaatëp yë tsuu xyaj'awinpitë xëëny; oy jyakootsëty jëtu'un m'ëna'antë ko tää tyim xëënyë.

¹³ Ëjts yi'iyës xyjyaaknitëjkëp yë o'kën ets näjyëpijptëwëtëtyës akootstuuy.

¹⁴ Ëjts yë'ëjës nteety'äjtyp, ntaak'ajtyp ets nmëkä'äx'ajtyp yë tënë'k mëti'ipë jap o'kpëjutjoty yajpatëpën.

¹⁵ ¿Tiijës njaaktimjyëjp'ixëp? ¿Maa y'ëktsoona'any ja mëti'ipës xyaj'oy'atëpën?

¹⁶ ¿Ti jä'ä jap o'këntujp mëët njëjpta'akëtyës ets tu'kmukyë jap npo'kxtëtyës naax wayjotyë?