Job 1 - Biblia Dc en Mixe de Quetzaltepec

Ma Tios tyajkutukyën ets Job ëxëëk jyatëty kyëpätëty

¹ Jam ma Us y'itjotmën, jam ijty tu'uk ja'ay tsyëënë, Job xyëëwajtyp. Oy ijty jyuuky'äty, ka'ap tii tuuntëkoy tkajpxtëkoy, Dios myëtuumpy ets nijëna'a ojts pën tkamëtëkoy.

² Wëxtujk yë myaank ets tëkëëk yë nyëëx.

³ Wëxtujk mil tmëëtëty yë kupixyny, tëkëëk mil yë jëyujk jëku'ux, mëkoxk mëko'px yë tsajpkaa ets mëkoxk mëko'px yë krukts. May ijty yë myëtuunpë. Mëj kumeenyjyä'äy, jam tsyëënë xëëwpëtsëmtsyow.

⁴ Yë Job yë y'u'unk y'ëna'k xëmë ijty xyëëwtuntë ma jyëën tyëjkëtyën. Mëj këjää ja ka'ayën ukën tnipëjktaakëtë ets tyukniwijtsëtyëp jëna'a pyaatëtën. Wyoowtaaytyëp ja myëkä'äxtëjk ye'etyëjkpë to'oxytyëjkpë.

⁵ Ko xyëëwtuunta'atë, tääts ja Job tmëkajpxmuky yë y'u'unk y'ëna'k, jopyëp pyëtë'kojy ets tmo'oy yë Dios yë wyintsë'kën nino'oky nixämpyë, tyajwa'atsy ja y'u'unk y'ëna'k ma ja nyëë pyokyëtyën. Yë Job xëmë ijty jëtu'un tuny, jä'ä ko yë'ë myëmääpy myëtäjpy ko muum yë y'u'unk y'ëna'k tmëkajpxtëkoytyë yë Dios ëkë muum tëkatsy myäytyë tyajtë.

⁶ Tu'kxëëw tu'kjëmëjt ojts nyäwya'këxë'ëkëtë yë tsajpjotmëtë kukäjpxy, ojts näjyëtu'un myiny yë tsajpjotmëtë kukäjpxy mëti'ipë ni'ë'ënëpën.

⁷ Tä ja Wintsën yajtëëwë: ¿Maa mtsoony? Tä ja tsajpjotmëtë kukäjpxy y'ëtsooy: Naaxwiinyëtë ojts të n'aye'eyës.

⁸ Ënet ja Wintsën y'ënëmaayë: ¿M'ixy'äjtyp yë ntuunpës mëti'ipë xyëëwajtypyën Job? Nimaa ja'ay jëtu'unpë naaxwiiny naaxkëjxy, mëti'ipës oy xymyëtuunpën ets tëy tëtä'äky jyuuky'äty, mëtëy winë tuny ets nitii tëko'oyën tkamëëtëty, aak'oy jyiiky myëku'uk tjawë.

⁹ E ja tsajpjotmëtë kukäjpxy, mëti'ipë ni'ë'ënëpën tyaa y'ëtsooy: Yë'ë paaty oy mmëtunyë jä'ä ko jotkujk jyuuky'äty.

¹⁰ Mijts ka'ap xyajkutuky ets pën kyë'ënixajëtëty, mëk xykyëwent'ajtë jyuukyajtën, jyiiky myëku'uk ets tëkokyë mëti'ipë myëët'ajtypyën; aak mkënu'kxyp mëti'ipë myëët'ajtypyën ets kumeenyjyä'äy yë'ë, may ni'ik yë jëyujk tsajpkaa tmëëtëty këtiinëm yë myëku'uktëjk, myëkunaax myëkukajpn.

¹¹ E ko winë xy'ëkjëpëjkta'ajëty ma yë'ëjën, tää xy'ëk'ixëty wi'ix mpokyën ets nëjkxëp kë'ëm xymyëtoy.

