Job 15 - Biblia Dc en Mixe de Quetzaltepec

Mëmäjtskpë mëtyä'äky Ma Elifaz kyäjpxyën

^1-2 Mëti'ipë ja'ay këpetyën ka'ap nëkoo oy nawi'ix y'ëtsoy ets ka'ap nëkoo kyäjpxy poj'am;

³ ka'ap nëkoo je'eyë y'ayuk t'ixkäjpxy ets yë'ë twa'kpäjn'aty mëti'ipë ka'ap tsyoowpaatyën.

⁴ E mijts myajtëkooyëp Dios ja wyintsë'kën; myajtëkoopy ja mëtëypyë ja Dios ëwtajtën.

⁵ Ëxëëk yë mjot mwinma'any, paaty jëtu'un mkajpxpëtsëmy ets jä'ä mkäjpxyp ka'apë myëtëyëtyën.

⁶ Ka'ap kyopkpëkyëty mijts n'ojëty, mkë'ëm'aaw mkë'ëm ayuk mnätyuktëytyuunëp.

⁷ ¿Jä'ä mmay mtajy ko ma ënety mijts ka'ap mjuuky'ätynyëmën ka'ap ijty maa ja'ay ets yë'ëpaat ijty kyajääjëty yë tun kopkë?

⁸ ¿Win'ëëw wiinkajpxpën mnäjyawëty ma Dios, ëkë tu'kpajk mëj'ijxpëkyjyä'äy mnäyajnaxyë yaa naaxwiiny naaxkëjxyë?

⁹ ¿Tii mnija'ap mëti'ipës ka'ap nijawëtënë? ¿Tii m'ixy'äjtyp mëti'ipës ka'ap n'ixy'atënë?

¹⁰ Mëjja'ay mëj ëna'k yam ëëtsëty ets nija'awëtyëpës ni'ik winë këtiinëm jyëtu'unëty ja mteety.

¹¹ ¿Këtii xy'oyjyawë ko yë Dios myajjotkujk'atyë ets ko oy aaw oy ayuk ntukmëkajpxtë?

¹² ¿Wi'ix ko nëkoo mnäyajjoot'anpëkyë ets ix yë mwiin je'eyë xyajtsaptsënë?

¹³ ¿Wi'ix ko yë Dios yë'ë xytyukjoot'anpëky ets m'a'ëy m'akäjpxy nëkoo?

¹⁴ Ka'ap maa ja'ay mëti'ipë ka'ap pyokymyëëtëtyën ets ka'ap maa ja'ay mëti'ipë ka'ap pyokytyunyën.

¹⁵ Yë'ëpaat yë tsajpjotmëtë kukäjpxy ka'ap janty wa'ats tyim itë, yë'ëpaat yë tsajp oy tka'ixy yë Dios,

¹⁶ ni'ik yë ja'ay, mëti'ipë pokytyum xëmë yajpatpën ets aakjä'ä xëmë y'ijxyp tyuunpy ka'apë y'oyëtyën, mëti'ipë pokytyuunpën tä jeexyë nëë t'uukyën.

¹⁷ Mëtoow'ijtkës yë n'aaw n'ayuk, tyam ntukmëmëtya'aka'any mëti'ipës kë'ëm të n'ixy të ntunyën,

¹⁸ mëti'ipë ijxpëkyjyä'äytyëjkëty yaj'ijxpëjktëpën, mëti'ipë yë y'aptëjk tyukni''ixëtën,

¹⁹ mëti'ipë yajkë'ëmooytyën yë naaxwiinyëtë ets mëti'ipë ojts ka'ap nyaxyëpinëtën mëët wiinkëtypë ja'ay.

²⁰ Yë ja'ay mëti'ipë ëxëëk ja'ay'ajtpën ëxëëk näjyëtu'un jyäty kyëpety ets wäänë jyuuky'äty.

²¹ Myëtoopy tii mëti'ipë ëtsë'këyëpën; ko nyäjyawëty jotkujk, jää mä'tspë tyukja'tyë.

²² Ka'ap tjëkyepy wi'ix kyäkpëtsëmëty ma jap akootstuuy yajpaatyën, jä'ä ko jëtu'un nyäjyawëty jëtu'un yowë tsujkn tyim yajtuk'ëwxity ets ja'ay yaj'ooka'anyë.

²³ Ko ënety y'ooky yë'ë nëjkx tsyu'utsyë lut; yë'ë wa'ats tnijawë ko ëxëëk jyata'any kyëpäta'any.

²⁴ Nëjkxëp y'ëtsë'ëkëty ja kootsajtën, nëjkxëp ja monyëtukyë tyukja'tyë ets ja ëyo'on jotmay, jëtu'un tä muum tu'uk yë yajkutujkpë tukja'tyën yë kajpn.

²⁵ Jëtu'un jyäty kyëpety ja ja'ay mëti'ipë nyipëtë'kpyën ja Dios, mëti'ipë tsyipwinkajpxëpën ja Dios, mëti'ipë maaytyääyëpën winë,

²⁶ mëti'ipë näjya'awëyëpën akëëytyuky yowë yajpaaty ets mëët tsyiptuna'any ja Dios.

²⁷ Onmëëtpën ja wyiin jyëjp je'eyë kyëxë'knë ets aakjëtu'un wyintuuy pyë'aay.

²⁸ Xit ko'ow ja kajpn jyata'any ma ënety yë'ë tsyëënën; nëjkxëp ja jëën tëjk yajtukäktuta'ay ets xit ko'ow ja naax y'awinpita'any.

²⁹ Ka'ap ja wyit myeeny jeky tmëët'ata'any ets ka'ap kyëjääjëja'any ja kyam tyu'u.

³⁰ Ka'ap tjëkyepy wi'ix kyäkpëtsëmëty ma jap akootstuuy yajpaatyën. Jëtu'un nëjkx jyäty tä tu'uk yë u'unk kepyën mëti'ipë wintooykyëtakpën yë jyi'tsk ëkë ijxtëm jeexyë yë pyij nyëpojyën.

³¹ Ka'ap yë'ë tuk'ijxpätëty yë antakën, jä'ä ko ka'ap tii tpaata'any t'ixa'any mëët yë'ë.

³² Ka'anëm ënety tpaaty ja xëëw jëmëjt ko tyëëtsë'ëkëty ets ka'ap nëjkx y'ëkji'tstëkajtsnë.

³³ Jëtu'un jyata'any tä yë tsatym kepy mëti'ipë ka'ap yë tyëëm tsyä'ämyën, ëkë tä yë olivë kepyën mëti'ipë pyijy nëka'apën.

³⁴ Yë ëxëëkja'aytyëjk ka'ap yë y'u'unk y'ok tmëët'ata'antë, yë jyëën tyëjkëty mëti'ipë ënety ujts yajpatpën mëët yë wit meeny mëti'ipë të tpaatyën mëët yë win'ë'ën winxajën nëjkxëp nyitooytyä'äy.

³⁵ Ujts yajpaatë mëët yë ëxëëk jot ëxëëk winma'any tä tu'uk yë to'oxytyëjk yaj'ixyën mëti'ipë u'unk maay tyimy'äjtypyën ets tyajmina'any naaxwiiny yë ëyo'on jotmay; mëëtkyëjxm ko yi'iyë të tuunk'atë win'ë'ën winxajën.