Job 12 - Biblia Dc en Mixe de Quetzaltepec

Ma Job kyäjpxyën

^1-2 Yajwinja'awëp ko miitsëty naax kajpn ja y'aaw y'ayuk myajnajxëtëp, ko ënety m'ooktë ka'ap nëjkx ja naax kajpn t'ëkmëët'ajnëtë ja wyijyjyä'äytyëjk.

³ Je'eyëp ko ëjts nija'apës winë ets ka'apës nnaxymyëty ma miitsëtyën. ¿Pën ka'ap jëtu'unpë tnijawë?

⁴ Oyës nkapokymyëëtëty ets oyës nitii tuuntëko'oyën nkamëët'aty ets oy të nyäxy ja xëëw jëmëjt ma ijty ja Dios tmëtoyën koos nmëkäjpxy, yë njëëky nmëku'ukës mëti'ipës mëët oy nnäymyäyën, je'eyës tyam xytyukxi'iktë.

⁵ Mëti'ipë ja'ay jotkujkën nyëxikpy tyukxikpy ja ja'ay mëti'ipë ka'ap jyotkujkëtyën, ka'ap tmëkjawë oy ni'ikyë tnajtstijë mëti'ipë jam tim këtawanëpën.

⁶ Yë ja'ayëty mëti'ipë ëxëëk ëtëtstëp ënantëpën, jotkujk mya'atë pyo'kxtë ma jyëën tyëjkëtyën; mëti'ipë Dios myëkajpxtëkooytyëpën, jotkujk tyimnax tyimtëkëtë, jëtu'un myäytyë tyajtë ko aak kyë'ëjotjotm winë tmëët'atë.

⁷ Yajtëw yë aayjëyujk ujts jëyujkëty ets joon jëyujkëty ets xyjyatëty xynyijawëty winë.

⁸ Yajtëw näjyëtu'un yë nëë jëyujk mëti'ipë mëjmejyjoty tsënaaytyëpën, jyëkyejpy winë xyatëwtëty ets winë mtukni''ixëtëty.

⁹ ¿Jää pën mëti'ipë ka'ap tnijawën ko Dios winë të tyajkojta'ay mëët yë kyë'ëjë?

¹⁰ Jam kyë'ëjotm, jam y'ijta'atë mëti'ipë juuky'ajtëpën.

¹¹ Yë tatsk wa'ats tmëtoowta'ay wi'ixjaty yë mëto'owën myinyën ets pa'kxwiin wa'ats tja'awëtyä'äy wi'ixjaty tii jyawën.

¹² Yë mëjja'aytyëjk myëët'ajtëp yë jot winma'any, jää ko tëë jyuuky'atë.

¹³ Je'eyëp ko Dios ni'ik yë wyijyëty ets maaytyääyëp winë; yë'ë winë tyuknipëjktakëp ets tuny.

¹⁴ Mëti'ipë Dios të tyajkutëkoyën, ka'ap tjëkyepy pën jatëkok t'akojëty; mëti'ipë Dios të tyajku'ëtukyën, ka'ap tjëkyepy pën tyajniku'ëwa'atsëty.

¹⁵ Ko yë'ë tmajtswë'ëm yë nëë tuu, poj'am winë tyëtsta'ay; e ko tmajtstu'uty yë nëë tuu, poj'am tyajnikoonpäjta'ay yë it naaxwiinyëtë.

¹⁶ Yë myëk'ajtën yë'ë xëmë yajmëtakëp. Aakjam yajpata'atë yë ja'ayëty mëti'ipë win'ë'ëntëpën ets mëti'ipë yajwin'ë'ëntëpën.

¹⁷ Yë y'ëwatsyp ets wijyjyä'äytyëjk wyinma'anytyëkoytyëty ets kutuunktëjk tsyuujëtëty pyojëtëty.

¹⁸ Yë yajkutujkpë pyëjkëp yë kyutujkën ets tsumy matsy yajmënëjkxtëty wiink naax wiink kajpn.

¹⁹ Pyëjkëp yë teetyëjk yë tyuunk ets jyëpëjktääpy ma kutujktaknën mëti'ipë ënä'ämtëpën yajkutujktëpën.

²⁰ Mëti'ipë ijty oy ja ëëwij kajpxwijën yajktëpën, ka'ap y'ëk'ayukpatnëtë ets ja mëjja'aytyëjk wiinkjaty winë tuunëtë.

²¹ Yë'ë yajkutujkpy ets wintsëntëjkëty ka'ap pën y'ëkwinkutsë'kënëtëty ets jëtu'unyë myoonkëtak tyujkëtaknëtëty mëti'ipë ënety amëk jotmëk näjya'awëtëpën.

²² Yë'ë yajniku'ëwatsyp ets yajnijawëty mëti'ipë ënety yu'utsy ijtpën ets mayjyä'äy tnijawëty mëti'ipë ënety yu'utsy myëët'ajtëpën.

²³ Yë'ë yajmëjëp ets yajmutskëp yë naax kajpn, yë'ë yajwä'kxyp ets yë'ë yajmujkpy.

²⁴ Pyëjkëp yë wyijy'ajtën yë yajkutujkpë mëti'ipë ënä'ämpën ma naax kajpnën ets jam tnajtswopë muum ma y'aanë'ëk tyëëtsë'ëkëtyën ets jam ka'ap y'ëktu'upatnë,

²⁵ ma jam jëtu'unyë jyaaktony jyaakxajyën akootstuuyën ets jyaakkunëjkx jyaakkukëtawë ëmu'ukyë ja'ayën.