¹² Ënet ja Wintsën t'ëtsooy ja tsajpjotmëtë kukäjpxy mëti'ipë ni'ë'ënëpën: Oy xy'ëk'ijxmatsëty. Tun tii mtunäämpy mëët yë Job ets ma winë tmëët'atyën, je'eyëp ko këtii yë jyuukyajtën xymyëwa'anëty. Ënet ja tsajpjotmëtë kukäjpxy mëti'ipë ni'ë'ënëpën, jam tsyo'ony Wintsën wintum.

¹³ Jëtu'un ojts tëkok jyäty kyëpety, tam ënety yë Job y'u'unk y'ëna'këty xyëëwtuntë ma ja kä'äxkopk ja tyëjkën,

¹⁴ ko tu'uk ja'ay jyä'äjty ma Job yë tyëjkën ets tyajmiiny ja aaw ayuk ets y'ënäny: Yajtsajp kaa yuutëp ënety ëëtsëty jam ets krukts tam ënety y'oktë winkon,

¹⁵ ko ajotkumonë të xytyukja'tës yë sabejë ja'ayëty ets të tmä'tsta'atë ja tsajpkaa ets tëë tyaj'ooktë ja tuunpëtëjk. Ëjtsyë të njake'eky etsës nikajpxa'any ma mijtsën mëti'ipë të tyuny të jyätyën.

¹⁶ Tam ënety kyamëtyakta'aynyëm ya'atë ja'ay ko wiinkpë myiiny ets y'ënäny: Tëë ënääw tyukëtä'äkyë yë kupixyny ets mëti'ipë kupixyny këwent'ajtëpën tëë y'o'kta'atë. Ëjtsyë të njake'eky etsës nikajpxa'any ma mijtsën mëti'ipë të tyuny të jyätyën.

¹⁷ Tam ënety kyamëtyakta'aynyëm ya'atë ja'ay ko wiinkpë myiiny ets y'ënäny: Yë'ë Caldeo ja'ayëty ëëts të xytyukja'të, nitëkëëkpëky të y'itë ets të tmä'tsta'atë ja jëyujk jëku'ux ets tëë tyaj'o'kta'atë ja mëti'ipë këwent'ajtëpën. Ëjtsyë të njaake'eky etsës nikajpxa'any ma mijtsën mëti'ipë të tyuny të jyätyën.

¹⁸ Tam ënety kyamëtyakta'aynyëm ya'atë ja'ay, ko wiinkpë myiiny ets y'ënäny: Tam ënety yë m'u'unk m'ëna'k xyëëwtuntë ma mmaank yë tyëjkën mëti'ipë kä'äxkopkën,

¹⁹ ko tu'uk mëkjëënpoj, të myiny mëti'ipë jam të tsyoonyën të'ëts'itjotm ets yajxonën mëk të pyojy ets ja tëjk të jyity ma të nyijijtpäjta'atën ja m'u'unk m'ëna'k. Ëjtsyë të njake'eky etsës nikajpxa'any ma mijtsën mëti'ipë të tyuny të jyätyën.

²⁰ Ënet ja Job pyëti'ky ets tkë'tstëëy ja wyit, jä'ä mëk jya'ap ko ënety jëtu'un të tyuny të jyätyë, ojts ja wyääy kyopk tkä'pta'ay ets tmënu'kxtäky ja Wintsën.

²¹ Ënet y'ënäny: Niwa'ats ëxwa'atsës të nminy naaxwiiny, näjyëtu'unës jatëkok ntsoona'any. Wintsënës winë të xymyo'oy, nän yë'ëjës winë xypyëjkëjaanp; kënu'kxy mëjjawë yë Wintsën yë xyëëw y'ity.

²² Oy mëjwiin këjää ja Job ja jotmay tjapaty, yë'ë ka'ap ojts tmëkajpxtëkoy yë Wintsën.